Luka 23 - Nouveau Testament et Psaumes en Ndandi Version 1962

Yesu embere waPilato

¹ Neryo endeko eyo yosi moyahangana, mobamutwala embere sya Pilato.

² Mobatsuka erimuhandikirira bati, Twabiribana omundu oyu akabindula ekihanda kyetu, akatu kaga erisolera Kaisari, ati iye ni Kristo omwami.

³ Pilato mwamubulya ati, Uri mwami wa baYuda kwehi? Naye mwa musubirya ati, Wamabuga.

⁴ Pilato mwabwira abahereri bakulu nendeko ati, Sinditabana oko mundu oyu ko kibi.

⁵ Nikwa mobahatikana, bati, Akarwanaya abandu, nerikangi rirya eYudea hosi, eritsuka eGalilaya nerihika na hano.

Herode

⁶ Pilato abere owa ekyo, mwabulya ngo mundu oyu nga ni muGaUlaya.

⁷ Amabiminya kwari omo hamuli ya Herode, mwamutuma ku Herode, kusangwa naye abya eYerusalema omo biro ebyo.

⁸ Omugulu Herode alola uku Yesu mwatsema kutsibu, kusangwa eritsuka kera iniakasonda erimulolako, kusangwa abya akowa engulu yiwe, kandi iniakasonda erilola oko kitikotiko ekyakolawa naye.

⁹ Kyaleka iniamubulya omo binywa bingi; nikwa mwatamusubiryaki.

¹⁰ Nabahereri bakulu nabasaki mobahangana aho, mobayitsinga erimuhandikirira kutsibu.

¹¹ Neryo Herode na basoda buwe mobamupona nerimuseke rerya; neryo, mobamwambalya olukimba lukangabenie, neryo mwamusubya ku Pilato.

¹² Noko kiro ekyo Herode na Pilato mobaswabya bwira na bwira, kusangwa embere waho ibari na buyigu.

Pilato akatswera Yesu

¹³ Pilato mwabirikira haguma abahereri bakulu na barongani nabandu,

¹⁴ Mwabwirabo ati, Mwamandetera omundu oyu ngoyu kahabisaya abandu; nenyuma werimulengako embere syenyu, lebaya, sinditabana komundu oyu ko myatsi eyo mukamuhandikirira;

¹⁵ kutse na Herode, kusangwa amamu subya kwitwe. Lebaya, siaritakola kindu ekitolere akitwa;

¹⁶ neryo ngandimuswirya neryo inamubohola. (

¹⁷ Nikwa atolere iniaboholerabo omuguma ogo muliki omo biro bikulu).

¹⁸ Nikwa abosi mobabugira igumaguma bati, Ulusaye omundu oyu, utuboholere Baraba—

¹⁹ mundu oyo wagusawa omo muliki busana nobwanise omo muyi, na busana neriita bandu.

²⁰ Pilato mwaswabuga nabo kandi asonda eribohola Yesu;

²¹ nikwa mobabirikira mobasumba omulenge bati, Mumubambe, mumubambe!

²² Mwabuga nabo engendo yakasatu ati, Busana naki, abirikola kibi kyahi kwehi? Sindita mubana ko kibi ekitolere oluholo; neryo ngandimuswirya inamubohola.

²³ Nikwa mobahatikana, bakabulya nemilenge minene abambawe. Nemilenge yabo moyasinga.

²⁴ Neryo Pilato mwatwa mwatsi ati ekyo bakabulaya kikolawe.

²⁵ Mwa bohola omundu oyo basonda oyo wagusawa mo muliki busana nobwanise neriita, nikwa mwaha Yesu bamukole ngoko banzire.

Abakali beYerusalema

²⁶ Babere bakamutwala, mobahamba Simona weKurene, oyu walwa omoli, mobamuhekya omusalaba, erihekago enyuma wa Yesu.

²⁷ Nendeko nene ya bandu moyamukwama nendeko yabakali abamurira nerimususumanira.

²⁸ Nikwa Yesu mwa keberabo mwabwirabo ati, Abali beYerusalema, simurire busana nage, nikwa murire busana nenyu nabana benyu.

