Mariko 9 - Nouveau Testament et Psaumes en Ndandi Version 1962

Yesu mwahindukibwa

¹ Neryo mwabuga nabo ati, Kwenene ngabuga nenyu, hari bandi abimene hano sibendisyalola okwihola batebalola oko bwami bwoMungu bukasa namaka.

² Nenyuma webiro endatu Yesu mwimya Petero na Yakobo na Yoane, ibobene mwatwalabo oko kitwa kirikiri; naye mwa hindukibwa emuliro wabo,

³ Nesyomgimba siwe mosyakanga bania, nerihenia kutsibu, isihari ekyangakangabaniasyo kitya mona kihugo.

⁴ Neryo Elia na Musa mobabutuka kubo; ibakakanaya na Yesu.

⁵ Petero mwabuga na Yesu ati, oMu kama, ryowene turi hano; tukokotaye ehitarikirire hisatu, kaguma busana nawe, na kaguma busana na Musa na kaguma busana na Elia.

⁶ Kusangwa siabya asi ekyo angabuga, ku sangwa babya ibakubaha kutsibu.

⁷ Nekitu mokyasukuliryabo, nomulenge mwalwa omo kitu ati, Yoyu Mugala wage mwanze; mumowe.

⁸ Neryo-neryo mobakebakeba mobatalangira mundu ni na Yesu iyowene.

Eriasa ryaElia

⁹ Nomugulu bandagala oko kitwa, mwahanabo ati sibabwire mundu nomuguma ebyo bamalolako, oMugala womundu asya bya alubuka oko baholi.

¹⁰ Neryo mobabika omwatsi oyo omukati-kati kabo bakabulanaya ngerilubuka oko baholi nga niki.

¹¹ Neryo mobamubulya bati, Busana naki abasaki baka buga bati Elia atolere eritsuka eriasa kwehi?

¹² Naye mwa subiryabo ati, Elia akatsuka eriasa erisubya emyatsi yosi; kandi kisakire kiti busana noMugala womundu kiti asyagalwa omo myatsi minene nerisiningulirwa kwehi?

¹³ Nikwa ngababwira nyiti Elia abiriasa, mobamukola ngoko banzire, ngoko kisakire busana naye.

Erilama ryomututsa

¹⁴ Babere bahika eyiri abiga, mobalangira endeko nene initimbire kubo, nabasaki bakakuba obuhaka nabo.

¹⁵ Neryo neryo endeko yosi yamabilola kubo moyasweka kutsibu, moba tibita erihindana naye mobamubukya.

¹⁶ Naye mwabulyabo ati, Mukakubisanaya nabo buhakaki kwehi?

¹⁷ Omuguma womondeko mwamusubirya ati, Mukangirirya, namakuletera mugala wage, kusangwa ari kwembinga itebuga;

¹⁸ naho ikamuhamba ikamutinira ahisi; akabimbaya erihulo iniarya meno wuwe iniabasa; nage monabulya abiga bawe baguseyo eyihya, nabo mobataluka.

¹⁹ Naye mwasubiryabo ati, Ilolo olulengo lutikirirye, nasyabya haguma nenyu omugulu gungahi kwehi? Nasyabalindirira omugulu gungahi kwehi? Munde tereye.

²⁰ Neryo mobamuletera omulwana; nomugulu ekirimu kyamulolako, neryo-neryo mokyamunyolanyola, naye mwayi lunda oko kitaka mwayigalagalya ahisi, mwabimbya erihulo omo buno.

²¹ Yesu mwabulya ise ati, Kyamutsuka omugulu wahi kwehi? Naye mwamusubirya ati, Kyamutsuka iniakine mwana.

²² Nengendo nyingi kikamugusa omo muliro nomo magetsi, erimwita; nikwa wamatoka erikola kindu, utuganyire utuwatikaye.

²³ Yesu mwabuga naye ati, Wamatoka! Emyatsi yosi ikatokekana oko oyu ukikiraya.

²⁴ Neryo-neryo ise womwana mwabuga kutsibu ati, Namikirirya; uwatikaye eriti ndikirirya ryage!

²⁵ Omugulu Yesu alangira endeko ikatibita haguma, mwakunga ekirimu kibi ati, Uwe kirimu kyemumu nekitsiha namakutegeka nyiti, umulweko, siwingire kandi omwisi wuwe na kera.

