Mariko 3 - Nouveau Testament et Psaumes en Ndandi Version 1962

Owebyala byumire

¹ Kandi mwingira omo nyumba yeribindana, aho habya omundu owebyala byumire.

² Mobamutungerera, ambu balebaye nga kandimulamya omo sabatu, ibatoka erimuhandi kirira.

³ Neryo mwabuga nomundu owebyala byumire ati, Uhangane omukati-kati.

⁴ Kandi mwabuga nabo, Rinatolere omo bihano erikola ndeke kutse erikola ebibi omo sabatu, erilamya engebe kutse eriitayo kwehi? Nabo mobamubya bukutu.

⁵ Neryo mwatimbya ameso gokubo iniahitene, iniaka galawa busana nobutsibu bwabo bwomutima, neryo mwabuga nomundu oyo ati, Kakaya ebyala byawe. Naye mwakakyabyo, nebyala biwe mobyalama.

⁶ NabaFarisayo mobahuluka, neryo neryo mobaya embita haguma nabaHerodi ngoko bangatoka erimwita.

Bandu bangi mobalama

⁷ Yesu na biga buwe mobalwaho mobaya oko ngetsi, nendeko nene moyamukwama ikalwa eGalilaya; nabaYudea nibya

⁸ neYerusalema na Idumea neyisirya yeYorodani nabahere renie neTiro na Sidoni endeko nene, ibakowa ebyosi akola, mobasa ahari.

⁹ Naye mwabwira abiga buwe ati basikaye busana naye obwato buke bohakuhi busana nendeko, siyimwamatiraye;

¹⁰ kusangwa abirilamya bangi, kyaleka abosi ababya nesyo ndwala ibamuhatatania erimutulako.

¹¹ Nebirimu bibi omu gulu byamulolako, mobyagwa ahisi embere siwe mobyabirikira kutsibu biti, Uri Mugala woMungu.

¹² Naye mwategekabyo kutsibu sibimuminyikalaye.

Yesu mwayisoga

¹³ Neryo mwahetukira oko bitwa, mwabirikira abo asonda; nabo mobamuhikako.

¹⁴ Mwahirabo erikumi nababiri babye haguma naye, atumebo eritulago

¹⁵ neribya nehamuli erilusya esyombinga:

¹⁶ Simoni oyo aluka mo Petero;

¹⁷ na Yakobo omugala wa Zebedayo na Yoane mugala wabo Yakobo, nabo mwalukabo mo Boanerge, riti, Abagala bomulumo;

¹⁸ Anderea na Filipo, na Bartolomayo, na Matayo, na Toma, na Yakobo mugala wa Alufayo, na Tadeo na Simoni muKanana,

¹⁹ na Yuda Iskariota, oyo wamuhotera. Neryo mwakuluka;

Eritsuma eKirimu Kibuyirire

²⁰ Nendeko moyahindana kandi, nabo mobatatoka kutse erirya akaryo.

²¹ Nabira buwe babere bowa mobendiya mutsimba, bati, anganabya ini musire.

²² Nabasaki abandagala erilwa eYerusalema mobabuga bati, Ari ko Belzebuli, busana neribya mukulu wesyombinga akalusaya esyombinga.

²³ Naye mwabirikirabo, mwatwirabo emisyo ati, Satani anga toka erihiga Satani ati kwehi?

²⁴ Obwami bwamagabana omwisi wabo, obwami obo sibwangatoka erihangana.

²⁵ Ne nyumba yamagabana omwisi wayo, siyangatoka erihangana.

²⁶ Ne Satani yamahangana eriyirwania iyagabana, siyangatoka erihangana, nikwa iyamahika oko nduli yayo.

²⁷ Nikwa sihari omundu wangatoka eriingira omo nyumba yomundu wamaka akahunga ebindu biwe, atari atsuka eriboha omundu oyo wamaka; neryo anganatoka erihunga enyumba yiwe.

²⁸ Kwenene ngabuga nenyu, ebibi byosi byasyabugirwa abagala babandu, neritsuma emisindo yosi bakabuga;

²⁹ nikwa oyu katsuma eKirimu Kibuyirire siari neribuyirwa na kera, nikwa iniamakola ekibi kyakera nakera—

³⁰ kusangwa ibama bibuga bati, Awite embinga nyibi.

Nyinya na bagala babo

³¹ Kandi nyinya na bagala babo mobasa; bakahangana eyihya mobamutumirako mobamubirikira.

³² Nendeko yabya yikere inimutimbireko; nabo mobamubwira bati, Koyo wawe nabagala benyu bane ahihya, bakakusonda.

³³ Naye mwasubirya ati, Koyo ni ndi na bagala betu ni bahi kwehi?

³⁴ Kandi mwa timbya ameso oko babya bikere banamutimbireko, mwabwirabo ati, Hano ho koyo wage ari na bagala betu!

³⁵ Oburi mundu oyu kakola erisonda ryoMungu ni mugala wetu, na mwali wetu, na koyo.