Matayo 16 - Nouveau Testament et Psaumes en Ndandi Version 1962

Erisonda ekitikotiko

¹ AbaFarisayo nabaSadukayo mobasa, erimulengako moba mubulya erikangyabo ekitikotiko kikalwa elubula.

² Nikwa mwasubiryabo ati, Omugulu werigolo, mukabuga muti, Bukandisyuwana; kusangwa ekyanya kihenirye.

³ Ne ngyakya muti, bukandibya mulumbi, kusangwa ekyanya kya mabya lukulakula nebitu byamahimba. Munasi eriyitegererya omusindo wekyanya, nikwa simuritoka eriyitegererya ebitiko tiko byemigulu.

⁴ Olulengo lubi nolusingiri lukasonda-sonda ekitikotiko nikwa silwendisyahabwa ekitikotiko kye nekitiko tiko kyaYona. Neryo mwasigabo mwagenda.

Ekihamya kyabaFarisayo

⁵ Abiga babere babihika eyisirya, mobibirirwa eriheka amandu, Yesu mwabuga nabo ati,

⁶ Mulebaye mutegaye busana nekihamya kyabaFarisayo na baSadukayo.

⁷ Nabo mobakani rania omukati-kati kabo bati, Motutetaleta amandu.

⁸ Nikwa Yesu, mwaminya ebi, mwabuga, ati, Inywe bandu berikirirya ike, busana naki mukakanaya omukati-kati kenyu omwatsi weritindabya namandu kwehi?

⁹ Simwetaminya kwehi? Simuriibuka amandu atanu wamaelfu atanu, nebitiri bingahi ebyo mwakumakumiramo kwehi?

¹⁰ Kutse amandu arinda wamaelfu ani, nebitiri bingahi ebyo mwakumakumiramo kwehi?

¹¹ Mukabula eriminya muti kwehi ko ndariahula amandu? Muyitegaye busana nekihamya kya baFarisayo na baSadukayo.

¹² Neryo mobaminya kwatariabwirabo eriyiteya busana neki­hamya kyamandu, nikwa busana nerikangirirya ryabaFarisayo na baSadukayo.

Eritulago rya Petero

¹³ Nikwa omugulu Yesu ahika omo kihugo kyeKaisaria Filipi, mwabulya abiga buwe ati, Abandu bakabuga bati oMugala womundu yondi kwehi?

¹⁴ Nabo mobabuga bati, Abandi bati Yoane Mubatisa, abandi bati Elia, nabandi Yeremia kutse muguma woko baminyereri.

¹⁵ Mwabuga nabo, Nikwa nenyu mukabuga muti ingyendi kwehi?

¹⁶ Simoni Petero mwasubirya ati, Uwe uri Kristo, Mugala woMungu oyuriho.

¹⁷ Yesu mwamusubirya ati, Omuyisa ari kuwe, Simoni wa Yona! Kusangwa omubiri nomusasi mwatakubisurira ebyo, nikwa ni Tata oyuri elubula.

¹⁸ Ngakubwira, uri Petero, noko ribwe eri nasyahimba ekanisa yage, nesyonyui syekulimu sisyendisyakindayo.

¹⁹ Nasyakuha ebiboholi byobwami bwelu bula, nebyo wasyasenga omo kihugo byasyasengwa omo lubula, nebyo wasyasengula omo kihugo byasyasengulwa nelubula.

²⁰ Neryo mwategeka abiga kutsibu sibabwire omundu kwari Kristo.

Amagali wa Kristo

²¹ Eritsuka oko mugulu oyo Yesu mwatsuka erikangya abiga buwe kwatolere eriya eYerusalema neriagalwa omo myatsi mingi oko bakulu noko bahereri bakulu nabasaki, neriitwa, nerilubukibwa oko kiro kyebisatu.

²² Neryo Petero mwasegera hakuhi naye mwatsuka erimukunga ati, Mungu agane ekyo Mukama! Eki sikikuhikeko nakera.

²³ Nikwa mwakeba mwabuga na Petero ati, Ugende enyuma kwingye Setani! Uri ndwikale yage; kusangwa suri oko luhande lwoMungu, nikwa oko lwabandu.

²⁴ Neryo Yesu mwabwira abiga buwe ati, Omundu amanza erinyikwama, ayigane aheke omusalaba wuwe anyikwame.

²⁵ Kusangwa omundundi wanzire erilamya engebe yiwe asyatalyayo, nomundundi oyu katalaya engebe yiwe busana nage asyabanayo.

²⁶ Kusangwa omundu asyabana endundi yahi nomwangabana e kihugo kyosi akatalya engebe yiwe kwehi? Kutse omundu asyahinganiaki busana nengebe yiwe kwehi?

²⁷ Kusangwa oMugala womundu asyasa nabamalaika buwe omo lukengerwa lwa Tata wuwe, noko mugulu oyo asyahemba oburi mundu ngebyo akola.

²⁸ Kwenene, ngabuga nenyu, Oko abahangene hano hari bandi batendisyahola emuliro batebalola oko Mugala womundu akasa omo bwami buwe.