Mariko 4 - Nouveau Testament et Psaumes en Ndandi Version 1962

Omusyo womubibi

¹ A Kandi mwatsuka erikangirirya oko musike wengetsi. Nendeko nene kutsibu moyahindana erimutimbako, kyo kyaleka iningira omo bwato mwikala mubo omo ngetsi; nendeko yosi moyabya oko musike wengetsi oko kitaka.

² Naye mwakangiriryabo myatsi mingi omo misyo, nomwikangirirya riwe mwabwirabo ati:

³ Muhurikirire! Omubibi mwaya biba embuto.

⁴ Nomugulu abiba, esindi mbuto mosyatogera oko nzira, nesyonyonyu mosyasa mosyatomengerasyo.

⁵ Esindi mbuto mosyatogera oko kitaka kyamabwe ahate mukungu mungi, neryo-neryo mosyalasa, kusangwa mutaka si muli-muli;

⁶ neryuba ryabere ryasingirira mosyahya, kusangwa sisiwite emirihi mosyoma.

⁷ Esindi mbuto mosyatogera omo mahwa namahwa mwalasa mwanigasyo, mositabuta embuto.

⁸ Nesindi esyombuto mosyatogera omo kitaka kyowene mosyabuta embuto, mosyalasa mosyakanya neributa ngendo makumi asatu namakumi endatu nerigana.

⁹ Neryo mwabuga ati, Oyu awite amatwi weriowa, owe.

¹⁰ Nomugulu abya iyowene, ababya bamutimbireko haguma nerikumi nababiri mobamubulya busana nemisyo eyo.

¹¹ Neryo mwabwirabo ati, Inywe mwabirihabwa eriminya ekibisamire kyobwami bwoMungu, nikwa busana nabari eyihya ebyosi biri omo misyo;

¹² neryo erilebya balangire, kandi sibalangire; neriowa bowe, sibaminye; na ritya ibatabinduka kandi neribu yirwabyo.

¹³ Neryo mwabuga nabo ati, Simwitaminya omusyo oyu kwehi? Neryo mwasyaminya emisyo yosi muti kwehi?

¹⁴ Omubibi akabiba eKinywa.

¹⁵ Nesiri oko nzira syesi, aho kinywa kikabibawa; abo babakowa, neryo-neryo Satani iyasa iyalusya eKinywa ekyabibawa omwisi syabo.

¹⁶ Nesyabibawa oko kitaka kyamabwe nabo baba omugulu bakowa eKinywa neryo-neryo bakangirirakyo nobutseme;

¹⁷ kandi sibawite omurihi omwisi wabo, bakasika akatambi kake; neryo, omugulu obulige neriendirerya bikahuluka busana nekinywa ekyo, neryo-neryo bakatswa,

¹⁸ Nesindi syenesyo sikabibawa omo mahwa; abo babakowa eKinywa,

¹⁹ nikwa eriyigenya rye kihugo nobutseme bwebindu, neriyitsutsa ebindi bindu, bikingira ibya niga eKinywa, ikitera.

²⁰ Nikwa esyo syaherawa oko kitaka kyowene babakowa eKinywa ibaligakyo ibabuta ebiguma, engendo amakumi asatu namakumi endatu nerigana.

Oluseke na kalengi

²¹ Neryo mwabuga nabo ati, Oluseke lukaletawa erihirwa omwisi wekitiri, kutse omwisi wengingo kwehi? butsira oko kikatekawa kwesiseke kwehi?

²² Kusangwa sihari ekibisamire, ekitindasyaminyikalibwa; kutse sihari kindu kibisamire, ekiti ndasyahika omo kyakakala.

²³ Omundu amabya namatwi weriowa, owe.

²⁴ Neryo mwabwirabo ati, Mulebaye ebyo mukowa; olulengero mukalengamo lo munemwendisyalenge rwamo, kandi mwasyahabwa kwilaba aho.

²⁵ Kusangwa oyu wite asyahabwa bingi kwilaba aho; kandi oyu tawite asyasa gulwa nekyalwa awite.

²⁶ Naye mwabuga ati, Obwami bwoMungu buringene nomundu oyo wagusanga embuto oko kitaka,

²⁷ mwagotsera kandi mwabuka omo kiro nomwitungi, nesyombuto mosyalasa mosyakula, isiasi ngasikakula siti.

²⁸ Ekitaka kikabuta ebiguma kyokyene, erimbere emigera neryo ehikoma, nenyuma waho erisohola, nenyuma waho amakundi awerire.

²⁹ Nikwa omu gulu embuto yamabiera, neryo-neryo akahira omutemi, kusa ngwa erigesa ryamahika.

³⁰ Kandi mwabuga ati, Twangaringirania obwami bwo Mungu naki kwehi? kutse omusyo wahi twasyatwa busana nabo kwehi?

³¹ Buringene nembuto ye haradali, eyo ikaherawa oko kitaka, ni kakekake oko mbuto syosi syamuna kihugo;

³² nikwa omugulu yamabiherwa ikakula iyabya nene oko biti byosi, ikalasaya emitahi mineneminene, nesyonyonyu syomo kyanya sikayira esyonyutu omo kitsutsu kyayo.

³³ Omo misyo mingi ngeyi mwabwirabo eKinywa, ngoko bangatoka eriowakyo;

³⁴ mwatabuga nabo atetwirabo musyo, nikwa mwaswakumburira abiga buwe ebyosi ahate bandi.

Yesu mwabonderya engetsi

³⁵ Noko kiro ekyo, erigologolo iryamabihika, mwabwirabo ati, Tusokere eyisirya.

³⁶ Mobasiga endeko, mobamutwala haguma nabo omo bwato, ngoko anabya. Nawandi mato abya haguma naye.

³⁷ Nerigunga inene yekihunga moyahuluka, nebisunda mobyayikuba omo bwato, nobwato mobwasonda eriusula.

³⁸ Nikwa abya enyuma omo bwato, iniayireto oko musegemo; neryo mobamubukya bati, OMukangirirya, sutu tsomene ko tukahwa kwehi?

³⁹ Naye mwabuka mwakunga erihunga, mwabuga nengetsi, ati, Obuholo! Ubye bukutu! Nerihunga moryumbya, kandi mohabya eriyibombeka.

⁴⁰ Naye mwabuga nabo ati, Busana naki mukubaha kwehi? Simuwite erikirirya kwehi?

⁴¹ Nabo mobusula nerisweka, mobabwirana bati, Kwoyu ni ndi, erihunga nengetsi bikamowa kwehi?