Tito 3 - Nouveau Testament et Psaumes en Ndandi Version 1962

Eributwa buhya-buhya eriyira zoa bahya

¹ Wibukayebo bayolobeke oko batabali nabehamuli, bowebo, basike busana nomubiri owene gosi,

² sibanegulire omundu, sibalwe, babye bolo, bakangaye erikenga abandu bosi.

³ Ku sangwa netu twabya ebikiru kera, isituriowa, itukatalibawa, ituri abakobe besyongumbu neritsemera byemisindo mingi, itukasiba omo bwanise neritsura, itukakubawa ekiniga netu tukakwana ekiniga;

⁴ nikwa omugulu obubuya bwoMungu Mulamya wetu nolwanzo luwe oko bandu, byaminyikala,

⁵ butsira busana nemibiri twakola omo ritunganene, nikwa busana neriganyira riwe, mwatulamya, busana neriera ryeri butwa buhya-buhya neriyirwa bahyabahya omo Kirimu Kibuyirire,

⁶ ekyo atutulirako kutsibu busana na Yesu Kristo oMulamya wetu;

⁷ neryo twamabitungananibwa busana nolu kogo luwe, itwayirwa mo bari bomwandu omo maha wengebe yerikota.

⁸ Ebinywa ebi bisikire, kandi ngasonda usikaye emyatsi eyi kutsibu neryo ababirikirirya oMungu babye nomuhwa bayihire oko mibiri yowene; Emyatsi eyi yowene iri nendundi oko bandu.

⁹ Nikwa usage eribulya ryobukiru, nesyondengo syakera, namalwa, nerilwira ebihano; kusangwa ni byabusa sibiwite endundi.

¹⁰ Nikwa busana nomundu mulwi, wama bimukunga engendo nguma neyakabiri, umugane,

¹¹ iniunasi omundu ngoyo abirihinduka nerikola nabi; abiriyitswera.

Ndagane

¹² Omugulu nasyakutumira Artema kutse Tikiko, ulenge kutsibu erinyihikako eNikopoli: kusangwa aho nabiribuga nyiti nasikala oko mugulu weritsuku.

¹³ Ulenge ndeke eritsindika Zena omwimiri na Apolo omo nzira yabo; sibayire ekyo bakabula.

¹⁴ Kandi abandu betu bige eriyinira oko mibiri yowene, ibatoka eriwatikya abari nobwaga bunene, sibabye butsira ebiguma.

¹⁵ Abosi abari haguma nage bakakukeraya. Ukeraye aba twanzire omwikirirya. Olukogo lubye ninywe bosi.