Luka 8 - Nouveau Testament et Psaumes en Ndandi Version 1962

Omusyo womuheri wembuto

¹ Enyuma kwaho hake mwalaba omo miyi nehiyi, eritulago nerileta engulu yowene yobwami bwoMungu. Nerikumi nababiri babya haguma naye,

² nibya abandi bakali abalamibawa kwe birimu bibi nesyondwala: ye Maria oyu kahulawa mo Magdalene, oyo walusibawa kwesyombinga sirinda,

³ na Yoana, muka Kuza, mubiki webindu byeHerode, na Suzana, nabandi bangi ababya bakamuwatikya omo bindu byabo.

⁴ Omugulu endeko nene nabandu bakalwa oko buri muyi bahindana ahabya, mwatwirabo omusyo ati:

⁵ Omubibimwaya biba embuto yiwe; nomugulu abiba, esindi mosyawa omo nzira, mosyalyatangirirwa, nesyonyoyu syomo kyanya mosyatolasyo.

⁶ Nesindi mosyawa okwibwe; nomugulu syalasa, mosyoma, kusangwa syabula amagetsi.

⁷ Nesindi mosyawa omo mahwa; namahwa mwalasa haguma nasyo mwanigasyo.

⁸ Nesindi mosyawa omo kitaka kyowene mosya lasa, neributa esyombuto erigana. Abere akabuga ebi, mwa birikira ati, Oyu wite amatwi weriowa, owe.

⁹ Kandi abiga buwe mobamubulya ngo musyo oyo akahulaki,

¹⁰ Naye mwabuga ati, Mwabirihabwa eriminya ebibisamire byobwami bwoMungu; nikwa busana nabandi biri mo misyo, erilangira sibalangire, neriowa sibaminye.

¹¹ Nikwa omusyo woyu: Embuto kye kinywa kyoMungu.

¹² Abo monzira ba babiriowa; neryo Satani ikasa nerilusya eKinywa omo mitima yabo, ibatatoka erikirirya nerilamibwa.

¹³ Nabo okwibwe babo omugulu bakowa eKinywa, bakangirirakyo nobutseme; nikwa sibawite emirihi, bakikiriraya akatambi kake noko mugulu werilengwako bakatswa.

¹⁴ Nesyawa omo mahwa, ba bakowa, nikwa babiyigendera ibanigwa omo maganiryo nebindu neriyitsemesya ryengebe eyi, nebiguma byabo ibitera.

¹⁵ Neyo ko kitaka kyowene, babo abakowa eKinywa, bakahambakyo ndeke omo mutima owakwenene ogowene, ibabuta biguma neritindaluha.

Omusyo woluseke

¹⁶ Sihari oyu kakaya oluseke akakuningiralo omwirega kutse erihiralo omwisi wengingo, nikwa akahiralo oko butara, abakingira ibatoka erilangira ekyakakala.

¹⁷ Kusangwa sihari ekibisamire ekitindasyaminyikalibwa, kutse sihari kindu ekibu rirene ekitindasyaminywa nerihika omokyakakala.

¹⁸ Mulebaye ngoko mukowa; kusangwa oyu wite asyahabwa ebindi, noyu tawite asyasagulwa ebyo akaganiraya ati awite.

Nyinya na bagala babo Yesu

¹⁹ Neryo nyinya wuwe nabagala babo mobamunikako, nikwa mobatatoka busana nendeko.

²⁰ Neryo mwabwirwa bati, Koyo wawe nabagala benyu banahangene ahihya, bakasonda eriku lolako.

²¹ Nikwa mwabuga nabo ati, Koyo wage na bagala betu banabo abakowa eKinywa kyoMungu nerikolakyo.

Yesu akabonderaya engetsi

²² Neryo ekiro kiguma mwingira omo bwato haguma nabiga buwe, neryo mwabuga nabo ati, Tusokere eyisirya wengetsi. Neryo mobahongoka,

²³ Babere banemotarikya iye mwayato. Nekikomo mokyandagala omo ngetsi nabo mobasonda eriusula mwa magetse, ibakahwa.

²⁴ Neryo mobaya mubukya bati, Mukama, Mukama, tukahwa! Naye mwabuka mwakunga ekihunga nerikarama ryebisunda; nabyo mobyumbya, mohabya isyerere.

²⁵ Naye mwabuga nabo ati, Erikirirya ryenyu riri hahi kwehi? Nabo mobubaha, mobasweka, mobabwirana bati, Oyu ni mundundi oyu kategeka erihunga namagetsi, ibyamowa kwehi?

Yesu akahiga esyombinga

²⁶ Neryo mobahika omo kihugo kyabaGerase, ekiri eyisiria weGalilaya.

²⁷ Neryo abere akalwa mubo ahika oko kitaka omundu mwahindana naye akalwa oko muyi iniari kwesyo mbinga; kusangwa oko mugulu muli isiariambala olukimba, isiaribya omo nyumba nikwa omukati-kati kesisinda.

