Matayo 19 - Nouveau Testament et Psaumes en Ndandi Version 1962

Engomolo

¹ Nikwa Yesu abere abibuga ebinywa ebi mwalwa eGalilaya, mwaya omo kihugo kyeYudea eyisiria ye Yorodani;

² Ne syondeko nene mosyamukwama, naye mwalamirya beyo.

³ AbaFarisayo mobamuhikako nerimulengako bakabulya bati, Oko bihano mundu anganahiga mukaliwe busana noburi mwatsi kwehi?

⁴ Naye mwasubirya, ati, Simweta-soma kwoyo wahangikabo erimbere mwahangikabo ogobulume nogobukali kwehi,

⁵ ati, Busana nomwatsi oyu mundu asyasiga ise na nyinya iniabegerania nomukaliwe, nababiri abo basyabya mubiri muguma?

⁶ Ritya sibakiri babiri nikwa omubiri muguma. Abo Mungu abirihindania, sihabye omundu oyo wasyagabulabo.

⁷ Mobamubwira bati, Busana naki Musa mwategeka eriha ebarua yerimukomola, nerimuhiga kwehi?

⁸ Naye mwabuga nabo ati, Busana nerikala ryomutima Musa mwabaligira erikomola abakali benyu, nikwa okwitsuka ryeri mbere sibyabya bitya.

⁹ Nage ngababwira nyiti: mundundi wasyakomola omukali wuwe, bite busana nerisingira, akahikya ogundi, akasingira, noyu kahikaya omukali oyuria komolawa naye akasingira.

¹⁰ Abiga mobabuga naye bati, Omwatsi womulume nomukaliwe amabya atya, erihikya siryowene.

¹¹ Nikwa mwabuga nabo ati, Abandu bosi sibangatoka eriminya eKinywa eki, bana bariahabawakyo.

¹² Kusangwa hari baka butawa abakonire iko banabutawa batya, kandi hari abakonire abayirawa batya nabandu, kandi hari abakonire abayiyira batya busana nobwami bwelubula. Oyu wangatoka eriimya ebi imayebyo.

Eritsumula bana

¹³ Neryo mobamuletera abana balere bati ahire kubo kwe byala nerisaba. Abiga nabo mobakungabo;

¹⁴ nikwa Yesu mwabuga ati, muleke abana base kwingye, simukakirayebo; kusangwa abari batya obwami bwelubula ni bwabo.

¹⁵ Neryo mwahira kubo kwebyala mwalwayo.

Mundu webindu bingi

¹⁶ Neryo lebaya, omundu mwamuhikako, ati, Mukangirirya, omubiri owene ni wahi ogo nangakola, inabana engebe yerikota kwehi?

¹⁷ Naye mwamubwira ati, Busana naki ukanyibulaya ekibuya nga ni kyahi kwehi? Muguma ane oyuri mubuya. Wamanza eriingira omo ngebe, ubike amahano.

¹⁸ Naye mwabuga naye ati, Ni kyahi kwehi? Yesu mwabuga ati, Isiwita. Isiwasingira, Isiwiba, Isiwabihira abandi,

¹⁹ Sikaya tata wawe na koyo wawe, kandi, Wanze mulikyenyu ngoko uyanzire.

²⁰ Omulwana mwabuga naye ati, Ebyosi ebi nabi riteyabyo; nyikisiya kyahi kwehi?

²¹ Yesu mwabuga naye ati, Wamasonda erihikana, ugende, ugulaye ebyo uwite uhebyo oko bera, wasyabya nebindu elubula; kandi wase unyikwame.

²² Omugulu omulwana owa ebi mwahungukala nobulige; kusangwa abya nebindu binene.

²³ Yesu mwabuga nabiga buwe ati, Kwenene ngabuga nenyu nyiti, rikandisyakala busana nowebindu eriingira omo bwami welubula.

²⁴ Kandi ngababwira, ryasyabya ryolo engamia erilaba omo kyuna kyenzanza kwilaba webindu bingi eriingira omo bwami bwelubula.

²⁵ Abiga babere bowa ebi mobasweka kutsibu, bati, Nikwa nindi wangatoka erilamibwa kwehi?

²⁶ Nikwa Yesu mwasamarirabo mwabwirabo ati, Oko bandu eki sikyangatokekana, nikwa oko Mungu emyatsi yosi ikato kekana.

²⁷ Neryo Petero mwamusubirya ati, Langira, itwe twabirisiga ebyosi twamakukwama. Nikwa twasyabanaki kwehi?

²⁸ Yesu mwabwirabo ati, Kwenene, ngabuga nenyu, omo kihugo kihyakihya, omugulu oMugala womundu asikala oko kitumbi kyobwami nolukengerwa lwakyo, inywe mwabiri nyikwama nenyu mwasikala oko bitumbi byobwami erikumi nebibiri, eritswera ebihanda erikumi nebibiri bye Israeli.

²⁹ Noburi mundu oyo wabirisiga amanyumba, kutse abagala babo kutse bali babo kutse ise kutse nyinya kutse bana kutse esyombibi, busana nerina ryage, asyabanabyo engendo erigana, iniarya nomwandu wengebe yerikota.

³⁰ Nikwa bangi abe mbere basyabya benyuma, na benyuma basyabya bembere.