Matayo 12 - Nouveau Testament et Psaumes en Ndandi Version 1962

Yesu, oMukama wesabato

¹ Oko mugulu oyo Yesu mwalaba omo marima wenganu oko kiro kyesabato; abiga buwe mobakwa enzala, moba tsuka eritwa amakundi wenganu neriryago.

² Nikwa omugulu abaFarisayo balangira, mobamubwira bati, Lebaya, abiga bawe bakakola ekitatolere omo bihano oko kiro kyesabato.

³ Naye mwabwirabo ati, Simuritasoma ekyo Dawidi akola, omugulu akwa enzala, nababya haguma naye kwehi?

⁴ ngoko ingira omo nyumba yoMungu mwarya obundu bweribyaho nabo, obo bihano bitaliga akaryabo kutse ababya haguma naye, nikwa banabahereri basa.

⁵ Kutse simuritasoma omo bihano ngoko abahereri omo hekalu oko kiro kyesabato, bakaheraya sabato, isibari nolubanza kwehi?

⁶ Ngababwira, nyiti, oyu labire ehekalu ane hano.

⁷ Kumbe mwabya mwasi ekyo eki kikahula kiti, Ngasonda eriganyire, butsira amahere, kumbe simutatswera olubi abate nolubanza.

⁸ Kusangwa oMugala womundu ni mukama we sabato.

Ebyala byumire

⁹ Neryo mwalwayo mwingira omo nyumba yerihindana yabo.

¹⁰ Lebaya, habya mundu owebyala byumire. Mobamubulya bati, Rinatolere oko bihano erilamya omo kiro kyesabato kwehi? kusangwa basonda erimuhandikirira.

¹¹ Naye mwabwirabo ati, Omundundi kwinywe, amabya awite embuli nguma yama togera omo buhya oko kiro kyesabato siarihambayo akasumbayo mubo kwehi?

¹² Ko mundu sialengire enzwere yembuli kutsibu kwehi? Nibya kitolere oko bihano erikola ebibuya oko sabato.

¹³ Neryo mwabuga nomundu oyo ati, Lambula ebyala byawe. Naye mwalambulabyo mobyasuba mobyabyaho nge bindi.

¹⁴ Nikwa abaFarisayo mobahuluka mobamuyira embita, ngoko bangamwita.

¹⁵ Yesu iniabiriminya ebyo, mwalwaho. Na bangi mobamukwama, naye mwalamyabo abosi,

¹⁶ mwa tegekabo ati, sibamukumayiraye.

¹⁷ Ebi byabya kibererere ekyabugawa nomuminyereri Isaya: ati,

¹⁸ Lebaya, omugombe wage oyo nayisoga, Omwanze wage, omutima wage amatsemisibwa busana naye. Nasyamuhira kweKirimu kyage, Naye asyakangania eritswera oko Bihanda.

¹⁹ Siendisyanegena kutse eribuya olukanda, Kutse sihari mundu wasyowa omulenge wuwe omo syonzira;

²⁰ Siendisyatwa oluseke olubunikire Kutse erihomberya embumba eyikatumba Erihika aho asyaleta eritswera eryerikinda;

²¹ Nomo rina riwe eBihanda byasyabana amaha.

Bakahula Yesu mo Belzebuli

²² Neryo mobamuletera oyuri kwembinga ini ndimatime nemumu, naye mwamulamya, nomundu emumu mwabuga mwalangira.

²³ Nabandu bosi mobasweka, mobabuga ambu, Anganabya mugala waDawidi kwehi?

²⁴ Nikwa omugulu abaFarisayo bowa mobabuga bati, Omundu oyu akagusa esyo­mbinga eyihya busana na Belzebuli omukama wesyombinga.

²⁵ Naye mwaminya eriganirya ryabo, mwabwirabo ati, Oburi bwami obugabene bukahera, nomuyi kutse enyumba ebigabene sibendisyahangana;

²⁶ kandi Setani yamagusa Setani eyihya, yamayigaba iyoyene; obwami bwayo ibwasyahangana buti kwehi?

²⁷ Nage namagusa esyombinga eyihya busana na Belzebuli, abana benyu bakagusasyo eyihya busana nandi kwehi? Ekyo kikaleka ibabya abatsweri benyu.

²⁸ Nikwa Ingye namagusa esyombinga eyihya busana neKirimu kyo Mungu, obwami bwoMungu bwabiribahikako.

