Matayo 2 - Nouveau Testament et Psaumes en Ndandi Version 1962

Abamenge

¹ Omugulu Yesu abutirawa oko Betelehemu weYudea omo biro byomwami Herode, lebaya, abandu bamenge bakalwa oko luhande lweyo eryuba rikahuluka mobahika eYerusalema, mobabuga bati,

² ari hahi oyo wabutawa mo mwami wa baYuda kwehi? Kusangwa twabirilola oko ngununu yiwe eyo ryuba rikahuluka, twabiriasa erimukukamira.

³ Omwami Herode abere owa eki, mwahangahangya, nabomo Yerusalema bosi haguma naye;

⁴ nerihindania abahereri bakulu nabasaki babandu, mwabulyabo aho Kristo angabutirwa.

⁵ Mobamubwira bati, Omo Betelehemu ya Yudea; ngoko kisakire nomuminyereri ati:

⁶ Nawe Betelehemu, omo kihugo kyaYuda, suri muke na hake omukati-kati ka barongani ba Yuda; Kusangwa ukuwe ho hasyahuluka omurongani Oyo wasyarisya abandu bage Israeli.

⁷ Neryo Herode mwabirikira abamenge bubi-sobiso mwaminyira kubo omugulu engununu yahuluka;

⁸ mwatumabo eBetelehemu, ati, Mugende musonde kutsibu busana nomwana oyo, mwamabimubana mwasyambwira, nage inatoka eriya mukukamira.

⁹ Nabo babere babiowa omwami mobagenda; neryo lebaya, engununu eyo balolako eyo eryuba rikahuluka moyagenda embere syabo, erihika aho yahangana endata kwaho mwana abya.

¹⁰ Omugulu babere babilangira engununu mobabuyahirwa kutsibu, nobutseme bunene;

¹¹ neriya omo nyumba mobalola oko mwana haguma na Maria nyinya wuwe, mobagwa ahisi erimukukamira. Neryo, mobasengula ebindu byabo mobamuha erihitya, zahabu, na uvumba na manemane.

¹² Nomugulu bamabisagisibwa omwilota sibasube ewaHerode, mobasuba ewabo omo yindi nzira.

Erisayira eMisiri

¹³ Nikwa omugulu bamabigenda, lebaya omulaika woMukama mwabutukira Yosefu omo nzoli, ati, Hangana wimaye omwana nenyinya wuwe, usagire eMisiri, ubyeyo aho nasyakubwirira; kusangwa Herode akandisonda-sonda omwana, erimuherya.

¹⁴ Naye mwahangana mwimya omwana nenyinya omo kiro, mwagenda eMisiri,

¹⁵ mwikalayo erihika okwihola rya Herode. Eki kyabya eriberererya ekyabugawa noMukama omwisi womuminyereri ati, Nasyabirikira omugala wage erilwa eMisiri.

Eriitwa rya bana

¹⁶ Neryo Herode, abere alebya kwatebawa nabandu ba menge, mwakarama kutsibu, mwatuma neriita abana bobulume bosi eBetelehemu nomo mitano yosi yayo ababya bemituta ibiri nabatebabugayo, ngo mugulu aminyira oko bamenge.

¹⁷ Neryo mokyabererera ekyabugawa nomuminyereri Yeremia ati:

¹⁸ Omulenge mogubwa eRama, Eririra nerisusumana rinene, Raele akarira busana nabana buwe; Mwagana erisibikibwa, kusangwa sibakiriho.

Erisuba eNazareti

¹⁹ Nikwa Herode abihola, lebaya, omulaika woMukama mwabutukira Yosefu omo nzoli eMisiri, mwabuga ati,

²⁰ Hangana, wimaye omwana na nyinya, ugende omo kihugo kya Israeli, kusangwa abasonda eriita omwana babirihola.

²¹ Naye mwahangana mwimya omwana na nyinya, mobaya omo kihugo kya Israeli.

²² Nikwa abere owa ko Arkelao yu katabala eYudea omo mwanya wa Herode ise wuwe, mubaha eriyayo, nerisagisibwa omo nzoli mwasubula mwaya omo kihugo kya Galilaya.

²³ Neryo mwaya eriikala omo muyi owakahulawa mo Nazareti, kibererere ekyabugawa nabaminyereri bati, Asyahulwa mo muNazareti.