Matayo 18 - Nouveau Testament et Psaumes en Ndandi Version 1962

Eribya nga bana

¹ Oko mugulu oyo abiga mobahika oko Yesu bati, Nindi yo mukulu omo bwami bwelubula kwehi?

² Naye mwabirikira okwiye omwana mulere, mwamwimania omukati kati kabo,

³ mwabuga ati, Kwenene, ngababwira, mwama tindabinduka eribya nga bana balere, simwendisingira omo bwami bwelubula na kera.

⁴ Oyu kayikehaya ngo mwana mulere oyu, asyabya mukulu okwilaba omo bwami bwelubula.

⁵ Nomundundi oyu kakokaya mwana muguma ngoyu omo rina ryage akanyikokaya;

⁶ nikwa omundundi oyu wasyaleka muguma goko balere aba abakanyikiriraya erikola ebibi, ritolere iniaboherwa ko luso lunene omo bikya biwe iniasendibwa omwiriba ryengetsi.

⁷ Obulige oko kihugo busana nerilengwako erikakolesaya ebibi! Kusangwa ritolere erilenga iryasa, nikwa obulige oko mundu oyo kaleta erilenga eryo!

⁸ Nebyala byawe kutse ekisandu kyawe byamaleka iwakola ebibi, utwekyo ugu sekyo hali kuwe; ryowene ndeke busana nawe eriingira omo ngebe inune kirema kutse lugata kwilaba eribya nebyala bibiri nebisandu bibiri neriguswa oko muliro wa kera na kera.

⁹ Neriso ryawe ryamaleka ukakola ebibi, ukureryo uguseryo hali kuwe; ryowene ndeke kuwe eriingira omo ngebe neriso riguma kwilaba eriguswa omo kyuna kyomuliro na meso abiri.

¹⁰ Mulebaye isimwapona omuguma woko balere aba; kusangwa ngababwira omo lubula abalaika babo bakatungerera ebiro byosi obusu bwa Tata wage oyuri mo lubula. (

¹¹ Kusangwa Mugala womundu mwasa erilamya ababya batere.)

¹² Muka ganirayaki kwehi? Omundu amabya awite asyombuli erigana, enguma yamusyo yamatala, siarisiga amakumi mwenda no mwenda oko bitwa iniaya sonda-sonda enguma eyiriatala kwehi?

¹³ Amabanayo, kwenene ngabuga nenyu nyiti, akatse merayo kwilaba amakumi mwenda nomwenda esitetatala na kera.

¹⁴ Ritya Tata wage oyuri elubula sianzire omuguma oko balere aba akahera.

Ngoko twangakunga

¹⁵ Omugala wenyu amakukola nabi, ugende umubwire ebibi biwe, uwe naye imwe bene. Amakowa, iwamabana mugala wenyu.

¹⁶ Amatindakowa, wimaye omuguma kutse abandi babiri haguma nawe, oburi kinywa kitoke erisingana busana neritulago ryabalangiri babiri kutse abasatu.

¹⁷ Amagana erio wabo, iwabwira ekanisa; amagana eriowa nekanisa, abye kuwe ngoweBihanda nomusolesya.

¹⁸ Kwenene ngabuga nenyu, ebyosi mukasenga omo kihugo byasyasengwa omo lubula, nebyosi mwasyasengula omo kihugo byasyasengulwa omo lubula.

¹⁹ Kandi ngabuga nenyu nyiti, ababiri kwinywe bami kirirania omo kihugo kino busana nekinduki basyabulya, basyakolerwakyo na Tata wage oyuri elubula.

²⁰ Kusangwa aho babiri kutse abasatu bahindene omo rina ryage, inyineho omukati-kati kabo.

Eribuyirana

²¹ Neryo Petero mwahikaho mwabuga naye ati, Mukama, engendo singahi mugala wetu asyanyikola nabi, nage inamu buyira kwehi? Nga ngendo sirinda kwehi?

²² Yesu mwamu bwira ati, Sindibuga nawe engendo sirinda, nikwa amakumi arinda engendo sirinda.

²³ Neryo obwami bwelubula bwasya ringiriranibwa nomwami oyo wasonda eribuga eriganza haguma na bagombe buwe.

²⁴ Omugulu atsuka eriganza, mobamuletera muguma owabya nomwinda wesyofaranka maelfu makumi atanu.

²⁵ Nikwa mwabula ekyeririha, omwami wuwe mwa tegeka ati, agulibawe, haguma nomukali wuwe na bana nebyosi awite, omwinda atuhawe.

²⁶ Omugombe oyo mwagwa oko malwi wuwe, erimugonga-gonga ati, Mukama, undindirire, nasyakutuha ebyosi.

²⁷ Nomukama womugombe oyo mwa mukwira obulige mwamubohola mwamubuyira omwinda.

²⁸ Nikwa omugombe oyo, abere akahuluka mwahindana nogundi mugombe mulikyabo oyu wabya nomwinda wuwe wesyofaranka elfu nguma; mwamuwatira omo bikya ati, Nduhe omwinda wage.

²⁹ Nikwa omugombe mulikyabo mwagwa ahisi mwamugonga-gonga ati, Undindirire, nasyakutuha.

³⁰ Naye mwagana mwayamuhira omo nyumba yomuliki erihika aho asyatuhira omwinda.

³¹ Omugulu abagombe balikyabo balangira ebyamabya, mobabya nobulige bunene, mobaya tulirago omukama wabo ebyosi byabere.

³² Neryo mukama wuwe mwamubirikira mwabuga naye ati, Uwe mugombe mubi! Nyiriakubuyira omwinda oyo gosi kusangwa urianyigonga gonga;

³³ nawe siwangakwirire mugombe mulikyenyu obulige, ngoko nyiriakukwirabo kwehi?

³⁴ Nomwihitana omukama wuwe mwamuha abakagalaya erihika aho asyatuhira omwinda gosi.

³⁵ Ritya Tata wage welubula asyakola oburi mundu kwinywe, mwamatindisyabuyira mugala wenyu omo mitima yenyu.