²⁹ Kutse mundu angatoka eriingira mo nyumba yomundu ukalire mwati erihunga ebindu biwe amatindatsuka eriboha omundu oyo kalire kwehi? Neryo iniatoka erihunga enyumba yiwe.

³⁰ Oyute haguma nage ni nzigu yage, noyute kumakuma haguma nage akapanzapanza.

³¹ Neryo ngababwira nyiti, oburi kibi neri tsuma byasyabuyirwa abandu, nikwa oyu katsuma eKirimu siendisyabuyirwa.

³² Nomundundi oyu wasyabuga eKinywa kyobuyigu oko Mugala womundu asyabuyirwa; nikwa oyo wasyabuga eKinywa kyo buyigu oko Kirimu Kibuyirire siendi syabuyirwa, kutse oko mugulu oyu kutse oko mugulu akandi syasa.

³³ Muyire omuti owene, nebiguma byago byowene; kutse muyira omuti mo mubi nebiguma byago mo bibi; kusangwa omuti akaminyikala busana nebiguma byago.

³⁴ Inywe abana besyonzoka! mwagatoka muti eribuga ebibuya, mune babi kwehi? Kusangwa busana nebingi byomo mutima byo buno bukabuga.

³⁵ Omundu gowene busana nebindu biwe byowene akahulukaya ebyowene, nomundu mubi busana ne­bindu biwe bibi akahulukaya ebibi.

³⁶ Kandi ngababwira, oko kiro kyeritswera abandu basyabulibwa oburi kinywa kityakitya ekyo bakabuga;

³⁷ kusangwa busana nebinywa byawe wasya singana na busana nebinywa byawe wasyatswerwa lubi.

Ekitikotiko kya Yona

³⁸ Neryo abandi boko basaki nabaFarisayo mobabuga naye bati, Mukangirirya, tukasonda erilola oko kitikotiko ekikalwa ukuwe.

³⁹ Nikwa mwasubiryabo ati, Olulengo lubi nolusingiri lukasonda-sonda ekitikotiko; nikwa silwendisyahabwa ekitiko tiko kyene kitikotiko kyo muminyereri Yona.

⁴⁰ Kusangwa ngoko Yona abya amatungi asatu nebiro bisatu omonda yenyama nene yomo ngetsi, na ritya oMugala womundu asyabya amatungi asatu nebiro bisatu omo mutima we kihugo.

⁴¹ Abandu beNinawe basyahangana okwitswera nolulengo olu basyatsweralo lubi; kusangwa mobabinduka okwikangirirya rya Yona, kandi lebaya, omukulu ko Yona ari hano.

⁴² Omwami wobukali weLutambi asyahangana okwitswera nolulengo olu asyatsweralo lubi; kusangwa mwalwa oko syonduli sye kihugo eriowa amenge wa Solomono, kandi lebaya omukulu ku Solomono ane hano.

⁴³ Omugulu ekirimu kibi kyabirilwa oko mundu, kikalaba ahate magetsi erisonda aheriluhukira, nikwa sikibana ho.

⁴⁴ Neryo kikabuga kiti, Ngandisuba omo nyumba yage eyo nalwamo. Neryo kyamabihikamo ikyeyayo iniri bosa, inibirirye, ininakomire.

⁴⁵ Neryo kikagenda ikyaleta ebindi birimu birinda haguma nakyo ebirengirekyo obubi, ibingiramo ibikalamo; nenduli yomundu oyo iyabya nyibi kwilaba eyeri mbere. Ko bikandisyabya bitya oko lulengo lubi olu.

Nyinya na bagala babo

⁴⁶ Abere anemobuga nabandu, lebaya, nyinya nabagala babo mobimana eyihya, bakasonda erikania naye.

⁴⁷ Nomundu mwamubwira ati, Lebaya, koyo wawe na bagala benyu bani mene eyihya, bakasonda erikania nawe.

⁴⁸ Nikwa mwasubirya omundu oyo mwamubwira ati, Koyo ni nindi, na bagala betu ni bahi kwehi?

⁴⁹ Neryo mwakangania ebyala biwe oko biga buwe, ati, Hano ho koyo wage ari na bagala betu!

⁵⁰ Kusangwa oburi mundu oyu kakola erisonda ryaTata wage oyuri omo lubula ni mugala wetu, na mwali wetu, na koyo.