Matayo 26 - Nouveau Testament et Psaumes en Ndandi Version 1962

Embita yeritsimba Yesu

¹ Yesu abere abibuga ebinywa ebi, mwabwira abiga buwe ati,

² Munasi enyuma webiro bibiri eRikiruka rikahika, noMugala womundu asyahoterwa eribambwa.

³ Neryo abahereri bakulu nabakulu babandu mobahindana omo muhana womuhereri mukulu, oyo wahulawa mo Kayafa,

⁴ mobaya embita yeritsimba Yesu bubi-sobiso nerimwita.

⁵ Nikwa moba buga bati, Butsira omo kiro kinene kyerirya, sihatwike isesi omukati-kati kabandu.

Yesu muturirwa kwa maguta

⁶ Nikwa omugulu Yesu abya eBetania omo nyumba ya Simoni muhaga,

⁷ omukali mwamuhikako iniawite okwitambya ryamaguta gobuguri bunene, mutago oko mutwe wuwe, anikere akarya.

⁸ Nikwa omugulu abiga balangira, mobahitana, bati, Amahera bosa busana naki kwehi?

⁹ Kusangwa amaguta aya angaguribwe esyofaranka nyingi isyahabwa abera.

¹⁰ Nikwa Yesu, mwiminya ebyo, mwabuga nabo ati, Busana naki mu kendereraya omukali kwehi? Kusangwa abirinyikolera ekindu kibuya.

¹¹ Kusangwa muri nabera ebiro byosi, nikwa simuri nage ebiro byosi.

¹² Eriuta amaguta aya oko mubiri wage abirikolakyo erinyisuga busana nerita.

¹³ Kwenene, ngabuga nenyu, aho engulu yowene eyi yasyatulwa omo kihugo kyosi, ekyo abirikola kyasyabugwa busana nerimwibuka.

Yuda Iskariota

¹⁴ Neryo muguma werikumi na babiri, oyu kahulawa mo Yuda Iskariota, mwaya oko bahereri bakulu

¹⁵ mwabuga ati, Mwasyambaki namabahaye kwehi? Nabo mobamulengera ebihande byebitsipa amakumi asatu.

¹⁶ Eritsuka oko endambi eyo mwasondya omwanya werimuhotera.

Erikiruka

¹⁷ Nikwa oko kiro kyeritsuka kyoBundu bute moKihamya abiga mobahika oko Yesu, bati, Wanzire itwakokotya busana nawe aheririra ryerikiruka ho hahi kwehi?

¹⁸ Naye mwabuga ati, Mugende omo muyi oko walebe, mumubwire muti, OMukangirirya ati, Endambi yiwe iri hakuhi; omo nyumba yawe mwakandirira erikiruka haguma na biga biwe.

¹⁹ Abiga mobakola ngoko Yesu ategekabo, mobakokotya erikiruka.

²⁰ Erigologolo ryabere ryabihika, mwikala okwirya haguma nabiga erikumi na babiri;

²¹ nabo babere bakarya, mwabuga ati, Kwenene ngabuga nenyu, muguma gokwinywe akandinyi hotera.

²² Nabo mobabya nobulige kutsibu, mobatsuka eri mubulya muguma muguma, bati, Mukama ni Ingye kwehi?

²³ Naye mwasubirya ati, Oyo wabirikolerya ebyala biwe omo kisya haguma nage, akandinyihotera.

²⁴ OMugala womundu akagenda ngoko kisakire busana naye, nikwa obulige oko mundu oyo kahotera oMugala womundu! Ryabya ryowene busana naye kumbe siabutawa.

²⁵ Yuda, oyo wamuhotera, mwabuga ati. Ni ingye Mukama kwehi? Naye mwabuga, ati, Wamabibuga.

²⁶ Nikwa omugulu babere bakarya, Yesu mwimya obundu, mwatsumulabo, mwatwabo, mwahabo abiga, ati, Mwimaye, murye; oyu ni mubiri wage.

²⁷ Kandi mwimya olutehi, abiha ewasingya mwahalobo, ati, Mupulaye kulo inywe bosi;

²⁸ kusangwa oyu ni musasi wage werilagana rihya, owakutawa busana na bangi busana nerilusya ebibi.

