Matayo 5 - Nouveau Testament et Psaumes en Ndandi Version 1962

Eritulago oko kitwa

¹ Abere alangira esyondeko, mwahetukira oko kitwa, abere abikala abiga buwe mobahika hari.

² Neryo mwakumbula obuno buwe mwakangiriryabo ati:

³ Omuyisa ari nabera omo kirimu, kusangwa obwami bwelubula ni bwabo.

⁴ Omuyisa ari nabo bakarira, kusangwa basyasibikibwa.

⁵ Omuyisa ari na bomutima molo, kusangwa basyarya e kihugo mo mwandu.

⁶ Omuyisa ari nabakwire enzala nenyota busana neritunganene, kusangwa basyagutibwa.

⁷ Omuyisa ari nabakagenyera, kusangwa basyabana erigenyerwa.

⁸ Omuyisa ari nabomutima mubuya, kusangwa basyalola oko Mungu.

⁹ Omuyisa ari nabakayira obuholo, kusangwa basyabirikirwa mo bagala boMungu.

¹⁰ Omuyisa ari nabo abakendereribawa busana neritunganene, kusangwa obwami bwelubula ni bwabo.

¹¹ Omuyisa ari nenyu omugulu bandu basyabatsuma neribendererya neribuga emisindo yosi yebibi busana nenyu namabihi busana nage.

¹² Mutseme, mutsange kutsibu, kusangwa ebihembo byenyu ni binene elubula, kusangwa ko banendereraya abaminyereri batya ababya emuliro wenyu.

Omunyu nekyakakala

¹³ Muri munyu we kihugo; nikwa omunyu amatalya obusi bwago, obusi bwago ibwasyasubibwa mugo mobuti kwehi? isiyowene busana nekindu, rye neriguswa eyihya neriryatangirirwa omwisi we bisandu byabandu.

¹⁴ Muri ekyakakala kye kihugo. Omuyi ahirirwe oko kitwa siangatoka eribisama.

¹⁵ Kutse abandu sibeakaya oluseke bakahiralo omwisi wekitiri, nikwa oko kikahamba oluseke, ilwakolerya abosi bari omo nyumba.

¹⁶ Muleke oluseke lwenyu lukoleraye embere syabandu, balangire emibiri yowene yenyu bapipe Tata wenyu oyuri elubula.

Ehamuri ya Yesu ilabire ebihano

¹⁷ Simuganiraye muti nasa erilusya ebihano nabaminyereri; sinasa erilusyabyo nikwa eriberereryabyo.

¹⁸ Kusangwa kwenene, ngabuga nenyu, erihika aho elubula ne kihugo byasyalengera, sihari akakwarari, nakatondi, ebikandisyalwa oko bihano erihika aho ebyosi byasyabererera.

¹⁹ Nikwa oyu kaketa ekiguma kyebihano ebi bike nerikangirirya abandu atya, asyahulwa mo muke kutsibu omo bwami welubula; nikwa oyu kakolabyo nerikangiriryabyo asyahulwa mo mukulu omo bwami bwelubula.

²⁰ Kusangwa ngababwira, nyiti, eritunganene ryenyu ryamatindalaba eryabasaki na baFarisayo, simwendisingira na hake omo bwami bwelubula.

Isiwita

²¹ Mwabiriowa ekyabugawa nabandu bakera, bati Susita: noyu kita ryangaleka iniatswerwa lubi.

²² Nikwa ngababwira nyiti, oyu kahitana ku mugala wabo ryasyaleka iniatswerwa olubi; noyu wasyatsuma mugala wabo ati, uwe mbulamugasu ryasyaleka iniahika oko batsweri, noyu kabuga ati, uwe kikiru! ryasyaleka iniaya omo muliro wekulimu.

²³ Neryo wamaha erihitya ryawe aheriherera, neyo wamibuka mugala wenyu ari nomwatsi kuwe,

²⁴ usiganaye erihitya ryawe embere syaheriherera ugende; utsuke erisangana na mugala wenyu, neryo iwasa uhe erihitya ryawe.

