Luka 7 - Nouveau Testament et Psaumes en Ndandi Version 1962

Omukulu wabasoda

¹ Neryo abere abibuga ebinywa biwe byosi omo matwi wabo abamowa mwingire eKapernaumu.

² Nikwa habya omu­kulu wabasoda iniawite omukobe oyo abya anzire kutsibu, abya alwere hakuhi nerihola.

³ Omugulu owa engulu ya Yesu, mwamutuma kwa bakulu babaYuda erimugonga-gonga ati ase alamaye omukobe wuwe.

⁴ Nomugulu bahika uku Yesu, mobamugonga-gonga kutsibu, bati, Atolere iwamukolera eki,

⁵ kusangwa anzire ekihanda kyetu, kandi abirituhimbira enyumba yetu yerihindana.

⁶ Neryo Yesu mwagenda nabo. Abere ahika hakuhi nenyumba, omukulu wabasoda mwamu tumako abira buwe, ati, Mukama suyiluhaye, kusangwa sinyi tolere ukingira omo nyumba yage;

⁷ kyaleka inaringikania ko nyitatolere erikuhikako. Nikwa ubuge eKinywa kisa, omukobe wage abane erilamibwa.

⁸ Kusangwa nage ndi mundu weha muli, ngwite abasoda abo ngategeka: ngabuga nomuguma oyu nyiti Genda, iniagenda; noko gundi, Asa, iniasa; noko mukobe wage nyiti, Koleki, iniakolakyo.

⁹ Omugulu Yesu owa ebi mwamuswekera, mwakeba mwabuga nendeko eyamukwama, ati, Ngababwira, nyiti sinditabana erikirirya eririgene neri kutse omo Israeli.

¹⁰ Abatumawa babere basuba omo nyumba, mobeya omukobe oyo iniabirilama.

Yesu mwalubukya omugala wa Mukwakali

¹¹ Enyuma waho akatambi kake mwaya oko muyi owaka hulawa mo Naina, nabiga buwe nabandu bangi mobagenda naye.

¹² Neryo omugulu ahika hakuhi neririmbo ryomuyi, lebaya, habya oyu holire iniahekirwe erihulukiribwa ekyaswa, ini mugala iyo nyinya anabutire iyowene, naye abya mukwakali; na bandu bangi abeka babya haguma naye.

¹³ OMukama abere amulolako, Mwamuganyira mwabuga naye ati, Surire.

¹⁴ Neryo mwasa mwatula okwisanduku eriri mwe kinda, nabamuhekire mobahangana. Neryo mwabuga ati, Mulwana, ngakubwira, nyiti, Hangana.

¹⁵ Nomuholi mwikala, mwatsuka eribuga. Neryo mwamuha nyinya wuwe.

¹⁶ Neriubaha moryahika kubo abosi; mobakenga Mungu mobabuga bati, oMuminyereri munene abiribanika omukati-kati ketu! Kandi Mungu amabisyabana abandu biwe!

¹⁷ Nengulu eyi yiwe moyagendagenda omo Yudea hosi ne kihugo ekyo kihererenye naho.

Abiga baYoane

¹⁸ Nabiga ba Yoane mobamubwira emyatsi eyi yosi.

¹⁹ Na Yoane, mwabirikira abiga buwe babiri, mwatumabo oko Mukama ati, Nina we oyu kasa, kutse tulindirire ogundi kwehi?

²⁰ Nabandu abo babere babimuhikako, mobabuga bati, Yoane Mubatisa amatutuma ukuwe, ati, Ni we oyu kasa, kutse tulindirire ogundi kwehi?

²¹ Noko ndambi eyo mwa lamya bangi bamakoni nesyondwala nyibi nebirimu bibi, nesyondimatime nyingi mwahasyo erilangira.

²² Neryo mwa­subiryabo ati, Mugende mubwire Yoane ebyo mwamalolako nebyo mwamowa: esyondimatime sikabana erilangira ryasyo, ebilema birimugenda, abahaga bameribwa, abatsiha bakowa, abaholi barimulubukibwa, nabera barimutulirwa engulu yo wene.

²³ Nomuyisa ari kwoyu tindasyatwikala busana nage.

Yesu na Yoane

²⁴ Nabakwenda ba Yoane babere bagenda, mwatsuka eribuga nesyondeko busana na Yoane, ati, Mwaya omo mbwarara erilola kuki kwehi? Olubingo olukatengatenganibawa neri hunga kwehi?

²⁵ Nikwa mwayayo erilola kuki kwehi? Omundu wambite esyongimba nyolo-nyolo kwehi? Lebaya, abambite esyongimba sikangabenie nabakarya ebibuya, bari omo bibuga byabami.

