Matayo 9 - Nouveau Testament et Psaumes en Ndandi Version 1962

Erilama ryoyu basire

¹ Mwingira omo bwato mwasokera oko muyi wuwe.

² Neryo lebaya mobamuletera oyu basire, iniagotsere oko ngingo yiwe; nomugulu Yesu alangira erikirirya ryabo mwabuga noyu basire ati, Mugala wage ubye nobutseme; ebibi byawe byamabuyirwa.

³ Kandi lebaya abandi babasaki mobayibwira bati, Omundu oyu akatsuma.

⁴ Nikwa Yesu, mwaminya amaringikania wabo, ati, Busana naki mukaganiraya ebibi omo mitima yenyu kwehi?

⁵ Niki kyokyolo, eribuga, nyiti, Ebibi byawe byamabuyirwa, kutse eribuga, nyiti, Hangana uyigendere, kwehi?

⁶ Nikwa mutoke eriminya ko Mugala womundu awite ehamuli omo kihugo yeribuyira ebibi—mwabwira oyu basire— ati, Hangana, uheke engingo yawe ugende eka.

⁷ Neryo mwahangana mwaya eka.

⁸ Esyondeko omugulu syalangira, mobubaha, mobapipa Mungu, oyu waha abandu ehamuli yingaha.

Eribirikirwa ryaMatayo

⁹ Omugulu Yesu akalaba akalwayo, mwalangira omundu oyu kahulawa mo Matayo inianikere aho herisolera; mwabuga naye ati, Unyikwame. Naye mwahangana mwamukwama.

¹⁰ Omugulu abya anegemere okwirya omo nyumba, lebaya, abasolesya bangi na bakola nabi mobasa mobikala haguma na Yesu na biga buwe.

¹¹ Omugulu baFarisayo balangira ebi, mobabwira abiga buwe bati, Busana naki omukangirirya wenyu akarya haguma na basolesya na bakola nabi kwehi?

¹² Nikwa omugulu owabya, mwabuga ati, Abakalire sibari nobwaga bwomusaki, nikwa abalwere.

¹³ Mugende mwige omusindo weki, kiti, Ngasonda eriganyira, butsira obuhere. Kusangwa sinasa eribirikira abatunganene, nikwa bakola nabi.

Eritsira

¹⁴ Neryo abiga ba Yoane mobamuhikako, bati, Busana naki itwe na baFarisayo tukayira, nikwa abiga bawe sibeyira kwehi?

¹⁵ Yesu mwabuga nabo ati, Abageni beriherukania bangatoka eririra omugulu iba womuheruki ane nabo kwehi? Nikwa ebiro bikandisyasa, iba womuheruki abilusibwa kubo, oko mugulu oyo basyatsira.

¹⁶ Sihari mundu oyu kahira ekitomeko ekihyakihya oko lukimba lwakera, kusangwa ekitomeko kikatula olukimba, ilwatulika kwilaba.

¹⁷ Kandi ebinyu bihyabihya sibihirawa omo ngobi ya kera yebinyu; byamahirwamo esyongobi sikatulika nebinyu ibyutika, nesyongobi isyahera; nikwa ebinyu bihyabihya bikahirawa omo syongobi nyihya, nebyosi ibyabyaho.

Mwali wa Yairo

¹⁸ Abere akabuga nabo, lebaya, omurongani mwasa mwamukukamira ati, Mwali wage amahola; nikwa wase umuhire kwebyala byawe, akandibyaho.

¹⁹ Yesu mwahangana mwamukwama nabiga buwe.

²⁰ Neryo lebaya, omukali oyo wagalawa nerisenda ryomusasi emituta ikumi nibiri mwasa enyuma kwiye mwatula oko musike wolukimba luwe;

²¹ kusangwa ayibwira ati, Nanatatula risa oko lukimba luwe, ngandilamibwa.

²² Yesu mwabinduka, mwamulangira mwamubwira ati, Usikaye omutima, mwali wage; erikirirya ryawe ryamakulamya. Neryo-neryo omukali oyo mwalamibwa.

²³ Omugulu Yesu abere abihika omo nyumba yomurongani, mwalangira ababuhi bamarenga, nendeko ikabuya olukanda,

²⁴ mwabuga ati, Mulweho; kusangwa omwanamuto siaholire nikwa ari to. Nabo mobamuseka kutsibu.

²⁵ Nikwa omugulu endeko yamabihigirwa eyihya, mwingira omo nyumba mwamuhamba oko byala, na mwanamuto mwahangana.

²⁶ Nengulu yebi moyatsungana omo kihugo ekyo kyosi.

Esyondimatime ibiri

²⁷ Omugulu Yesu alaba akalwayo, esyondimatime ibiri mosyamukwama, ibakabirikira kutsibu bati, Utuganyire, oMugala wa Dawidi.

²⁸ Abere abiingira omo nyumba, esyondimatime esyo mosyamuhikako; Yesu mwabulyabo ati, Munikirirye ko nangatoka erikola eki kwehi? Mobamubwira bati, Ega, Mukama.

²⁹ Neryo mwatula oko meso wabo, ati, Rikoleke kwinywe ngoko mwikirirye.

³⁰ Neryo Ameso wabo mwalibukala. Yesu mwahanabo kutsibu ati, Mulebaye sihabye mundu akaminya eki.

³¹ Nikwa mobagenda mobatsungania engulu yiwe omo e kihugo ekyo kyosi.

Emumu

³² Nomugulu babya bakagenda, lebaya mobamuletera emumu eyiri kwesyombinga.

³³ Nembinga eyo yabere yabiguswa eyihya emumu moyabuga; nesyondeko mobasweka, bati, Eritsuka na kera sihetalolwako ekiringene neki omo Israeli.

³⁴ Nikwa abaFarisayo mobabuga bati, Akagusa esyombinga eyihya busana nomukulu wesyombinga.

³⁵ Kandi Yesu mwalendera omo miyi yosi nomo hiyi, akakangirirya omo manyumba wabo werihindana akatula engulu yowene yobwami, nerilamya amakoni gosi neriyiremwa ryosi.

³⁶ Omugulu alebaya esyondeko, Mwaganyirabo, kusangwa mobagalwa omwiluha neripanswa, ngesyombuli sitawite omulisya.

³⁷ Neryo mwabuga nabiga buwe ati, Ebyerigesa ni bingi, nikwa abagesi ni bake;

³⁸ musabe oMukama werigesa atume abagesi okwigesa riwe.