²⁹ Kusangwa lebaya, ebiro byasyasa basyabuga bati, Omuyisa ari na bagumba, nesyonda esitabuta na kera, namabere awataribawako na kera!

³⁰ Oko mugulu oyo basyatsuka eribuga oko bitwa bati, mutu terereko; noko hitwa mutukuningire.

³¹ Kusangwa bamakola emyatsi eyi oko muti mubisi, basyakolaki oko gumire kwehi?

Eribambwa

³² Mobatwala abandi bakoli bebibi babiri eriitwa haguma naye.

³³ Babere babihika ahakahulawa mo Kanyamahanga, ho bamubamba, nabakoli bebibi, muguma oko mali nogundi oko malembe.

³⁴ Neryo Yesu mwabuga ati, Tata, ubuyirebo; kusangwa sibasi ekyo bakakola. Neryo mobakokotya obukanga erigaba esyongimba siwe.

³⁵ Nabandu mobahanganaho, eri samalira; nikwa barongani mobamunegulira, bati, Alamaya bandi; naye ayilamaye, amabya ari Kristo woMungu, Oyo Wayisogawa wuwe!

³⁶ Nabasoda mobamusekererya, moba segera ahari nerimuha epata,

³⁷ bati, Wamabya uri mwami wabaYuda, uyilamaye!

³⁸ Nibya habya erisaka endata kwiye riti, OYU NI MWAMI WABAYUDA.

Eribinduka ryomurahi

³⁹ Omuguma woko bakoli bebibi ababambawa mwamutsuma ati, Suri Kristo kwehi? Uyilamaye netu!

⁴⁰ Nikwa ogundi mwamukunga ati, Suriubaha Mungu kwehi? Kusangwa nawe ukatswerawa lubi oluri ngolu.

⁴¹ Nolwetu ni lwa kwenene; kusangwa tukangirira oluhembo lwemibiri yetu; nikwa omundu oyu siaritakola ekibi.

⁴² Kandi mwabuga ati, Yesu, unyibuke omugulu ukasa omo bwami bwawe.

⁴³ Neryo mwamubwira ati, Kwenene, ngabuga nawe, munabwire wasyabya haguma nage omo Paradiso.

Oluholo lwaYesu

⁴⁴ Nikwa yabya ngendambi yendatu, no mwirimya mwabya omo kihugo kyosi erihika oko ndambi yomwenda,

⁴⁵ nekya kakala kyeryuba mokyahwa; nolukimba lwehekalu molwatulwa mwibiri.

⁴⁶ Neryo Yesu mwabirikira nomulenge munene, ati, Tata, omo byala byawe ngahiramo ekirimu kyage! Abere abibuga ebi mwalusya ekirimu kiwe.

⁴⁷ Nikwa omugulu omurongani wabasoda alangira ebyamabya, mwapipa Mungu ati, Kwenene omundu oyu abya mutunganene!

⁴⁸ Nesyondeko syosi abahindana erilangira, babere balola oko byamabya moba­suba ewabo banemohumanga oko bikuba byabo.

⁴⁹ Nabosi abamwasi nabakali abamukwama erilwa eGalilaya mobahangana hali mobalangira emyatsi eyi.

Eritabwa ryaYesu

⁵⁰ Nikwa habya omundu akahulawa mo Yosefu mundu mukulu womwibugiro, ini mundu atunganene omubuya ini akalwa oko Arimatea omuyi wabaYuda,

⁵¹ abya isyariliga embita yabo nomubiri wabo, kandi abya akalinda obwami bwoMungu.

⁵² Omundu oyu mwaya oko Pilato mwamusaba omubiri wa Yesu.

⁵³ Neryo mwakimyago mwalangira kugo kwo lukimba lwomusohe mwamuhira omwisinda yabatsawa omwibwe, eyiteyatatabwa mo mundu.

⁵⁴ Kyabya ekiro kyErikokotya, nekiro kyasabato kikasonda erikya.

⁵⁵ Abakali abasa naye bakalwa eGalilaya mobamukwama, mobalangira eyisinda nomubiri wuwe ngoko ahirawamo;

⁵⁶ neryo moba subula, mobakokotya manukato namalase. Noko kiro kyasabato mobaluhuka nge bihano.