²⁹ Nga babwira sindiendisyapulya kandi oko biguma byebinyu erihika oko kiro ekyo nasyapulyabyo bihyabihya haguma nenyu omo bwami bwaTata wage.

³⁰ Babere babiimba olwimbo, mobaya oko kitwa kye Mizeituni.

³¹ Neryo Yesu mwabuga nabo ati, Inywe bosi mukandinyi tswako oko kiro eki; kusangwa kisakire kiti, Nasyaswirya omulisya, nesyombuli esyomo kihyo syasyapanzwa.

³² Nikwa nasyabya nabilubukibwa, nasyabatsuka eriya eGalilaya.

³³ Petero mwabuga naye ati, Nomo abosi basyatswa busana nawe, ingye sindiendikutswako.

³⁴ Yesu mwabuga naye ati, Kwenene ngabuga nawe, omo kiro eki kyamunabwire, engoko lume iteyabika, ukandinyigana engendo isatu.

³⁵ Petero mwa mubwira ati, Nomo kyanganyiletera erihola haguma nawe, sindiendikugana. Nabiga bosi mobabuga batya.

Getesemane

³⁶ Neryo Yesu mwagenda nabo ahakahulawa mo Getese mane, mwabwira abiga biwe ati, Mwikale hano, omugulu ngaya harya ngayasaba.

³⁷ Mwatwala Petero na bagala ba Zebedayo babiri, mwatsuka eribya nobulige nerihahukya omu tima kutsibu.

³⁸ Neryo mwabuga nabo ati, Omutima wage amabya nobulige kutsibu, bukanyita; musigale hano, mutegaye haguma nage imunalolire.

³⁹ Mwasegera embere hake mwagwa oko busu buwe mwasaba ati, Tata, kyamatokekana, olutehi olu unyilabayeloko; nikwa butsira ngoko nyanzire, nikwa ngoko wanzire.

⁴⁰ Mwasuba ahari abiga mweyabo ibane to; mwabuga na Petero ati, Kwehi simwetatoka eriteya haguma nage imuna lolire endambi nenguma kwehi?

⁴¹ Mutegaye imunalolire kandi musabe imutingira okwilengwako; ekirimu kyanzire, nikwa omubiri ni molo.

⁴² Kandi, engendo ya kabiri mwaya saba ati, Tata wage, olu lwamatindatokekana erinyilabako ngatindapulyalo, erisonda ryawe rikolawe.

⁴³ Kandi mwasa mweyabo ibane to, kusangwa ameso wabo iniaritoherere.

⁴⁴ Mwasigabo kandi atya, mwaya saba engendo ya kasatu, mwasuba omo binywa ebyo.

⁴⁵ Neryo mwahika oko biga mwabuga nabo ati, Mukine to mukinaluhuka kwehi? Lebaya, endambi yamahika, oMugala womundu amahoterwa omo byala bya bakola nabi.

⁴⁶ Muhangane, tubye tukagenda; mulebaye oyu kanyihotera amahika.

Eritsimba Yesu

⁴⁷ Omugulu akinabuga, Yuda, muguma ogo kwikumi na babiri, mwasa haguma na kilondokilondo kinene haguma nemiyari namahumo, bakalwa oko bahereri bakulu nabakulu babandu.

⁴⁸ Nikwa muhoteri iniamabihabo ekiminyikalo, ati, Oyo ngandiryatsirira, iniye; imwamutsimba.

⁴⁹ Neryo-neryo mwahika uku Yesu mwabuga ati, Wabukire Mukama! Mwa muryatsirira.

⁵⁰ Yesu mwabuga naye ati, Uryasiraki kwehi? Neryo mobahika mobahira ebyala uku Yesu mobamutsimba.

⁵¹ Neryo lebaya, muguma oko babya na Yesu mwakakya ebyala biwe mwakula omuyari, mwabanda omukobe womuhereri mukulu, mwatwa okutu kuwe.

⁵² Neryo Yeru mwabuga naye ati, Subaya omuyari omo lubo lwago; kusangwa abosi abaka wata oko muyari basyahera omo muyari.