²⁶ Nenyuma kyamabilaka nerimunyola nyola kutsibu, mokyamulwako, nomulwana mwabya ngekinda; kyaleka hakuhi nabosi ibabuga bati, Abirihola.

²⁷ Nikwa Yesu mwamuwata oko byala, mwamuhangania, naye mwahangana.

²⁸ Neryo abere ingira omo nyumba, abiga buwe mobamubulya bubi-sobiso bati, Busana naki motukataluka erigusayo kwehi?

²⁹ Naye mwabuga nabo ati, Omusindo oyu siaritoka erihigwa mukindi rye nerisaba neritsira.

Yesu mwabisula amalige wuwe

³⁰ Mobalaba kandi erilwa eyo nerilaba eGalilaya. Naye isianzire omundu akaminya;

³¹ kusangwa abya akakangirirya abiga buwe, ati, Omugala womundu asyahoterwa omo byala byabandu, basyamwita; nomugulu amabiitwa, enyuma webiro bisatu asyalubuka.

³² Nikwa mobataminya eribuga eryo, kandi mobubaha erimubulya.

Obuhaka bwobukulu

³³ Neryo mobahika eKapernaumu; neryo abere ane omo nyumba mwabulyabo ati, Ekyo muryabya mukakubira obuhaka tune omo nzira niki kwehi?

³⁴ Nikwa mobabya bukutu; kusangwa omo nzira bakuba obuhaka oyo wangabya omukulu nga nindi.

³⁵ Neryo mwikala ahisi mwabirikira erikumi na babiri; mwabuga nabo ati, Omundu amasonda eribya weri mbere, abye wenyuma oko bosi nibya abye omugombe wabosi.

³⁶ Neryo mwaleta omwana mulere, mwamuhangania aho kati kati kabo; nerimuwatako omo byala biwe, mwabuga nabo ati,

³⁷ Oyu kakokaya omwana mulere ngoyu omo rina ryage akanyikokaya; noyu kanyikokaya siarinyikokaya nikwa oyo wanyituma.

³⁸ Yoane mwabuga naye ati, Mukangirirya, twamalola oko mundu akagusa esyombinga eyihya omo rina ryawe, motwa mukunga, kusangwa syabya akatukwama.

³⁹ Nikwa Yesu mwabuga ati, Simumukage; kusangwa sihari mundu oyu kakola omubiri akalakalire omo rina ryage oyo wangatoka eribuga nabi luba busana nage.

⁴⁰ Kusangwa oyute nzigu yetu ari oko luhande lwetu.

⁴¹ Kusangwa kwenene, ngabuga nenyu, oyu wasyabaha olutehi lwamagetsi eripulya kusangwa mukaheka erina rya Kristo, siendisyatalya oluhembo luwe na hake.

⁴² Noyu wasyaleka omuguma goko balere aba abakanyikiriraya akatwikala, eryowene ibasengera oluso lunene omo bikya biwe iniaguswa omo ngetsi.

⁴³ Okoboko kwawe kwamaleka ukatwikala, utweko; ryowene busana nawe eriingira omo ngebe mo kirema kwilaba eriingira nebyala bibiri omo kurimu, oko muliro owatetoka erihumberibwa. (

⁴⁴ Aho omuhuka wabo atehola, kandi nomuliro siarihumberibawa.)

⁴⁵ Nekisandu kyawe kyamaleka ukatwikala, utwekyo; ryowene busana nawe eriingira omo ngebe mokirema kwilaba eriguswa nebisandu bibiri omo kurimo (

⁴⁶ aho omuhuka wabo atehola, kandi nomuliro siarihumberibawa.)

⁴⁷ Neriso ryawe ryamaleka uka twikala, ukureryo; ryowene busana nawe eriingira omo bwami bwoMungu neriso riguma kwilaba eriguswa omo kurimu na meso abiri.

⁴⁸ Aho omuhuka wabo atehola, kandi omuliro siarihumberibawa.

⁴⁹ Kusangwa oburi mundu asyalengwako omo muliro ngomunyu.

⁵⁰ Omunyu owene; nikwa omunyu amatalya obusi bwago, imwasihya gumuki kwehi? Mubye nomunyu omwisi wenyu, kandi mubane obuholo omukati-kati kenyu.