Matayo 8 - Nouveau Testament et Psaumes en Ndandi Version 1962

Omuhaga

¹ Omugulu abere abiandagala oko kitwa, esyondeko nene mosyamukwama;

² neryo lebaya omuhaga mwamuhikako, mwamukukamire, ati, Mukama, wamanza, wangatoka nerinyerya.

³ Naye mwakakya ebyala biwe mwamutulako ati, Nyanzire; were. Neryo-neryo ebihaga biwe mobyera.

⁴ Yesu mwamubwira ati, Ulebaye subwire mundu; nikwa ugende, uyikanganaye oko muhereri, uhere erihitya eryo Musa ategeka, busana neriminyisyabo.

Erikirirya inene

⁵ Omugulu ingira eKapernaumu, omukulu muguma wabasoda mwasa ahari, mwamugonga-gonga

⁶ ati, Mukama omugombe wage agotsere omu nyumba iniabasire, akagalawa kutsibu.

⁷ Naye mwabuga naye ati, Ngandiyayo inaya mulamya.

⁸ Nikwa omukulu wabasoda mwamusubirya ati, Mukama, Sinyitolere ukingira omo nyumba yage; nikwa ubuge eKinywa kisa nomugombe wage akandilamibwa.

⁹ Kusangwa nage ndi mundu wehamuli, ngwite abasoda ngategeka; ngabwira muguma nyiti, Ugende, iniagenda, nogundi nyiti, Asa, iniasa, ngabwira omugombe wage nyiti, Kola eki, akakikola.

¹⁰ Yesu abere amowa, mwasweka, mwabwira abamukwama ati, Kwenene ngabuga nenyu, sinditabana erikirirya ringana neri, kutse nomo Israeli.

¹¹ Ngababwira nyiti, bangi baswalwa eyo eryuba rikahuluka neyo eryuba rikalengera basikala na Abrahamu, na Isaka, na Yakobo omo bwami bwelubula,

¹² nikwa abagala bobwami basyaguswa omo mwirimya weyihya; aho bandu basyarira nerirya meno wabo.

¹³ Kandi Yesu mwabwira omukulu wabasoda ati, Ugende; ukolerawebyo ngoko wabiriikirirya. Nomugombe mwalamibwa oko katambi ako.

Nyinyi-byala wa Petero

¹⁴ Yesu abere abiingira omo nyumba ya Petero, mwalangira nyinyi-byala wuwe iniagotsere nerihuhana;

¹⁵ mwamutulya kwe byala, nerihuhana moryamulwako, mwahangana mwamutsumbira.

¹⁶ Omwigolo-golo eryo mobamuletera bangi abari kwesyombinga; mwagusa esyombinga syoyihya omo kinywa kisa, mwalamya abosi ababya balwere.

¹⁷ Bibererere ebyabugawa nomuminyereri Isaya ati, Mwatwala eriyiremwa ryetu mwaheka nesyondwala syetu.

Erikwama Yesu

¹⁸ Nikwa omugulu Yesu alangira esyondeko nene simutimbireko, mwategeka ati basokere eyisirya.

¹⁹ Nomusaki muguma mwamuhikako mwamubwira ati, Mukangirirya, ngandikukwama ehosi ukaya.

²⁰ Yesu mwamubwira ati, Esyoboha siwite ebyuna, nesyonyonyu syomo kyanya siwite esyonyutu; nikwa oMugala womundu siawite aherihira omutwe wuwe.

²¹ Nogundi woko biga mwabuga naye ati, Mukama, uleke natayata tata.

²² Nikwa Yesu mwamubwira ati, Ungwame, uleke abaholi bate abaholi babo.

Erikunga engetsi

²³ Abere abiingira omo bwato, abiga buwe mobamukwama.

²⁴ Neryo lebaya, eKihunga kinene mokyahuluka omo ngetsi, nobwato mobwasonda eritobera busana nebisunda; nikwa iye iniayire to.

²⁵ Nabo mobaya mubukya bati, Utulamaye Mukama; tukahwa.

²⁶ Naye mwabuga nabo ati, Mukubaha busana naki, inywe bandu berikirirya ike kwehi? Neryo mwahangana mwakunga ekihunga nengetsi; mohabya eriyibombeka inene.

²⁷ Na bandu mobasweka, bati, Oyu ni mundu musindoki kwehi? kusangwa ekihunga nengetsi bikamowa.

Abesyombinga

²⁸ Neryo omugulu ahika eyisirya, omo kihugo kyaBagerase, abesyombinga babiri mobahindana naye, ibakalwa omo masinda, ibakalire isihari mundu wangalaba omo nzira eyo.

²⁹ Neryo lebaya, mobalaka bati, Uri naki kwitwe, Uwe Mugala woMungu, kwehi? Wamasa eno eritwagalya emuliro womugulu kwehi?

³⁰ Nikwa habya ekihyo kyesyongurube nyingi sikarira hali hake kubo.

³¹ Esyombinga mobyamugo-ngagonga siti, Wamatugusa eyihya, ututume omo kihyo kyesyongurube.

³² Naye mwabuga nasyo ati, Mugende. Nasyo mosyalwamo mosyaya omo syongurube esyo; neryo lebaya, ekihyo kyosi mokyatibita ahasenzegerere mosyahika omo ngetsi, mosyaholera omo magetsi.

³³ Na barisya mobatibita, mobingira omo muyi mobatula ebyosi, nebya abalwe kwesyombinga.

³⁴ Kandi lebaya, omuyi gosi mobasa erihindana na Yesu; neryo babere babimulolako, mobamugonga-gonga bati alwe omo kihugo kyabo.