Matayo 4 - Nouveau Testament et Psaumes en Ndandi Version 1962

Erilengwako rya Yesu

¹ Neryo Yesu mwasondolibwa neKirimu omo mbwarara erilengwako na Satani.

² Mwatsira akaryo amatungi makumi ani nebiro makumi ani, nenyuma waho mwakwa enzala.

³ Nomutebya mwasa mwamubwira ati, Wamabya uri Mugala woMungu, utegeke amabwe aya abye amandu.

⁴ Nikwa mwamusubirya ati, Kisakire kiti, Omundu siaribyaho busana nobundu busa, nikwa busana noburi kinywa kikalwa omo buno bwoMungu.

⁵ Kandi Satani moyamutwala oko muyi abuyirire, moyamuhira oko mukuto wehekalu,

⁶ mwabuga naye ati, Wamabya uri Mugala woMungu uyiguse ahisi; kusangwa kisakire kiti, Asyaha abamalaika buwe ehamuli busana nawe, eriku teya, kandi, Noko byala byabo basyakubagarira, Isiwahuma ekisandu kyawe okwibwe.

⁷ Yesu mwabuga naye ati, Kandi kisakire kiti, Susyelenga oko Mukama Mungu wawe.

⁸ Kandi, Satani moyamutwala oko kitwa kirikiri kutsibu, moyamukangya amami gosi we kihugo kino nolukengerwa lwago; moyabuga naye iti,

⁹ Ebyosi ebi nasyakuhabyo, wamagwa ahisi neringukamira.

¹⁰ Yesu mwasubiryayo ati, Lwaho, Satani! kusangwa kisakire kiti, Wasyakukamira Mukama Mungu wawe, kandi wasyamukolera iyowene.

¹¹ Neryo Satani moyamusigania, neryo lebaya, abamalaika mobasa erimukolera.

Yesu mwikala eKapernauma

¹² Neryo omugulu owa ko Yoane abiribohwa, mwayilwiraho mwaya eGalilaya;

¹³ nerilwa eNazareti mwayikala eKapernaumu hakuhi nengetsi, omo kihugo kya Zebuluni neNafutali,

¹⁴ ebyabugawa nomuminyereri Isaya ibyatoka eriberera biti:

¹⁵ E kihugo kya Zebuluni ne kihugo kye Nafutali, Obwanga bwengetsi, eyisiria weYorodani, Galilaya yeBihanda—

¹⁶ Abandu abikere omo mwirimya Babirilangira oluseke lunene, Busana nabo bikere omo kihugo nomo kitsutsu kyoluholo Ekyakakala kyamakolerya.

¹⁷ Eritsuka oko mugulu oyo Yesu mwatsuka eritulago ati, Mubinduke, kusangwa obwami bwelubula buri hakuhi.

Abiga aberimbere

¹⁸ Abere akalendera oko luhande lwe Ngetsi ya Galilaya, mwalola oko ababutirwe haguma babiri, Simoni oyo kahulawa mo Petero na Anderea mugala wabo, bakagusa ekisohi kyomo ngetsi; kusangwa babya basohi.

¹⁹ Mwabuga nabo ati, Munyikwame, ngandisyabayira mo basohi babandu.

²⁰ Neryo-neryo mobasiga ebisohi byabo mobamukwama.

²¹ Neriyitunda embere mwalangira abandi babutirwe haguma babiri, Yakobo mugala wa Zebedayo na Yoane mugala wabo, ibane mo bwato haguma na tata wabo Zebedayo, bakalanda ebisohi byabo, neryo mwabirikirabo.

²² Neryo-neryo mobasiga obwato nise wabo, mobamukwama.

Yesu eGalilaya

²³ Kandi mwatimbatimba eGalilaya hosi, erikangirirya omo manyumba wabo werihindana neritula engulu yowene yobwami nerilamya esyondwala syosi namakoni gosi omukati-kati kabandu.

²⁴ Kandi engulu yiwe moyatsungana eSiria hosi, kandi mobamuletera abakoni bosi, abagalawa omo misindomisindo yesyondwala namagali, nabari kwesyombinga, neba tutsa, nababasire, mwalamyabo.

²⁵ Nesyondeko nene mosyamukwama erilwa eGalilaya neDekapoli neYerusalema ne Yudea neyisiria oko Yorodani.