Mariko 13 - Nouveau Testament et Psaumes en Ndandi Version 1962

Erihimbula hekalu

¹ Omugulu ahuluka akalwa omo ehekalu, muguma goko biga buwe mwabuga naye ati, Mukangirirya, lebaya, amabwe weriswekera angaha na manyumba weriswekera angaha!

² Yesu mwabuga naye ati, Wamalebya amanyumba aya manenemanene kwehi? Sihendisyasigala eribwe neriguma endata oko rindi, eritinda-syaguswa ahisi.

Emyatsi yomugulu wenyuma

³ Nomugulu abya ikere oko Kitwa kya Mizeituni ahisirya oko hekalu, Petero na Yakobo na Yoane na Anderea mobamu­bulya bubi-sobiso, bati,

⁴ Utubwire, ebyo nga byasyabya mugulu wahi, nekiminyikalo kyeribererera ryemyatsi eyi kya syabya kiti kwehi?

⁵ Yesu mwatsuka eribuga nabo ati, Mutegaye sihabye omundu ukabatalaya.

⁶ Abangi basyasa omo rina ryage, bati, Ingye ndi ye! basyatalya abangi.

⁷ Omugulu mwasyowa malwa negulu ya malwa, simusyehahukaya emitima; ebi bitolere ibyahika, nikwa enduli isiriyahika.

⁸ Kusangwa ekihanda kikandisyalwa nekindi kihanda, nobwami bwasyalwa nobundi bwami; hasyabya emisiki ehandi nehandi, hasyabya esyonzala; eki ni tsuka ryamagali.

⁹ Nikwa muyitegaye; kusangwa basyabahotela omwibuyiro; mwasyaswiriribwa omo manyumba werihindana; mwasyaha ngana embere syabasoki bakulu nabami busana nage, busana neritulago embere syabo.

¹⁰ Ritolere engulu yowene iyatsuka erikangiriribwa oko bihanda byosi.

¹¹ Nomugulu bakabaleta omo lubanza neribahotera, simusyeyiswekera embere nga mwangabugaki; nikwa mubuge ebyo mwasyahabwa oko ndambi eyo, kusangwa inywe mutendisyabuga, nikwa kyeKirimu Kibuyirire.

¹² Omugala wabo asyahotera omugala wabo ati itawe, nise womwana asyamuhotera, nabana basyalwa naba butabo ibitisyabo;

¹³ kandi mwasyakubwa obusu nabosi busana nerina ryage. Nikwa oyo wasyasika erihika oko nduli asyalamibwa.

¹⁴ Nikwa omugulu mwasyalangira ekyerihalya ekikaheraya ikinahangene ahatatolere (Oyu kasoma aminye), abari eYudea basagire oko bitwa;

¹⁵ noyuri endata oko nyumba siakime kutse singire omo nyumba eriheka ekindu;

¹⁶ noyuri mwirima siasubire olukimba luwe.

¹⁷ Nikwa obulige oko bakule noko bakaha abana mabere oko biro ebyo!

¹⁸ Musabe sibibye oko mugulu weritsuku.

¹⁹ Kusangwa oko biro ebyo hasyabya amagali owataheretabya eritsuka erihangika eryo Mungu ahangika eriswahika na lino, kandi siendisyabyaho na kera.

²⁰ Kandi kumbe oMukama atakuhihya ebiro, nga sihari mundu angalamibwa; nikwa busana nabayisogawa, abo ayisoga, mwa kuhihya ebiro.

²¹ Noko mugulu oyo omundu amabuga nenyu ati, Langira, Kristo ane hano! kutse Langira, ari erya! isi mwaliga.

²² AbaKristo bamabehi nabaminyereri bamabehi basyahangana basyakangya ebitikotiko nebyeriswekera, eritalya abayisogawa, kyamatokekana.

²³ Nikwa mutegaye; nabiriba bwira emyatsi yosi iteyabya.

²⁴ Nikwa oko biro ebyo, enyuma wamagali, eryuba ryasyabya mwirimya, nomukera siendisyaswakola,

²⁵ nesyongununu sya syatogonga erilwa elubula, nebymaka ebyomo lubula byasya tengatenganibwa.

²⁶ Neryo basyalangira oMugala womundu akasa omo bitu neritoka rinene nolukengerwa.

²⁷ Neryo asyatuma abamalaika, asyahindania abo ayisoga erilwa oko mahunga ani, erilwa oko syonduli sye kihugo erihika oko nduli yelubula.

²⁸ Mwiyire oko omusyo womuti womutini: omugulu akato heraya omutahi wago akabya molomolo akalasaya ebikoma byago mukaminya ko mututa ari hakuhi.

²⁹ Ritya, omugulu mwasyalangira emyatsi eyi ikabyaho, imwaminya kwari hakuhi, kwamahika okwirimbo.

³⁰ Kwenene, ngabuga nenyu, olulengo olu si lwendisyalaba emyatsi eyi iteyabererera.

³¹ Elubula ne kihugo byasyalenga, nikwa ebinywa byage sibyendisyalaba.

³² Nikwa ekiro ekyo kutse endambi eyo sihari wasi, nomo bangabya abamalaika omo lubula, kutse oMugala, nina Tata.

³³ Mutegaye, mulebaye; musabe, kusangwa simwasi nga ni mugulu wahi.

³⁴ Riringene nomundu oyu kagenda olugendo omo kindi kihugo, akasiga enyumba yiwe kandi akasigira abagombe buwe, oburi mundu nomubiri wuwe, iniakategeka omuteya woluyi erilebya.

³⁵ Neryo mutegaye—kusangwa simwasi omugulu omukama mwenye nyumba asyasa, omwigolo golo, kutse omukati kanene, kutse engoko yahasabo, kutse bwasesukala—

³⁶ akasyababurikirania akeya imune to.

³⁷ Nebyo ngabuga nenyu ngabuga nabosi: nyiti, Mutegaye.