Matayo 3 - Nouveau Testament et Psaumes en Ndandi Version 1962

Yoane Mubatisa

¹ Omo biro ebyo Yoane Mubatisa mwahika, akakangirirya omo mbwarara yeYudea ati,

² Mubinduke, kusangwa obwami bwelubula buri hakuhi.

³ Kusangwa yoyo wahulawa nomuminyereri Isaya omugulu abuga ati, Omulenge oyu kabirikira omo mbwarara: Mukokotaye enzira yoMukama, Mutungananaye esyombalu siwe.

⁴ Yoane abya ambite olukimba lwobweya bwengamia, nomukoba wengobi omo mbindi yiwe; nakaryo kuwe kabya esyongike nobuki bwomoli.

⁵ Yerusalema neYudea ne kihugo kyosi ekihererenie neYorodani mobaya ahari,

⁶ mobabatisibwa naye omo lusi lwaYorodani, ibanemokangya ebibi byabo.

⁷ Nikwa omugulu alangira abaFarisayo na baSadukayo erihika okwibatisya, mwabuga nabo ati, Inywe bana besyonzoka! Ni ndi wabasagisaya okwisaga erikarama rikandisyasa kwehi?

⁸ Mubute ebiguma ebitolere eribinduka,

⁹ simuganiraye eriyibwira muti, Tuwite Abrahamu yo tata wetu; kusangwa ngababwira nyiti, Mungu angatoka eribindulira Abrahamu yabana omo mabwe aya.

¹⁰ Na lino embasa ikirye oko murihi wemiti; oburi muti owatebuta ebiguma byowene akakondawa ahisi iniaguswa oko muliro.

¹¹ Ngababatisaya omo magetsi busana neribinduka, nikwa oyu kasa enyuma kwingye andengirye kagala, sinyitolere eriheka esyongendero siwe; asyababatisya neKirimu Kibuyirire nomo muliro.

¹² Olugare luwe luri omo byala biwe, asyabirya ekibuga kiwe nerihindanya enganu yiwe omo mbiso, nikwa omusunga asyahisya go omo muliro owatehombera.

Eribatisibwa rya Yesu

¹³ Neryo Yesu mwalwa eGalilaya mwasa oko Yorodani ku Yoane eribatisibwa naye.

¹⁴ Nikwa Yoane asonda erimuganisya ati, Ingye nyitolere iwanyibatisya nawe ukanyihikako kwehi?

¹⁵ Nikwa Yesu mwamusubirya ati, Unyiligire eribya litya lino; kusangwa ritolere itwaberererya ebitunganene byosi. Neryo mwamuligira.

¹⁶ Neryo omugulu Yesu amabibatisibwa, neryo-neryo mwalwa omo magetsi, lebaya, elubula molwakingukala naye mwalebya eKirimu kyoMungu kikandagala nga kalikuku, nerimwikirako;

¹⁷ kandi lebaya, omulenge mwalwa elubula ati, Oyu ni Mugala wage mwanze, namatsemesibwa omwisi wuwe ndeke.