²⁸ Abere alola uku Yesu, mwabirikira mwawa ahisi embere siwe, mwa buga nomulenge munene ati, Ukanyiyira uti, Yesu, Mugala woMungu wEndata Kutsibu kwehi? Ngakugo, sunyagalaye.

²⁹ Kusangwa iniamabitegeka ekirimu kibi ekyo ati kilwe omo mundu oyo. (Kusangwa engendo nyingi kika muhamba; iniakategibawa, neribohwa omo mahulula nemisege, nikwa mwatwa emisege eyo mwatsurumibwa nembinga eyo omo mbwarara.)

³⁰ Neryo Yesu mwamubulya ati, Erina ryawe uwendi kwehi? Naye mwabuga ati, Emilondo; kusangwa esyombinga nyingi isyamabimuhikako.

³¹ Mosyamugonga gonga siti siategekesyo eriya omo kyuna.

³² Nikwa ekihyo kinene kyesyongurube kyabya ikikarira oko kitwa; nasyo mobyamugo-ngagonga eriingira musyo. Naye mwahasyo eha muri erigenda.

³³ Neryo esyombinga mosyalwa oko mundu oyo mosingira omo syongurube, nekihyo mokyatibita aha senzegerere erihika omo ngetsi mosyasenda.

³⁴ Abalisya babere balangira ekyamabya, mobatibita, mobatulago eka nomo kihugo.

³⁵ Neryo abandu mobayalebya ekyamabya, mobahika aho Yesu abya, mobeya omundu oyo walwa kwesyombinga inianikere oko bisandu bya Yesu, inianambite iniabiriswabya namenge wuwe; mobubaha.

³⁶ Nabalola kukyo mobabwirabo ngoko oyu lwe kwesyombinga arialamibawa.

³⁷ Neryo abandu bosi abe kihugo kyebaGerase ekitimbireho mobamubulya bati, alwe kubo; kusangwa mobakwa obuba bungi; neryo mwingira omo bwato mwasubula.

³⁸ Nomundu oyu walwa kwesyombinga mwamugonga-gonga ati abye naye; nikwa mwalagana naye ati,

³⁹ Suba eka ewawe, utulego ebinene ebyo Mungu abirikukolera. Neryo mwagenda, eritulago omo muyi gosi ebinene ebyo Yesu abirimukolera.

Mwali wa Yairo nomukali wendwala yomusasi

⁴⁰ Nikwa omugulu Yesu asubula, endeko moyamukokya, kusangwa abosi babya ibakamulindirira.

⁴¹ Kandi lebaya mohasa omundu oyu kahulawa mo Yairo, oyo wabya omurongani wenyumba yerihindana; neriwa oko bisandu bya Yesu mwamugonga-gonga ati, aye omo nyumba yiwe,

⁴² kusangwa abya awite mwali iyanabutire iyowene, erikula riwe inirya mituta ngikumi nibiri, abya iniakalekula. Nikwa omugulu agenda, abandu mobamuhatatania.

⁴³ Nomukali oyo wabya akwire erisenda ryomusasi emituta ikumi nibiri oyo wabiribuyira ebindu biwe byosi oko basaki, mwatatoka erilamibwa nomundu,

⁴⁴ mwasa enyuma kwiye, mwatula oko ndambi yolukimbe luwe; neryo-neryo erisenda riwe ryomusasi moryumbya.

⁴⁵ Yesu mwabuga ati, Nindi wamanyitulako kwehi? Omugulu abosi bayigana, Petero mwa buga ati, Mukama, esyondeko sikakutimbako nerikuhatatania!

⁴⁶ Nikwa Yesu mwabuga ati, Omundu amanyitulako; kusangwa namaminya kwa kagala kamabinyilwako.

⁴⁷ Omukali abere alangira kwatabisamire, mwasa akatitimana, mwawa ahisi embere siwe mwatulago embere syabandu bosi ekirialeka iniamutulako, kandi ngoko ainalamibwa neryo-neryo.

⁴⁸ Neryo mwabuga naye, Mwali, erikirirya ryawe ryamabikulamya; ugende obuholo.

⁴⁹ Nomugulu abya akabuga, mohasa omundu akalwa omo nyumba yomurongani wenyumba yerihindana ati, Mwali wawe aholire; suluhaye Mukangirirya kandi.

⁵⁰ Nikwa Yesu mowa ekyo mwamusubirya ati, Sigubahe; wikiriraye risa akandilama.

⁵¹ Abere ahika oko nyumba, mwataliga mundu akingira haguma naye, nina Petero na Yoane na Yakobo, nise womwana na nyinya.

⁵² Nabosi babya bakarira nerimususumanira; nikwa mwabuga ati, simurire; kusangwa siaholire nikwa agotsere.

⁵³ Nabo mobamusekererya, ibanasi kwaholire.

⁵⁴ Nikwa mwa muwata oko byala mwabirikira, ati, Mwana, hangana.

⁵⁵ Nekirimu kiwe mokyasubula, neryo-neryo mwahangana; neryo mwategekabo ati bamuhe ebyerirya.

⁵⁶ Neryo abamubuta mobasweka; nikwa mwategekabo ati sibabwire omundu ebya makolwa.