²⁶ Ko mwayayo erilola kuki kwehi? OMuminyereri kwehi? Ega, ngababwira, na kwilaba omu minyereri.

²⁷ Yoyu kisakire busana naye kiti, Lebaya, ngatuma omukwenda wage embere syobusu bwawe, Oyo wasyakokotya enzira yawe embere syawe.

²⁸ Ngababwira nyiti, Kwabo ababutawa na bakali sihari oyu lengire Yoane; nikwa omuke kutsibu omo bwami bwoMungu amulengire.

²⁹ (Omugulu bowa ebi abandu bosi nabasolesya mobaganza Mungu kwari weritunganene, kusangwa ibamabibatisibwa na Yoane;

³⁰ nikwa abaFarisayo nabimiri byebihano mobagana erisonda ryoMungu busana nabo, isibetabatisibwa naye.)

³¹ Nikwa nasyaringirirania abandu bolulengo olu naki kwehi? Kandi basosireki kwehi?

³² Baringene nga bana abikere omwiguriro abakabirikirana bati, Turiababuhira erirenga, momutetasata; Motwasusumana, nenyu momutetarira.

³³ Kusangwa Yoane Mubatisa mwasa isiarirya obundu neritendipula ebinyu; nenyu mukabuga muti, Ari kwembinga.

³⁴ OMugala wo mundu mwasa iniakarya neripulya; nenyu muti, Lebaya, omuri webingi nomukundirya, omwira wa basolesya nabakola nabi!

³⁵ Nikwa amenge akayirawa mo atunganene busana nabana bago bosi.

Yesu akahakabibawa amalase

³⁶ Omuguma mwamubirikirira erirya haguma naye, naye mwaya omo nyumba yomuFarisayo oyo, mwikala okwirya.

³⁷ Neryo lebaya omukali womuyi oyo, abya mukola nabi, abere aminya kwikere okwirya omo nyumba yomuFarisayo oyo, mwaleta eritambya ryowenenga ryamaguta owakakumba ndeke,

³⁸ mwimana enyuma kwiye hakuhi nebisandu biwe, akarira, mwatsuka eritsapya ebisandu biwe nemisonia yiwe, nerisangulabyo mo nzwire syomutwe wuwe, neriryatsirira ebisandu biwe, nerihakabyabyo na maguta ayo.

³⁹ Nikwa omugulu omuFarisayo oyo wamubirikira abere alangira ekyo, mwayibwira omwisi wuwe ati, Kumbe mundu oyu alwe mu minyereri, kumbe abiriminya omusindo womukali oyu kamu tulako, kusangwa ni mukola nabi.

⁴⁰ Yesu mwasubirya mwabuga naye ati, Simoni, ngwite ekyerikubwira. Naye ati, Mukangirirya, Buga,

⁴¹ Omubweki muguma abya na babiri bari nomwinda; omuguma iniari momwinda wa syofaranka amagana atanu, nogundi amakumi atanu.

⁴² Omugulu babula ebyerituha, mwabuyira ababiri bosi. Nikwa nindi wakubo wasyamwanza kwilaba kwehi?

⁴³ Simoni mwasubirya ati, Mbino oyo abuyira bingi. Neryo mwabuga naye ati, Wama tswera ndeke.

⁴⁴ Neryo mwakebera omukali mwabwira Simoni ati, Wamalangira omukali oyu kwehi? Mongingira omo nyumba yawe, mutetamba amagetse busana nebisandu byage, nikwa iye abiritsapya ebisandu byage omo misonia abirisangu labyo nesyonzwiri siwe.

⁴⁵ Suritamba eriryatsirira, nikwa eritsuka omugulu indingira siaritombya eriryatsirira ebisandu byage.

⁴⁶ Mutetahakabya omutwe wage amaguta, nikwa iye abirihakabya bisandu byage omo malasi.

⁴⁷ Kikaleka inaku bwira nyiti, ebibi biwe, ni bingi, byabiribuyirwa, kusangwa abirianza kutsibu; nikwa oyu kabuyirawa bike, akanza hake.

⁴⁸ Neryo mwabuga naye ati, Ebibi byawe byamabibuyirwa.

⁴⁹ Neryo ababya okwirya haguma naye mobatsuka eriyitonga omukati-kati kabo bati, Oyu ni ndi oyu kabuyira ebibi nibya kwehi?

⁵⁰ Neryo mwabwira omukali ati, Erikirirya ryawe ryamakulamya; Ugende nobuholo.