⁵³ Mukaganiraya muti sinangatoka erilakira Tata wage, inianyitumira abamalaika kwilaba amaelfu erikumi na babiri kwehi?

⁵⁴ Nikwa lino amasako angabererera ati, byamabya ikobitolere eribya bitya kwehi?

⁵⁵ Oko ndambi eyo Yesu mwabuga nesyondeko ati, Mwabiriasa ngabakahamba omunyeyi, munawite ko miyari namahumo erinyihamba kwehi? Ekiro nekiro monikala omo hekalu ngakangirirya, momutanyihamba.

⁵⁶ Nikwa ebi byosi byabiribya amasako wabaminyereri atoke eribererera. Neryo abiga bosi mobamutswako mobatibita.

Yesu emuliro waKayafa

⁵⁷ Neryo abatsimba Yesu mobamutwala ku Kayafa omu hereri mukulu, aho basaki na bakulu babya bahindene.

⁵⁸ Nikwa Petero mwamukwama inianakengehere, mwahika omo muhana womuhereri mukulu, neryo mwingira mwikala haguma nabateya erilola oko nduli yomwatsi.

⁵⁹ Nikwa abahereri bakulu nabo mwibugiro mobasonda eritula ebyamabihi uku Yesu ibatoka erimwita,

⁶⁰ nikwa mobabulabyo, nomo hanasa abatuli bamabihi bangi. Nenyumanyuma mohasa babiri

⁶¹ bati, omundu oyu mwabuga ati, Nangatoka eriherya hekalu yoMungu, neriswahimbayo oko biro bisatu.

⁶² Omu hereri mukulu mwahangana mwabuga ati, Suwite ekyo wanga subya kwehi? Ebi ni byahi aba bakakuhandikirira kwehi?

⁶³ Nikwa Yesu mwabya bukutu, Omuminyereri mukulu mwa­mubwira ati, Ngakusema busana noMungu oyu riho, utubwire wamabya une Kristo, Mugala woMungu.

⁶⁴ Yesu mwabuga naye ati, Wabiribuga. Nikwa ngababwira nyiti, Enyuma webi mwasyalangira oMugala womundu inikere oko byala byamali byaMaka neriasa oko bitu byelubula.

⁶⁵ Neryo omuhereri mukulu mwasatangya esyongimba siwe, ati, Abiritsuma. Busana naki tukine nobwaga bwabalangiri kwehi? Langira, mwamabiowa eritsuma riwe.

⁶⁶ Mwamaganirya mutiki kwehi? Mobasubirya bati, Atolere oluholo.

⁶⁷ Neryo mobatwira ebi tande omo busu buwe, mobamuswirya esyongunyo; nabandi mobamuswirya ebikundi,

⁶⁸ bati, Utuminyerere, uwe Kristo! Nindi wamakuswirya kwehi?

Erigana rya Petero

⁶⁹ Nikwa Petero inianikere eyihya omo muhana. Omukondo mwamuhikako ati, Nawe ulwe haguma na Yesu muGalilaya.

⁷⁰ Nikwa mwaganakyo embere syabo bosi, ati, Sinyasi ebyo ukabuga nga ni byahi.

⁷¹ Neryo abere aya eyihya oko ndambi yenyumba, ogundi mwanamuto mwamulolako, mwabwira ababya bimeneho ati, Omundu oyu abya na Yesu wa Nazareti.

⁷² Kandi mwagana nerilahirya ati, Sinyasi omundu oyo.

⁷³ Enyuma wakatambi kake ababya bimeneho mobahika moba bwira Petero bati, Kwenene nawe uri muguma wakubo, kusangwa emibugire ikakuminyikalaya.

⁷⁴ Neryo mwatsuka eriyisema nerilahirya ati, Sinyasi omundu oyo. Neryo-neryo engoko lume moyabika.

⁷⁵ Neryo Petero mwibuka eKinywa Yesu abuga ati, Engoko lume iteyabika, ukandinyigana ngendo isatu. Kandi mwahulukira eyihya mwarira nobulige.