Matayo 15 - Nouveau Testament et Psaumes en Ndandi Version 1962

Yesu akagana emitsye ya baFarisayo

¹ Neryo abaFarisayo nabasaki mobahika oko Yesu bakalwa eYerusalema, bati,

² Busana naki abiga bawe bakaketa emitsye yabakulu kwehi? Kusangwa sibenaba omugulu ba karya.

³ Naye mwasubiryabo ati, Busana naki nenyu mukaketa ekihano kyoMungu busana nemitsye yenyu kwehi?

⁴ Ku­sangwa Mungu mwategeka ati, Usikaye tata wawe na koyo wawe, kandi, Oyu kabuga nabi busana nise kutse enyinya ahole kundu.

⁵ Nikwa mukabuga muti, omundu amabwira ise kutse nyinya ati, Ebyo nangakuhere mo ndundi byabirihabwa oko Mungu, siari nobwaga bwerisikya ise.

⁶ Ritya busana nemitsye yenyu mukayira eKinywa kyoMungu mo buyira.

⁷ Inywe batebya! Isaya mwaminyerera ndeke busana nenyu, omugulu abuga ati,

⁸ Abandu aba bakanyisikaya neminywa yabo, Nikwa omutima wabo ari hali kwingye;

⁹ Bakanyisaba bosa, Bakakangiriraya ngeritegeka erihana ryabandu.

¹⁰ Kandi mwabirikira bandu okwiye mwabwirabo ati, Mowe, muminye:

¹¹ ebikaya omo buno byo bitetsandaya omundunikwa ebikalwa omo buno, byo bikatsandaya omundu.

¹² Neryo abiga mobahika mobabuga naye bati, Unasi kwabaFarisayo bagarirawa omugulu bowa eribuga eri kwehi?

¹³ Naye mwa subiryabo ati, oburi kiti ekyo Tata wage welubula atahera kyasyakulangwa.

¹⁴ Mulekebo; ni basondoli ndimatime. Endimatime yamasondola endimatime ababiri basytogera omo bohya.

¹⁵ Nikwa Petero mwabuga naye ati, Utukumbulire omusyo oyo.

¹⁶ Kandi mwabuga ati, Mukine butsira eriminya kwehi?

¹⁷ Simwasi kwekyo kikaya omo buno kikalaba omo nda ikyatwangana kwehi?

¹⁸ Nikwa ebikalwa omo buno bikalwa omo mutima, nebyo bikatsandaya omundu.

¹⁹ Ku sangwa omo mutima mukalwa eriganirya ibi, eriita, eriteta, erisingira, eriiba, eritula owamabihi, ebitsumi.

²⁰ Ebi byobi katsandaya omundu; nikwa erirya omo byala bitanabire siri ritsandaya omundu.

Omukali weKanana

²¹ Yesu mwalwayo mwayiyira oko luhande lweTiro neSidona.

²² Neryo lebaya, omukali muKanana akalwa omo kihugo ekyo, mwabirikira, ati, Uwe Mukama, oMugala wa Dawidi unyiganyire; mwali wage akwire embinga kutsibu.

²³ Nikwa mwatamusubirya eKinywa nekiguma. Abiga buwe mobahika mobamugonga-gonga bati, Uleke agende, kusangwa amabuya olukanda enyuma kwitwe.

²⁴ Naye mwasubirya, ati, Natumawa oko syombuli esitere syenyumba ya Israele nyisa.

²⁵ Nikwa iye mwasa mwamukukamira, ati, Mukama unyiwatikaye.

²⁶ Naye mwasubirya ati, Siritolere eriimya obundu bwabana nerigusabo esyombwa.

²⁷ Naye mwabuga ati, Ega, Mukama, nikwa esyombwa nasyo sikanarya obulagalira obukalagala oko butara bwo mwenyesyo.

²⁸ Neryo Yesu mwamusubirya ati, Uwe mukali, erikirirya ryawe ni nene! Kibye kuwe ngoko wanzire. Nomwali wuwe mwalamibwa neryo-neryo.

Abakoni bakalamibawe

²⁹ Yesu mwalwayo mwalaba oko musike wengetsi ya Galilaya. Mwahetukira oko hitwa, mwikalaho.

³⁰ Nesyondeko nene mobamuhikako, ibakamuletera abakasindogera, nebirema, nendi matime, esyomumu, nabandi bangi, mobahirabo oko bisandu biwe, naye mwalamyabo,

³¹ kyaleka endeko iyasweka, omu­gulu balola esyomumu syabuga, nebirema ibanakalire, nabaka sindogera ibarimugenda, nesyondimatime isiri mulangira; mobapipa Mungu wa Israeli.

Abandu maelfu 4000

³² Neryo Yesu mwabirikira abiga buwe ukwiye mwabuga ati, Ngagenyera endeko, kusangwa bamasiba nage ebiro bisatu, isibawite akerirya; nage sinyanzire erilagana nabo banakwire enzala, bakawirira omo nzira.

³³ Abiga mobamubwira bati, omo mbwarara twabana amandu awatolere eriugutya endeko ingaha go hahi kwehi?

³⁴ Yesu mwabwirabo ati, Muwite amandu angahi kwehi? Mobabuga bati, Arinda, nehihere hike.

³⁵ Naye mwategeka endeko eriikala oko kitaka,

³⁶ mwimya amandu arinda notuhere, abere abiha ewasingya mwatwago mwahago oko biga, nabiga mobahago oko syondeko.

³⁷ Abosi mobarya mobuguta; moba-songa-songya ebitiri birinda byo swire ebihande ebyasaka.

³⁸ Abarya babya abalume amaelfu ani, abakali nabana bataganzirwe kubo.

³⁹ Neryo mwalagana nesyondeko, mwingira omo bwato mwaya omo kihugo kya Magadani.