Luka 9 - Nouveau Testament et Psaumes en Ndandi Version 1962

Yesu akatuma abiga eritulago

¹ Kandi mwabirikira erikumi na babiri mwahindanyabo mwahabo amaka nehamuli oko syombinga syosi nerilamya amakoni,

² mwatumabo eritula omwatsi wobwamibwo Mungu nerilamya abakoni.

³ Neryo mwabuga nabo ati, Simuheke kindu busana nolugendo lwenyu, kutse mutso, kutse engunza, kutse obundu, kutse esyofaranka; kandi simubye nesyokanzu ibiri.

⁴ Nenyumba yahi mwasingiramo, mwikalemo, erihika aho mwasyalwirayo.

⁵ Naho ehosi bakagana eribakokya, omugulu mukalwa omo muyi oyo mukungute olututu omo bisandu byenyu ngo mulangiri kubo.

⁶ Neryo mobalwayo mobalaba omo hiyi, neritula engulu yowene nerilamya abehosi.

Herode akasonda erilola uku Yesu

⁷ Nikwa oMwami Herode mowa ebyosi byakolawa, mwa hangahangya kusangwa mokyabugwa ambu Yoane abirilubu kibwa oko baholi,

⁸ nabandi bati Elia abiriswahuluka, nabandi bati omuguma wokobaminyereri bakera yo walubukire.

⁹ Herode mwabuga ati, Yoane monamutwa ko mutwe; nikwa oyo nindi oyo namowa kwemyatsi eyi kwehi? Nikwa mwa sonda erimulolako.

Yesu akugutaya abandu 5000

¹⁰ Neryo omugulu abakwenda basubula mobamubwira emyatsi eyo bakola. Naye mwatwalabo bobene oko muyi owakahulawa mo Betesaida.

¹¹ Nesyondeko syabere syaminya, mosyamukwama; naye mwakokyabo mwatulirabo ebyobwami bwoMungu, mwalamya ababya nobwaga bwerilamibwa.

¹² Nikwa bwabere bwasonda erihumbera; erikumi nababiri mobamuhikako bati, Ulagane nendeko, bagende omo hiyi nomo kihugo ekihererenie naho, erigotsera neribana akaryo; kusangwa turi mo kisuki.

¹³ Nikwa mwabwirabo ati, Muhebo akerirya. Nabo mobabuga bati, Situwite ebindi wana mandu atanu namahere abiri—twamatindaya gula ebyalya busana nabandu aba bosi.

¹⁴ Kusangwa habya abalume nga maelfu atanu. Naye mwabuga nabiga buwe ati, Mwikalayebo mondekondeko amakumi atanu-atanu.

¹⁵ Nabo mobakola batya, mobikalya bosi.

¹⁶ Neryo mwimya amandu atanu namahere abiri mwalalamira elubula, mwatsumulabyo mwata hangulabyo, mwahabyo oko biga bahirebyo emuliro wendeko.

¹⁷ Nabosi mobarya mobuguta. Moba-songa-songya ebyasaka, ebitiri ikumi nebibiri byebitahangukira.

Yesu yona Kristo

¹⁸ Nikwa omugulu abya akasaba iyowene abiga babya haguma naye; neryo mwabulyabo ati, Abandu bakabuga bati, Ingyendikwehi?

¹⁹ Mobamusubirya bati, Yoane Mubatisa; nikwa abandi bati, Elia; nabandi, bati muguma woko bami nyereri bakera abirilubuka.

²⁰ Naye mwabuga nabo ati, Nikwa nenyu mukabuga muti ingye ndi kwehi? Petero mwasubirya ati, Kristo woMungu.

²¹ Nikwa mwahanabo mwategekabo ati sibabwire mundu mwatsi oyu,

²² ati, oMugala womundu atolere eriagalwa omo myatsi mingi, neriganwa na bakulu nabahereri bakulu nabasaki, initwa, nerilubukibwa ekiro kyebisatu.

Eriyilandako

²³ Kandi mwabuga nabosi ati, Omundu amasonda eri ngwama, ayigane aheke omusalaba wuwe ebiro byosi angwame.

²⁴ Kusangwa oyu kasonda erilamya engebe yiwe asyatalyayo; noyu katalaya engebe yiwe busana nage, asyalamyayo.

²⁵ Ku sangwa ni ndundi yahi oko mundu amabana e kihugo kyosi akayitalya kwehi?

²⁶ Kusangwa oyu kakwa esisoni busana nage na busana nebinywa byage, oMugala womundu asyakwa esisoni busana naye omugulu asyasa omo lukengerwa luwe nolukengerwa lwise wuwe nolwa balaika babuyirire.

²⁷ Nikwa ngababwira kwenene, hari bandi oko bahangene hano aba tindisyagerya oluholo batebalangira obwami bwoMungu.

Yesu mwahindukibwa

²⁸ Kandi enyuma weribuga ebi ngebiro munani byamabikya mwatwala haguma naye Petero na Yoane na Yakobo, mwahe tukira oko kitwa erisaba.

²⁹ Abere anemosaba, erisosa ryobusu buwe moryahinduka, nesyongimba siwe mosyahenia nerika ngabania.

³⁰ Kandi lebaya, bandu babiri mobakania naye, babya ye Musa na Elia,

³¹ ababutuka nolukengerwa ibakaka naya omwatsi woluholo luwe olo akandisyaberererya eYerusa lema.

