Matayo 17 - Nouveau Testament et Psaumes en Ndandi Version 1962

Yesu mwahinduka

¹ Nenyuma webiro endatu Yesu mwatwala haguma naye Petero na Yakobo na mugala wabo, ye Yoane, mwatwalabo oko kitwa kiri ibobene.

² Mwahindukibwa embere syabo, nobuso buwe mobwakangabania ngeryuba, nesyongimba siwe mosyabya nyeronyero ngekyakakala.

³ Kandi lebaya, Musa nElia mobabutukirabo, bakakania naye.

⁴ Nikwa Petero mwa­buga na Yesu ati, Mukama ryowene turi hano; wamanza, ngandihimba ehitarikirire hisatu hano, akaguma busana nawe nakaguma busana na Musa nakaguma busana na Elia.

⁵ Abere akinabuga, lebaya ekitu kikangabenie mokyasukuriryabo, nomu lenge mwalwa omo kitu ati, Oyu ni Mugala wage mwanze, namatsemisibwa ndeke busana naye; mumowe.

⁶ Omugulu abiga bowa ebi, mobagwa ahisi oko masu wabo, mobusula nobuba.

⁷ Nikwa Yesu mwasa mwatula kubo, ati, Muhangane, simubahe.

⁸ Nabo babere balibula ameso, mobatalola oko mundu nina Yesu iyowene.

Eriasa rya Elia

⁹ Neryo babere bakandagala oko kitwa, Yesu mwategekabo ati, Simubwire omundu ebyo mwamalolako omo bulime, erihika aho Mugala womundu asyalubukibwa oko baholi.

¹⁰ Abiga mobamubulya bati, Busana naki abasaki bakabuga bati, Elia atolere eritsuka eriasa kwehi?

¹¹ Naye mwasubirya ati, Elia akasa, iniasubya emyatsi yosi;

¹² nikwa ngababwira nyiti Elia abirihika, sibetamuminya, nikwa mobamukola ngoko banzire. Ritya oMugala womundu asyagalwa oko byala byabo.

¹³ Neryo abiga mobaminya nga bwirabo busana na Yoane Mubatisa.

Omulwana yuri kwembinga

¹⁴ Kandi omugulu bahika oko ndeko, omundu mwamuhikako mwamukukamira mwamubwira ati,

¹⁵ Mukama, uganyire mu gala wage, kusangwa ni mututsa akagalawa kutsibu; kusangwa engendo nyingi akagwa omo riko, nomo magetsi engendo nyingi.

¹⁶ Kandi monamuletera abiga bawe, nabo mobataluka erimulamya.

¹⁷ Yesu mwasubirya ati, Inywe olulengo lute nerikirirya, nolubi, nasyasiba nenyu kandi endambi ingahi kwehi? nasyabalinda endambi yingahi ngabaganyira kwehi? Munyiletere ye hano.

¹⁸ Kandi Yesu mwakungayo, nembinga moyamulwako, nomulwana mwalamibwa neryo-neryo.

¹⁹ Ne ryo abiga mobahika oko Yesu bubi-sobiso bati, Busana naki motukataluka erigusayo eyihya kwehi?

²⁰ Naye mwabwirabo ati, Busana nerikirirya ryenyu ike. Kusangwa kwenene, nga­babwira mwamabya nerikirirya ngakabuto kaharadali, mwasya bwira ekitwa eki muti, Uhumire harya, ikyahuma; kandi sihari kindu ekyasyabalema.

²¹ Nikwa omusindo oyu siarilwamo nakera rite erisaba neritsira karyo.

²² Nomugulu babya bakahindana eGalilaya, Yesu mwabuga nabo ati, oMugala womundu asyahoterwa omo byala byabandu,

²³ basyamwita, kandi asyalubukibwa oko kiro kyebisatu. Neryo mobabya nobulige kundu.

Palata

²⁴ Babere bahika eKapernaumu, abasolesya bepalata ya faranka itanu mobahika aho Petero ari mobabulya bati, Muka ngirirya wenyu siarisola epalata kwehi?

²⁵ Naye ati, Ega. Babere babihika eka, Yesu mwatsuka erimubulya ati, Simoni ukaganirayaki kwehi? Abami be kihugo bakalusaya omuhako nengemo byo kundi kwehi? Oko bagala babo kutse oko bandi kwehi?

²⁶ Abere abibuga ati, Oko bandi, Yesu mwabuga naye ati, Neryo abagala bakayigenderaya.

²⁷ Nikwa situleke baka twikala, uye oko ngetsi uguse oburobo, wimaye erihere erika tsuka erihuluka, neryo wamabikumbula obuno bwaryo wasye yamo esyofaranka ikumi; wimayesyo uhesyobo busana nage na busana nawe.