²⁵ Usangane luba nomutsongeri wawe, mukinagenda okwibugiro, omutsongeri wawe siakuhe oko mutsweri, nomutsweri iniakuha oko musoda, neryo iwaguswa omo nyumba yomuliki;

²⁶ kwenene, ngababwira, siwendisyalwamo na hake utewabiriha esenge yenyumanyuma.

Isiwasingira

²⁷ Mwabiriowa ngoko kyabugawa kiti, Susyesingira.

²⁸ Nikwa ngababwira nyiti, oyu kalangira omukali nengumbu nyibi iniamabimusingira omo mutima wuwe.

²⁹ Eriso ryawe ryamali ryamaleka ukakola ebibi, ukureryo uguseryo hali; ryowene kuwe ekitsuko kiguma kyawe erihera kwilaba omubiri wawe gosi eriguswa omo muliro wekulimo.

³⁰ Nebyala byawe byamali byamaleka ukakola ebibi, utwebyo ugusebyo; ryowene ukuwe ekitsuko kiguma kyawe erihera kwilaba omubiri wawe gosi eriya omo muliro wekulimo.

³¹ Kandi mokyabugwa ambu, Oyu wasyakomola omukaliwe, amuhe engomolo yerimuhiga.

³² Nikwa ngababwira nyiti, oyu kakomola omukahwe, butsira busana nerisingira, akamuyira mo musingiri; noyu kahikaya oyu riakomolawa iniamasingira.

Isiwalahiraya

³³ Kandi mwabiriowa ko kyabwirawa bandu bakera kiti, Susyelahiraya na mabihi, nikwa wasyakola oko Mukama ebyo walahiriraya.

³⁴ Nikwa ngababwira, nyiti, Sulahiraye na hake, kutse nelubula, kusangwa ni kitumbi kyobwami kyoMungu,

³⁵ kutse ne kihugo, kusangwa ni kitumbi kyebisandu biwe, kutse neYerusalema, kusangwa ni muyi woMwami mukulu.

³⁶ Susyelahiraya nomutwe wawe, kusangwa siwangatoka eriyira oluywiri luguma mo lwero kutse lwiragulu.

³⁷ Nikwa ebyo mukabuga bibye Ega, Ega, kutse eyihi, eyihi; ebirengire ebi bikalwa oko bibi.

Erianza esyonzigu

³⁸ Mwabiriowa ngoko kyabugawa kiti, Eriso busana neriso nerina busana nerina.

³⁹ Nikwa ngababwira nyiti, Simulwe nomundu mubi. Nikwa omundu amakuswirya oko ritema ryamali, umubindulire erindi;

⁴⁰ nomundu amakutsongera amaheka ekanzu yawe umusigire nolukimba lwawe;

⁴¹ omundu amakuhatikana erigenda naye kilometre kiguma, ugende naye nekyakabiri.

⁴² Uhe kwoyu kakusaba, sugane eribweka oyu kayibweka kuwe.

⁴³ Mwabiriowa ngoko kyabugawa kiti, Wanze mulikyenyu ukwe enzigu yawe ekiniga.

⁴⁴ Nikwa ngababwira nyiti, Mwanze esyonzigu syenyu musabire abakabendereraya,

⁴⁵ imwatoka eribya abagala baTata wenyu oyuri elubula; kusangwa akahanganaya eryuba riwe oko babi noko babuya, akatuma embula oko batunganene noko batatunganene.

⁴⁶ Kusangwa mwamanza ababanzire mwasyahembwaki kwehi? Abasolesya sibekola batya kwehi?

⁴⁷ Mwamabukya abagala benyu basa, mukakola ebilengire abandi byahi kwehi? Ebihanda nabo sibekola batya kwehi?

⁴⁸ Nenyu mubye abahikene, ngoko Tata wenyu welubula ahikene.