³² Nikwa Petero nababya naye mobayitsingirako notugotseri nikwa isibetayato, mobalangira olukengerwa luwe nabandu babiri ababya bahangene haguma naye.

³³ Nomugulu abandu abo basonda erigabana naye. Petero mwabuga na Yesu ati, Mukama, Ryowene itwe turi hano; tuhimbe ehinyumba hisatu, akaguma busana nawe, na kandi busana na Musa, na kandi busana na Elia—isiasi ekyo akabuga.

³⁴ Abere anemobuga ebi, ekitu mokyasa mokyasukulirabo; nabo mobubaha omugulu bingira omo kitu.

³⁵ Nomulenge mwalwa omo kitu, ati, Oyu ni Mugala wage, Musombolwa wage; momowe!

³⁶ Nomulenge abere abibuga, Yesu mwabanikaho iyowene. Nabo mobabya bukutu mobatabwira omundu emyatsi eyo balangira.

Omututsa

³⁷ Nomungyakya, babere babiandagala oko kitwa, endeko nene moyahindana naye.

³⁸ Lebaya, omundu wokondeko mwabuga nomulenge munene ati, Mukangirirya, ngakugonga gonga ulebaye mugala wage, kusangwa yonambutire iyowene;

³⁹ kandi lebaya, ekirimu kikamuhamba, inialaka; kikamusala salaya iniabimbya erihulo, kikamuhunza, sikirimuleka luba.

⁴⁰ Monagonga-gonga abiga bawe nyiti baguse kyeyihya, mobataluka.

⁴¹ Yesu mwasubirya ati, Inywe lulengo lweriti ndiikirirya nolwobuhaka, nasikala nenyu omugulu gungahi neribabegerya kwehi? Ulete omugala wawe yo hano.

⁴² Neryo abere anemwasa embinga moyamusatya moyamusalasalya. Nikwa Yesu mwakunga ekirimu kibi ekyo, mwalamya omu lwana, mwamusubya kwise wuwe.

⁴³ Nabosi mobaswekera obukulu bwoMungu. Nikwa omugulu barimusweka busana nemyatsi yosi akola, mwabuga nabiga buwe ati,

⁴⁴ Muhire ebinywa ebi omu matwi wenyu; kusangwa Mugala womundu akandisyahotelwa omo byala byabandu.

⁴⁵ Nikwa mobata minya ekyo abuga mokyabiswa kubo, sibaminyekyo; kandi mobubaha erimubulya omwatsi oyo.

Nindi yo munene

⁴⁶ Neryo mobakuba obuhaka omukati-kati kabo nga nindi wakubo yo mukulu.

⁴⁷ Nikwa Yesu amabiminya oburingikania bwemitima yabo, mwimya omwana mwamuhanganya oko luhande luwe,

⁴⁸ mwabuga nabo ati, Oyu kakokaya omwana oyu omo rina ryage iniakanyikokaya, noyu kanyikokaya iniaka kokaya oyo wanyituma; kusangwa oyuri mukemuke omukati kati kenyu yo mukulu.

⁴⁹ Yoane mwasubirya ati, Mukama twamalola oko mundu akahiga esyombinga omo rina ryawe, motwamukaga, kusangwa siarikwama haguma netu.

⁵⁰ Nikwa Yesu mwabuga naye ati, Simumukage; kusangwa oyute enzigu yenyu iniari oko luhande lwenyu.

AbaSamaria bakagana Yesu

⁵¹ Neryo ebiro biwe byeritwalwa endata byabere byabya hakuhi, mwabya namaha weriya eYerusalema. Mwatuma abakwenda emuliro wuwe,

⁵² abagenda omo muyi weba Samariya, erikokotya ahangahikira;

⁵³ nikwa abandu moba tamukokya, kusangwa mwabya ngakalabira eYerusalema.

⁵⁴ Kandi omugulu abiga buwe Yakobo na Yoane babere babilangira ekyo, mobabuga bati, Mukama ukasonda uti tutegeke omuliro eriandagala erilwa elubula neribugabo kwehi?

⁵⁵ Nikwa mwakeberabo mwakungabo, mwabuga ati, Simwasi omusindo wekirimu muriko; kusangwa Mugala womundu siasa neriherya esyongebe syabandu nikwa erilamyasyo.

⁵⁶ Nikwa mobaya oko gundi muyi.

Erikwama Yesu

⁵⁷ Neryo babere bakagenda omo nzira, omundu mwabuga naye ati, Ngandikukwama ehosi ukandiya.

⁵⁸ Yesu mwabuga naye ati, Esyoboha sinawite ebyuna, nesyonyonyu syomokyanya sinawite esyonyutu; nikwa Alugala womundu siawite aheri hira omutwe wuwe.

⁵⁹ Mwabuga nogundi ati, Unyikwame. Nikwa mwabuga ati, Mukama nyitange eriyata tata.

⁶⁰ Nikwa mwabuga naye ati, Leka abaholi bate abaholi babo; nikwa uwe, ugende utulego ogo bwami bwoMungu.

⁶¹ Nogundi mwabuga ati, Ngandikukwama Mukama; nikwa uleke ngaya lagana na benyumba yage.

⁶² Yesu mwamubwira ati, Sihari oyu kawata okwisuka akakebera enyuma akatolera obwami bwo Mungu.