Luka 5 - Nouveau Testament et Psaumes en Ndandi Version 1962

Erisoha yeriswekera ryamahere

¹ Omugulu esyondeko syabya sikamuhatatania bati bowe eKinywa kyoMungu, abya imene oko mukokoro wengetsi yeGenezareti.

² Mwalangira amatu abiri okona musike we ngetsi; nikwa abasohi ibamabilwa mugo ibakalanda ebisohi byabo.

³ Eriingira omo buguma boko mato, bwabya bwa Simoni, mwamubulya ati akunebo hake erilwa oko musike. Neryo mwikala mwakangirirya iniane omo bwato.

⁴ Abere abibuga mwabwira Simoni ati, Mugende ahari omutobero mutogeraye ebisohi byenyu musohe.

⁵ Simoni mwamusubirya ati, Mukama, tusibire omo kiro kyosi tukakola kutsibu sitweta banaki! Nikwa okwibuga ryawe nganditogeryabyomo.

⁶ Babere babikola batya, mobabana mahera mangi; nebisohi mobyasonda eritwika,

⁷ mobakoherya abalikyabo omo bundi bwato bati base bawatikayebo. Mobasa mobusulya amato abiri, kyaleka iniasonda eritobera.

⁸ Nikwa Simoni Petero abere alangira ekyo, iniagwa oko malwi wa Yesu mwamubwira ati, Ulwe kwingye Mukama, kusangwa indi mundu mubi.

⁹ Kusangwa abya aswekire, nabosi ababya haguma naye, busana nerihamba amahere ago basoha;

¹⁰ na Yakobo na Yoane, abagala ba Zebedayo, abasangira na Simoni nabo moba sweka. Yesu mwabuga na Simoni ati, Sigubahe; eritsuka lino wasyasoha abandu.

¹¹ Neryo babere babileta amato oko mukokoro, mobasiga ebyosi mobamukwama.

Omuhaga

¹² Nomugulu abya oko muyi muguma, mohahika omundu inialwere ebihaga bingi; abere alola oko Yesu mwalambama ahisi oko busu buwe mwamugonga-gonga ati, Mukama, wa mabya wanzire, wangatoka erinyerya.

¹³ Neryo mwakakya okuboko, mwamutulako ati, Nyanzire; were. Neryo-neryo ebihaga mobyamulwako.

¹⁴ Neryo mwamutegeka ati siabwire mundu; nikwa ugende uyikanganaye oko muhereri, ubane obuhere busana neriera ryawe, ngoko Musa ategeka, bubye kiminyisyo ukubo.

¹⁵ Nikwa kwilaba aho engulu eyo moya tsungana busana naye; nesyondeko nene mosyahindana eri mowa nerilamibwa kwesyondwala syabo.

¹⁶ Nikwa iye mwayigabula kubo mwaya omo mbwarara mwasaba.

Oyo gumire

¹⁷ Omo kiro kiguma kyoko biro ebyo, akakangirirya, habya abaFarisayo nabakangirirya bebihano babya bikere hakuhi, abalwa omo buri muyi wa Galilaya na Yudea na Yerusalema; namaka woMukama abya haguma naye erilamyabo.

¹⁸ Neryo lebaya, abalume mobaleta omundu oko ngingo oyu wabya abasire, mobasonda-sonda erimwingirya nerimuhira emuliro wuwe;

¹⁹ nikwa eribula enzira yerimwingirya, busana ne ndeko, mobasamba oko lutwe mobamwandagalya haguma nengingo yiwe omukati kebituba mobamuhira embere sya Yesu.

²⁰ Naye abere alola okwikirirya ryabo mwabuga ati, We mundu, ebibi byawe byamabuyirwa kuwe.

²¹ Abasaki naba Farisayo mobatsuka eribulabulania bati, Oyu nindi oyu katsuma kwehi? Nindi angatoka eribuyira ebibi ate Mungu iyowene kwehi?

²² Yesu abere abiminya eribulya ryabo mwasubiryabo mwabuga ati, Mukabulanaya omo mitima yenyu busana naki kwehi?

²³ Ekyolo ni kyahi, eribuga nyiti, Ebibi byawe bya mabuyirwa kuwe, kutse eribuga nyiti, Hangana uyigendere kwehi?

²⁴ Nikwa mutoke eriminya kwo Mugala womundu awite hamuli omo kihugo eribuyira ebibi—mwabwira omundu oyu basire ati, Ngabuga nawe nyiti, Hangana, wimaye engingo yawe ugende emwawe.

²⁵ Neryo-neryo mwahangana embere syabo, mwaheka engingo abya agotsereko, mwaya omuwe, akapipa Mungu,

²⁶ nabosi mobasweka kutsibu, mobapipa Mungu mobusula nerisweka ryeryubaha bati, Twamalangira emyatsi yogundi musindo.

Akabirikira Lawi

²⁷ Enyuma webi mwahuluka, mwalangira omusolesya, oyu kahulawa mo Lawi, inianikere aho bakasolera; mwamubwira ati, Unyikwame.

²⁸ Naye mwasigania ebyosi, mwahangana mwamukwama.

²⁹ Na Lawi mwamutsumbira erirya inene omo nyumba yiwe; habya endeko nene ya basolesya nabandi ababya begemere haguma nabo okwirya.

³⁰ Kandi abaFarisayo nabasaki babo ibakanegulira abiga buwe, bati, Busana naki mukarira neripulya haguma nabasolesya na bakola nabi kwehi?

³¹ Yesu mwasubiryabo ati, Abakalire sibari nobwaga bwomu saki, nikwa abalwere.

³² Mondasa eribirikira abatunganene, nikwa abakolanabi babinduke.

Eritsira

³³ Nabo mobabuga naye bati, Abiga baYoane bakatsira ngendo nyingi, neriyira erisaba, nabiga babaFarisayo batya, nikwa abawe bakarya neripulya.

³⁴ Yesu mwabuga nabo ati, Mwangatoka eritsirisya abageni beriherukania omugulu iba womuheruki ane nabo kwehi?

³⁵ Nikwa ebiro bikandisyasa, omugulu iba womuheruki asyalusihwa kubo oko biro ebyo basyatsira erirya.

³⁶ Kandi mwabwirabo omusyo ati, Sihari mundu akatula ekitomeko kyolukimba luhyaluhya nerihirakyo oko lukimba lwakera; amakola atya iniakatula oluhyaluhya, nekihande kyoluhyaluhya sikyendisyaringirirana nolwakera.

³⁷ Kandi sihari mundu oyu kuturira ebinyu bihyabihya omo ngobi yakera yebinyu; amakola atya, ebinyu bihyabihya bikatula engobi ibyutika, nesyongobi isyahera.

³⁸ Nikwa ebinyu bihyabihya bitolere erihirwa omo ngobi nyihyanyihya yebinyu.

³⁹ Kandi sihari mundu amabipulya ebinyu byakera akaswasonda ebihyabihya; kusangwa akabuga ati, Ebyakera byobyuwene.