Mariko 10 - Nouveau Testament et Psaumes en Ndandi Version 1962

Erihikya nerikomola

¹ Neryo mwalwa eyo mwaya omo kihugo kyeYudea nekyeyisiria yeYorodani, nesyondeko mosyahindana ahari kandi; nakandi mwakangiriryabo, ngoko anatula akakola.

² AbaFarisayo mobasa ahari mobamubulya busana nerimu lengako bati, Rinatolere omo bihano omundu erihiga mukaliwe kwehi?

³ Naye mwasubiryabo ati, Musa mwabategekeraki kwehi?

⁴ Nabo bati, Musa mwaha mundu ehamuli yerisaka ebarua yerikomola, nerimuhiga.

⁵ Nikwa Yesu mwabuga nabo ati, Busana nerikala ryemitima yenyu mwabasakira ekihano eki.

⁶ Nikwa okwitsuka ryerihangika, Mungu mwabumbabo omu lume nomukali.

⁷ Busana nomwatsi oyo omundu asyasiga ise na nyinya wuwe asyabegerania na mukaliwe,

⁸ na babiri basyabya omubiri muguma. Na ritya isibakiri babiri, nikwa omubiri muguma.

⁹ Neryo abo Mungu abiribegerania haguma, sihabye mundu ukagabulabo.

¹⁰ Nomo nyumba abiga mobamubulya akandi busana no­mwatsi oyo.

¹¹ Naye mwabuga nabo ati. Oburi mundu oyu kakomola mukaliwe akahikya ogundi, iniakasingira;

¹² naye amalwa oko iba wuwe akahikibwa nogundi, iniakasingira.

Yesu mwatsumula abana

¹³ Neryo mobamuletera abana balere ambu atule kubo; nabiga mobakungabo.

¹⁴ Nikwa Yesu abere alangira ekyo mwahitana, mwabuga nabo ati, Muleke abana balere base kwingye, simukakirayebo; kusangwa abari batya obwami bwo­Mungu ni bwabo.

¹⁵ Kwenene, ngabuga nenyu, oyu tindasya ngirira obwami bwoMungu ngo mwana mulere siendisingira mubo na hake.

¹⁶ Neryo mwawata kubo omo maboko wuwe mwatsumulabo, mwahira kubo kwebyala biwe.

Owebindu bingi

¹⁷ Omugulu asonda eritsuka olugendo luwe, omundu mwa mutibitako mwamukukamira mwamubulya ati, Mukangirirya Mubuya, nangakolaki eribana erilagwa engebe yerikota kwehi?

¹⁸ Yesu mwabuga naye ati, Busana naki ukanyahula mo mubuya kwehi? Sihari mubuya yono muguma oMungu.

¹⁹ Unasi ebihano ambu: Siwite, Isiwasingira, Isiwiba, Isiwabihira abandi, Isiwateba, Usikaye tata wawe na koyo wawe.

²⁰ Naye mwa­buga naye ati, Mukangirirya, Ebyosi ebi nabirikolabyo eritsuka omo bwana bwage.

²¹ Yesu erimusamalira mwamwanza, mwamubwira ati, Ukisiya kiguma; genda, ugulaye ebyosi uwite, uhe abera, wasyabya nebindu elubula; kandi wase, ungwame.

²² Busana nekinywa ekyo obuso buwe mobwasunza, mwagenda nobulige; kusangwa abya awite bindu bingi.

Eriitisya ryebindu

²³ Kandi Yesu mwatimbya ameso mwabwira abiga buwe ati, Monzo rikalire busana nabo bawite ebindu eriingira omo bwami bwoMungu!

²⁴ Abiga mobasweka oko binywa biwe. Nikwa Yesu mwabuga nabo kandi, ati, Abana, Monzo rikalire oko bakayiketera ebindu eriingira omo bwami bwoMungu!

²⁵ Ni ryolo busana nengamia erilaba omo kyuna kyenzanza kwilaba omundu webindu eriingira obwami bwoMungu.

²⁶ Nabo mobasweka kutsibu, bati, Byamabya ikobiri bitya ni ndi wasyatoka erilamibwa kwehi?

²⁷ Yesu mwasamalirabo mwabwirabo ati, Ekyo sikitokekana oko bandu, nikwa oko Mungu sibiri bitya; kusangwa ebyosi bikatokekana oko Mungu.

²⁸ Petero mwatsuka eribuga naye ati, Langira, twamasiga ebyosi twamakukwama.

