Luka 24 - Nouveau Testament et Psaumes en Ndandi Version 1962

Erilubuka ryaYesu

¹ Nikwa oko kiro kyeritsuka, omo karokaro, mobaya okwi sinda, bakatwala manukato ago bakokotaya.

² Mobeya eribwe iryabirikumbagaribwa erilwa okwisinda,

³ nikwa babere bingiramo mobatabanamo omubiri woMukama Yesu.

⁴ Nomu­gulu batikatika busana nomwatsi oyu lebaya, abandu babiri mobahangana aho bari ibambite esyongimba sikangabenie;

⁵ nomugulu bubaha neriunamya amasu wabo oko kitaka, abandu abo mobabwirabo bati, Busana naki mukasonderaya oyu riho omukati-kati kabaholi kwehi?

⁶ Siari hano, nikwa abirilubuka: mwibuke ngoko ababwira, akiri eGalilaya

⁷ ati, OMugala womundu atolere erihoterwa omo byala bya bakola nabi, neribambwa, noko kiro kyebisatu inialubuka.

⁸ Nabo mobibuka ebinywa biwe,

⁹ nerilwa okwisinda mobasubula mobabwira erikumi nomuguma nabandi bosi emyatsi yosi.

¹⁰ Ababwira abakwenda emyatsi eyi babya Maria Magdalene na Yoana, na Maria nyinya wa Yakobo nabandi bakali babya hagu ma nabo;

¹¹ nikwa ebinywa ebi mobyabya ngengulu buyira, mobatikiriryabyo.

¹² Nikwa Petero mwahangana, mwatibita eriya okwisinda; munama mwakengemereramo, mwalangira esyongimba syemisohe isine isyosyene neryo mwasuba ewuwe iniakaswekera ebyabere.

Abiga beEmao

¹³ Neryo oko kiro ekyo ababiri bakubo babya bakagenda oko kayi kahulawa mo Emau olugendo lwe kilometres ngikumi nebisatu erilwa eYerusalema.

¹⁴ Ibakakanaya haguma emyatsi yosi eyabere.

¹⁵ Babere banemokania haguma, Yesu mwasegera hakuhi mwagendania nabo.

¹⁶ Nikwa ameso iniabirikagwa erimuminya,

¹⁷ neryo mwabuga nabo ati, Ebyo mukakanaya munemogenda ni bihi kwehi? Nabo mobimana ibane nobusu bwobulige.

¹⁸ Muguma wakubo, oyu kahulawa mo Kleopa, mwamusubirya, ati, Kwe ni nawe wowene oko bageni eYeru­salema utasi ebyabere omo biro ebi kwehi?

¹⁹ Neryo mwa bulyabo ati, Ni bihi kwehi? Nabo bati, Ebya Yesu we Nazareti; oyo wabya muminyereri wamaka omo mubiri nomo binywa embere syoMungu nabandu bosi,

²⁰ kandi ngoko bahereri bakulu betu nabarongani mobamuhotere eritswerwa ryoluholo nerimubamba.

²¹ Nikwa itwe twabya na maha tuti yukandisyatongolya Israeli. Ega, na kandi lino ni kiro kyebisatu enyuma waho byabiribera.

²² Kandi, abandi bakali bomo ndeko yetu bamatuswekya. Balwe okwisinda mwangyakya ngyakya;

²³ mobateteyamo omubiri wuwe, mobasubula bati, bamalola oko bamalaika omo bulime, abariabuga bati, aneho.

²⁴ Nabandi abo twabya nabo mobakagenda okwisinda, moba kegaya iko bine ngoko abakali bariabuga; nikwa iye mobatamu lolako.

²⁵ Naye mwabwirabo ati, Inywe bandu bikiru, abolo omo mitima okwikirirya ebyosi abaminyereri babuga!

²⁶ Si kyabya kitolere Kristo iniaga wa omo myatsi eyi neriingira mo lukengerwa luwe kwehi?

²⁷ Neritsuka oko Musa nabaminye reri bosi, mwabindurirabo e myatsi eyiri omo masako busana naye.

²⁸ Neryo mobasegera hakuhi na kayi ako bayako. Naye mwabya nga kalabira embere

²⁹ nikwa mobamuhatikana bati, Wikale netu kusangwa erigologolo riri hakuhi bukahombera. Neryo mwingira eriikala nabo.

³⁰ Abere anikere okwirya haguma nabo, mwimya obundu mwatsumulabo, mwatwabo, mwahabobo.

³¹ Nameso wabo mwalibulwa mobamuminya; neryo mwaburilana omo meso wabo.

³² Mobabwirana bati, Emitima yetu mwitetahuhana omwisi wetu akakania netu omo nzira, omugulu ariabindula amasako busana netu kwehi?

³³ Mobahangana oko ndambi eyo mobasuba eYerusalema; mobeya erikumi nomuguma ibahindene haguma na babya nabo,

³⁴ ababuga bati, oMukama abirilubuka kwenene, abiriminyi kala ku Simoni!

³⁵ Neryo mobakaniryabo ebyabya omo nzira, kandi ngoko mwaminyikala kubo omwitwa ryobundu.

Yesu mwayikangya oko biga

³⁶ Omugulu babya bakabuga ebyo, Yesu mwahangana omukati-kati kabo ati, Obuholo bubye kwinywe!

³⁷ Nikwa mobasisira mobubaha, mobaringikania bati bamalola oko kirimu.

³⁸ Nikwa mwabuga nabo ati, Busana naki mukahahu kaya omutima, kandi busana naki mukatikatika omo mitima yenyu kwehi?

³⁹ Mulebaye ebyala byage nebisandu byage, kwari ini nangye; munyimamate mulangire; kusangwa ekirimu sikiwite omubiri namakuha ngoko mukalola inyinawite.

⁴⁰ No mugulu abibuga ebi, mwakangyabo ebyala biwe nebisandu biwe.

⁴¹ Nomugulu bakine batebikirirya busana nobutseme, mobasweka, mwabuga nabo ati. Muwite ekyerirya hano kwehi?

⁴² Mobamuha ekitswe kyerihere ekihukire (nobuki bwomu kisese),

⁴³ Neryo mwimyakyo mwaryakyo embere syabo.

⁴⁴ Kandi mwabuga nabo ati. Ebi bye binywa nababwira, nyikine haguma nenyu, ebyosi byasakawa busana nage omo bihano bya Musa na baminyereri nomo syosauma bitoke eri bererera.

⁴⁵ Neryo mwalibula amaringikania wabo eriminya amasako,

⁴⁶ neryo mwabuga nabo ati, Kisakire, kiti Kristo atolere eriagalwa noko kiro kyebisatu inialubuka oko baholi,

⁴⁷ neribinduka neribuyira ryebibi ibyakangiriribwa omo rina riwe oko bihanda byosi, eritsuka eYerusalema.

⁴⁸ Nenyu muri abalangiri bemyatsi eyi,

⁴⁹ Kandi lebaya, ngabatumira erilaga ryaTata wage; nikwa mulinde omo muyi erihika aho mwasya mbalibwa akagala erilwa endata,

Erihetukira elubula

⁵⁰ Neryo mwasondolyabo eyihya erihika eBetania, mwa sumbira ebyala biwe byendata mwahabo omuyisa.

⁵¹ Neryo abere anemohabo omuyisa, mwayigabula kubo mwatwalwa elubula.

⁵² Kandi mobamukukamira neryo mobasuba eYeru salema nobutseme bunene,

⁵³ Kandi mobasiba omugulu gosi omo hekalu nerikenge Mungu.