Matayo 6 - Nouveau Testament et Psaumes en Ndandi Version 1962

Eriha erihitya

¹ Muyitegaye simuyire obugenge bwenyu emuliro wabandu erilolwako nabo; kusangwa mwamayira mutya simuri nolu hembo luku Tata wenyu oyuri elubula.

² Nibya omugulu ukahitaya, subuhe engubi emuliro wawe, nga batebya ko bakakola omo manyumba werihindana nomo syombalu, bati basimawe nabandu. Kwenene ngabuga nenyu, bawite oluhembo lwabo.

³ Nikwa omugulu ukahitaya, ebyala bwaye byamalembe sibiminye ekyo ebyala byamali bikakola,

⁴ erihitya ryawe ribye bubi-sobiso; na Tata wawe oyu kalebaya bubi-sobiso asyakuhemba.

Erisaba

⁵ Nomugulu mukasaba, isimwabya nga batebya; kusangwa banzire eriimana nerisabira omo manyumba werihindana nomo ngonde yesyombalu, bati balolaweko nabandu. Kwenene ngabuga nenyu, banawite oluhembo lwabo.

⁶ Nikwa omugulu ukasaba, wingire mo kisenge kyawe ukinge oluyi usabe Tata wawe oyuri bubi-sobiso; na Tata wawe oyu kalangira bubiso biso asyakuhemba.

⁷ Nenyu omugulu mukasaba simusube omo binywa bityabitya kandi nakandi ngoko Ebihanda bikakola; kusangwa bakaganiraya basyogubwa busana nebinywa byabo bingi.

⁸ Simubye ngabo, kusangwa Tata wenyu anasi ebibari bwaga isimwemwamusaba.

⁹ Musabe mutya muti: Tata wetu oyuri elubula, Erina ryawe riyirawe mo ribuyirire.

¹⁰ Obwami bwawe bwase, Erisonda ryawe riyirawe, Omo kihugo ngoko riri omo lubula.

¹¹ Utuhe munabwire obundu bwetu bwekirokiro;

¹² Utubuyire emyinda yetu. Ngoko netu tukabuyira abari kwemyinda yetu;

¹³ Sutulete omwilengwako, Nikwa utulamaye oko kibi. Kusangwa obwami ni bwawe, Na kagala nolukengerwa, Na kera na kera. Bibye bitya.

¹⁴ Kusangwa mwamabuyira abandu kwa malolo wabo, Tata wenyu welubula asyababuyira;

¹⁵ nikwa mwamatindabuyira abandu amalolo wabo, Tata wenyu naye siendisyababuyira amalolo wenyu.

Eritsira

¹⁶ Kandi omugulu mukatsira akaryo, simubye nobusu bwengitsi, nga batebya, kusangwa bakatsandaya amasu wabo bati balolaweko nabandu. Kwenene, ngabuga nenyu, banawite oluhembo lwabo.

¹⁷ Nikwa omugulu ukatsira karyo, uhakabaye omutwe wawe gwamauta unabe omo busu bwawe,

¹⁸ eritsira ryawe sirilolaweko nabandu nikwa nina Tata wawe oyuri bubi-sobiso; na Tata wawe oyu kalebaya bubi-sobiso asyakuhemba.

Eribika ebindu

¹⁹ Simuyibikire ebindu mona kihugo, aho ehinyurugunzu namakenge bikaheraya naho abarahi bakatula ibiba,

²⁰ nikwa muyibikire ebindu elubula, aho ebinyurugunzu kutse amakenge siariheraya naho abarahi sibetula neriiba.

²¹ Kusangwa ahari ebindu byawe, ho mutima wawe akabya.

²² Oluseke lwomubiri rye riso. Eriso ryawe ryamuwana, omubiri wawe gosi asyusula nekyakakala;

²³ nikwa eriso ryawe ryamabya ritowene, omubiri wawe gosi asyusula nomwirimya. Neryo ekyakakala omwisi wawe kyamabya mwirimya, omwirimya oyo ni mungi!

²⁴ Sihari oyo wangakolera abakama babiri; kusangwa asyakwa muguma ekiniga inianza ogundi, kutse asyabegera oko muguma neripona ogundi. Simwangatoka erikolera Mungu nebindu.

²⁵ Neryo ngababwira nyiti, simubye namaganiryo busana nengebe yenyu muti mwasyaryaki kutse mwasyapulyaki, kutse busana nomubiri wenyu nga mwasyambalaki. Engebe silabire karyo, nomubiri sialabire esyongimba kwehi?

²⁶ Musamalire esyonyonyu syomo kyanya; sisyebiba kutse erigesa kutse erihunika omo mbiso, nikwa Tata wenyu welubula akarisayasyo. Simuri benzwere eyilengiresyo kutsibu kwehi?

²⁷ Kandi nindi kwinywe busana na maganiryo angatoka eritomeka emituta yengebe yiwe kolulengero luguma kwehi?

²⁸ Kandi busana naki mukabya na maganiryo busana nesyongimba kwehi? Muganiraye ebirangaranga byomoli, ngoko bikalasa; sibyehinga kutse eriluka;

²⁹ nikwa ngababwira nyiti, Solomono omo lukengerwa luwe losi siabya ambite ebiringene nge kiguma kyebi.

³⁰ Nikwa Mungu amabya akambalaya ebiti byomoli atya, ebiriho lino nomungyakya bikagusawa omo riko, siendisyabambalya kwilaba aho, inywe bandu berikirirya ike kwehi?

³¹ Neryo simubye namaganiryo, muti, Twasyaryaki kwehi? kutse Twasyapulyaki kwehi? kutse twasyambalaki kwehi?

³² Kusangwa Ebihanda bikasonda-sonda emyatsi eyi yosi; na Tata wenyu welubula anasi ebyosi ebi ebibari bwaga.

³³ Nikwa mutsuke erisonda-sonda obwami buwe neritunganene riwe, nemyatsi eyi yosi yasyabya yenyu nibya.

³⁴ Kandi simubye na maganiryo busana nomongyakya, kusangwa mongyakya yasyabya namaganiryo wayo. Amalige wekiro kiguma abye angaho busana nekiro ekyo.