²⁹ Yesu mwabuga ati, Kwenene nga buga nenyu, sihari oyu wamasiga enyumba kutse bagala babo kutse bali babo kutse nyinya kutse ise kutse abana kutse ebitaka busana nage, na busana nengulu yowene,

³⁰ oyu tinda-simya engendo igana oko mugulu wa lino, na manyumba na bagala babo na bali babo nabokoyo na bana nebitaka, haguma neri endereribwa, nengebe yerikota oko mugulu akandisyasa.

³¹ Nikwa bangi bemuliro basyabya benyuma, nebenyuma basyabya bemuliro.

Eriagalwa rya Yesu

³² Neryo babya omo nzira bakahetuka bakaya eYerusalema, Yesu abya akagenda embere syabo; nabo mobasweka, nabamu kwamire mobubaha. Neryo mwatwala erikumi na babiri kandi, mwatsuka eribwirabo ebyasonda eribya kwiye,

³³ ati Tunge rera, tukahetuka eriya eYerusalema; nomugala woMundu asyahoterwa oko bahereri bakulu nabasaki, basyamutswera olubanza lwerimwita, kandi basyamuha oko Bihanda;

³⁴ ba syamusiningurira, basyamutwira kwa matandi, basyamuswirya emikoba, ibamwita; nenyuma webiro bisatu inialubuka.

Yakobo na Yoane

³⁵ Na Yakobo na Yoane, abagala baZebedayo, mobamuhi kako, mobamubwira bati, oMukangirirya, tukasonda utukolere ekyosi tukakusaba.

³⁶ Neryo mwabuga nabo ati, Mukasonda inabahaki kwehi?

³⁷ Mobamusubirya bati, Utuhe eriikala, omuguma oko byala byamali byawe nogundi oko malembe wawe, omo lukengerwa lwawe.

³⁸ Nikwa Yesu mwabwirabo ati, Simwasi ekyo mukasaba. Mwangatoka eripulirya oko olutehi ngapulayako, kutse eribatisibwa omwibatisya nasya batisibwamo kwehi?

³⁹ Nabo mobamubwira bati, Twangana toka. Yesu mwabuga nabo ati, Olutehi olo nasyapulyako mwasyapulirya kulo; kandi eribatisibwa ngabatisibwamo, mwa syabatisibwa muryo;

⁴⁰ nikwa eriikala oko byala byage byamali kutse oko malembe wage siryage eribaharyo, nikwa ni ryababirikokoteribwaryo.

⁴¹ Omugulu erikumi bowa ekyo, mobatsuka eriagalirwa uku Yakobo na Yoane.

⁴² Yesu mwa birikirabo mwabuga nabo ati, Munasi abakayahula mo batabali beBihanda bakatabalirabo nehamuli, nabakulu babo bakatege kabo.

⁴³ Nikwa siryendisyabya ritya omukati-kati kenyu; nikwa oyu kasonda eribya omukulu ukwinywe abye atolere iniabya omugombe wenyu,

⁴⁴ noyu kasonda eribya werimbere ukwinywe abye omukobe wabosi.

⁴⁵ Kusangwa oMugala womundu mwatasa erikolerwa, nikwa erikolera, neriha engebe yiwe mo ndongolya busana na bangi.

Endimatime yeYeriko

⁴⁶ Neryo mobahika eYeriko; nomugulu abya akalwa eYeriko na biga buwe na bandu bangi, omugala wa Timayo, ye Bara timayo, endimatime eyikasabiriraya abya ikere oko musike wenzira.

⁴⁷ Neryo abere owa kwari Yesu wa Nazareti, mwatsuka eribirikira kutsibu ati, Yesu Mugala wa Dawidi, unyi genyere!

⁴⁸ Neryo abangi mobamukunga, ambu abye bukutu; nikwa mwabirikira kwilaba kwaho ati, Mugala wa Dawidi unyigenyere!

⁴⁹ Yesu mwahangana, mwabuga ati, Mumu birikire. Neryo mobabirikira endimatime, bati, Usikaye omutima; uhangane, amakubirikira.

⁵⁰ Nerigusa ekanzu yiwe mwahangana, mwahika uku Yesu.

⁵¹ Yesu mwabuga naye ati, Ukasonda inakuyira nyiti kwehi? Endimatime moyabuga naye, ati, Mukama, Nyibane erilangira ryage.

⁵² Yesu mwabuga naye ati, Uyigendere; erikirirya ryawe ryamakulamya. Neryo-neryo mwabana erilangira riwe mwamukwama omo nzira.