Tito 2 - Nouveau Testament et Psaumes en Ndandi Version 1962

Erihana ryabosi

¹ Nikwa uwe, ukangiriraye erikangirirya eryakwenene.

² Uti, abasyakulu sibakunde, babye bolobolo, abamenge, abasikire omwikirirya, nomo lwanzo, nerisika.

³ Uti, abakekulu nabo babye nerikenga omo migendere yabo, sibabye abakalega abandu kutse abakobe berikunda; babye bakakangiriraya ebi buya,

⁴ bakangiriraye abakali balere erianza abibabo nerianza abana babo,

⁵ babye namenge, ababuyirire, abakoli bomubiri eka, abenge, abakowa abibabo, eKinywa kyoMungu sikitsumawe.

⁶ Ritya uhatikane abalana eriyiteya.

⁷ Omo myatsi yosi uyikangaye mo lulengo lwemibiri yowene, omwikangirirya ryawe ukangaye kuteteba, kuri molo,

⁸ nebinywa bisikire ebite kwa kyangakungwa, neryo enzigu ikwe esisoni, isiwite ekibi ekyo yangatwahulira.

⁹ Uti abakobe bowe abakama babo, eritsemesyabo omo myatsi yosi; sibabye bobuhaka;

¹⁰ sibibe, nikwa erikangya eriimira ndeke ryekwenene; ibatoka erisuga erikangirirya ryoMungu oMulamya wetu omo myatsi yosi.

Olukogo lwoMungu ni lama

¹¹ Kusangwa olukogo lwoMungu luminyikere, lukaleta erilama oko bandu bosi,

¹² lukatukangiriraya, erigana eritinda kenga Mungu nesyongumbu sye kihugo, itwabya eriyikakirya, neritunganana, nerikenga Mungu omo kihugo kyalino,

¹³ itu kalindirira amaha womuyisa, neributuka ryolukengerwa ryo Mungu wetu mukulu noMulamya wetu Yesu Kristo,

¹⁴ oyo wayiha busana netu eritutongolia okwebibi byosi neriyererya abandu busana naye abakwire omuhwa wemibiri yowene.

¹⁵ Utule emyatsi eyi; uhane ukunge nehamuli yosi. Suleke mundu akakupona.