Matayo 10 - Nouveau Testament et Psaumes en Ndandi Version 1962

Erituma bakwenda

¹ Kandi mwabirikira okwiye abiga buwe erikumi na babiri mwahabo ehamuli oko birimu bibi, erigusabyo eyihya, nerilamya esyondwala syosi neriyiremwa ryosi.

² Amena wabakwenda erikumi na babiri waya: oweritsuka, Simoni, oyu kahulawa mo Petero, na Anderea mugala wabo; Yakobo mugala wa Zebedayo, na Yoane mugala wabo;

³ Filipo na Bartolomayo; Toma na Matayo musolesya; Yakobo mugala wa Alafayo, na Tadeo;

⁴ Simoni muKanana, na Yuda Iskariote, oyu wamuhotera.

⁵ Aba erikumi na babiri Yesu mwatumabo, mwategekabo ati, Simugende omukati-kati keBihanda, simwingira omo muyi nomuguma wabaSamaria,

⁶ nikwa mugende oko syombuli esitere syenyumba ya Israeli.

⁷ Omugulu Mukagenda mutulego muti, Obwami bwelubula buri hakuhi.

⁸ Mulamaye abakoni, mulubukaye abaholi, mweraye abahaga, muguse esyombinga syeyihya. Mwabiriimya butsira eririha, muhe butsira eririha.

⁹ Simwimaye zahabu, kutse ebitsipa, kutse emiringa omo matusi wenyu,

¹⁰ Simuheke engunza busana nolugendo lwenyu, kutse esyokanzu ibiri, kutse esyongendero, kutse omutso; kusangwa mukoli womubiri atolere akaryo kuwe.

¹¹ Noko muyi kutse oko kayi kahi mukingiramo, musondayeho oyu tolere mugo, mwikale naye erihika aho mwasyalwiraho.

¹² Omugulu mukingira omo nyumba, mubukayeyo.

¹³ Nenyumba yamabya itolere, obuholo bwenyu bubye kuyo; nikwa yamabya isitolere, obuholo bwenyu busube kwinywe.

¹⁴ Nomundundi amagana eribakokya kutse eriowa ebinywa byenyu, omugulu mukalwa omo nyumba eyo kutse oko muyi oyo mukungute olututu omo bisandu byenyu.

¹⁵ Kwenene ngabuga nenyu, nyiti, lwasyabya lolo oko kiro kyolubanza oko kihugo kya Sodoma na Gomora kwilaba olwomuyi oyo.

¹⁶ Lebaya, Ngabatuma ngesyombuli omukati-kati kamakungu; neryo mubye na menge ngesyonzoka noyute nomwaga nga kalikuku.

¹⁷ Muyitegaye busana nabandu; kusangwa basyabahotera omwibugiro, neribaswirirya omo manyumba wabo werihindana,

¹⁸ Mwasyakurirwa embere syabarongani nabami busana nage, eritulago kubo neBihanda.

¹⁹ Omugulu basyabahotera, simusyehahukaya omutima, nga mwasyabuga mutiki kutse nga mwasyabugaki; kusangwa ekyo mwangabuga mwasyahabwakyo oko katambi ako;

²⁰ kusangwa inywe mutendisyabuga, nikwa ni Kirimu kyaTata wenyu kyokyasyabuga omwisi wenyu.

²¹ Omugala wabo asyahotera mugala wabo okwitwa, nise omwana wuwe, na bana basyahangana erilwa nababutabo neriitisyabo;

²² nenyu mwasyakubwa obusu na bandu bosi busana nerina ryage. Nikwa oyu kandisyasika erihika oko nduli asyalamibwa.

²³ Omugulu bakabendereraya omo muyi muguma, imwatibita oko gundi; kusangwa kwenene, ngabuga nenyu, simwendisyabuga emiyi yosi ya Israeli, oMugala womundu ateasa.

Eriubaha oMungu

²⁴ Omwiga siarilenga omukangirirya wuwe, kutse omugombe siarilenga omukama wuwe;

²⁵ kobyangabya bitya omwiga iniabya nga mukangirirya wuwe, nomugombe iniabya ngomukama wuwe. Bamahula omukama wenyumba mo Belzebuli, kwilaba aho kangahi basyatsuma abomo nyumba yiwe kwehi?

²⁶ Simubahebo; kusangwa sihari ekikuningire ekitinda-syabisulwa, kutse ekibisire ekitindisyaminywa.

²⁷ Ebyo ngababwira mo mwirimya, mubugebyo omwekyakakala; nebyo mukowa omo bihwehwe, mutulebyo endata komanyumba.

²⁸ Kandi simubahe abakita omubiri nikwa sibetoka eriita ekirimu, kwilaba aho mubahe oyu wangatoka eriita ekirimu nomubiri omo kyuna kyomuliro.

²⁹ Ehiswiri hibiri sihiguri bawa ikuta iguma kwehi? Akaguma siketogera ahisi rite erisonda ryaTata wenyu.

³⁰ Nikwa esyonzwiri syomutwe wawe siganzirwe esyosi.

³¹ Simubahe nibya; muri benzwere nene kwilaba ehiswiri hingi.

³² Neryo oburi mundu oyu wasyanyi kangya embere syabandu, nage nasyamukangya embere wa Tata wage oyuri elubula;

³³ nikwa omundundi oyu wasyanyi gana emuliro wabandu, nage nasyamugana emuliro wa Tata wage oyuri elubula.

Enzwere yerikwama Yesu

³⁴ Simuganiraye muti nasa erileta obuholo omo kihugo; mondasa erileta obuholo nikwa omuyari.

³⁵ Kusangwa nasa erilusisania omundu nise wuwe, nomwali na nyinya wuwe, nomwaliana na nyinyi-byala wuwe;

³⁶ nesyonzigu syomundu syasyabya abekitunga kiwe.

³⁷ Oyu wanzire ise kutse nyinya kwilaba ingye sianyitolere; noyu wanzire mugala kutse mwali kwilaba ingye sianyitolere;

³⁸ noyu teheka musalaba wuwe akanyikwama sianyitolere.

³⁹ Oyu kabana engebe yiwe asyata lyayo, noyu katalaya engebe yiwe busana nage asyabanayo.

⁴⁰ Oyu kabakokaya akanyikokaya, noyu kanyikokaya akako kaya oyo wanyituma.

⁴¹ Oyu kakokaya omuminyereri ku­sangwa ni muminyereri asimya oluhembo lwomuminyereri, noyu kakokaya omundu atunganene kusangwa ni mundu atunganene asimya oluhembo olwomundu atunganene.

⁴² No mundundi oyu wasyaha olutehi lwamagetsi muhu oko muguma kwaba bakebake kusangwa ni mwiga, kwenene ngabuga nenyu siendisyatalya oluhembo luwe na hake.