Luka 21 - Nouveau Testament et Psaumes en Ndandi Version 1962

Erihitya ryomukwakali

¹ Neryo mwasumba ameso mwalangira abebindu bakahira erihitya ryabo omwisanduku ryerihitya;

² mwalangira mukwakali mwera akahira mo sengi ibiri.

³ Neryo mwabuga ati, Ngababwira kwenene, omukwakali oyu abirihiramo kwilaba abandi bosi;

⁴ kusangwa ebo babirihiramo oko bungi bwe bindu byabo, nikwa iye omo bwera buwe abirihiramo ebyosi ebyawite.

⁵ Nabandi mobahula hekalu ngoko yabambiribawa kwama bwe owene nerihitya ryesyofranka, naye mwabwirabo ati,

⁶ Ebindu ebi mukalangira, omo biro bikandisyasa sihendisya sigala eribwe eriguma endata oko rindi eritindisyaguswa ahisi.

⁷ Nabo mobamubulya bati, Mukangirirya, byasyabya bitya omugulu wahi kwehi, nekiminyikalo kyeriberera ryemyatsi eyi ni kyahi kwehi?

⁸ Neryo mwasubirya ati, Muyitegaye siba batalaye; kusangwa bangi basyasa omo rina ryage, bati, Ingye indi ye! nakandi, omugulu ari hakuhi! Simusyekwamabo.

⁹ Nomugulu mukowa engulu yamalwa neritwa eyisesi, isimwa hahukaya emitima; kusangwa ebi bitolere ibyatsuka eribya, nikwa enduli siendisyabya neryo-neryo.

¹⁰ Neryo mwabuga nabo ati, Ekihanda kyasyalwa nekindi kihanda, nobwami bwa syalwa nobundi bwami;

¹¹ hasyabya emisiki mineneminene, nehandi nehandi hasyabya esyonzala nesyondwala; hasyabya eribakira nebitikotiko binene bikalwa elubula.

¹² Nikwa emuliro waho basyabahamba neriendererya, eribatwala omo manyumba werihindana nomo manyumba womuliki, mwasya twalwa embere syabami nabarongani busana nerina ryage.

¹³ Omugulu oyo asyabya busana neritulago ryenyu.

¹⁴ Mu minye omo buringikania bwenyu, isimwaganiraya embere ngoko mwangasubya;

¹⁵ kusangwa nasyabaha obuno namenge ayo sihari enzigu yenyu yasyatoka erisingana kutse eriyigana.

¹⁶ Mwasyahotelwa na babuti benyu nabagala benyu nabali kyenyu nabira benyu, basitisya abandi bakwinywe;

¹⁷ mwa syakubwa obusu nabosi busana nerina ryage.

¹⁸ Nikwa sihendisyahera oluywiri luguma oko mutwe wenyu.

¹⁹ Busana nerisika ryenyu mwasyabana engebe yenyu.

²⁰ Nikwa mwamalangira eYerusalema inatimbirweko naba lwi, imwaminya erihera ryago iryamahika hakuhi.

²¹ Oko mugulu oyo abari mo Yudea sibasagire oko bitwa, nabari omo muyi sibalwemo, nabari mo biharo sibakuluke;

²² kusangwa ebi ni biro byeririhisya, eribererya ebyosi ebyasakawa.

²³ Obu ligo busana na bakule nabakaha mabere oko biro ebyo! Kusangwa obulige bunene bwasyabya omo kihugo nerihitana rinene oko bandu aba;

²⁴ Basyahwa busana nobukali bwomu yari basyanyewa mo bakobe omo bihanda byosi; neYerusalema yasyaryatangirirwa neBihanda, erihika aho emigulu yeBihanda yasyabererera.

²⁵ Hasyabya ebitikotiko oko ryuba noko mukera, noko syongununu, noko kihugo amalige webihanda eritindiminya busana erihuha ryengetsi nebisunda,

²⁶ abandu bakapisima neriubaha namaganiryo ebikandisyahika oko kihugo; kusangwa ebyamaka byasyatengatenganibwa.

²⁷ Neryo oko mugulu oyo basyalangira oMugala womundu akasa omo kitu namaka nolukengerwa lunene.

²⁸ Nikwa omugulu emyatsi eyi yasyatsuka eribya, musumbe ameso wenyu musumbe nemitwe yenyu, kusangwa eritongolibwa ryenyu rikahika hakuhi.

²⁹ Neryo mwatwirabo musyo ati: Mulebaye omuti womu tini, neyindi miti yosi;

³⁰ omugulu ikatoheraya mukalebaya mukaminya ko mututa ari hakuhi.

³¹ Ritya, omugulu muka langira emyatsi eyi ikabya, imwaminye ko bwami bwoMungu buri hakuhi.

³² Kwenene, ngabuga nenyu, olulengo olu silwendisyahwa ebi byosi bitebyabererera.

³³ Elubula ne kihugo byasyahwa, nikwa ebinywa byage sibendisyahwa.

³⁴ Nikwa muyilebaye emitima yenyu siyiritoherawe neritamira nerikunda namaringikania wengebe yeno, nekiro ekyo ikyabahikako nge kitego;

³⁵ kusangwa kyasyahika oko bosi abikere omo kihugo kyosi.

³⁶ Nikwa mutegaye oko emigulu yosi, nerisaba mubane akagala keribala emyatsi eyi yosi eyikandisyabya; nerihangana embere syoMugala womundu.

³⁷ Kandi abya akakangirirya ebiro byosi omo hekalu, nikwa bwahombera inialwamo iniayagotsera oko kitwa kikahulawa mo Zeituni.

³⁸ Nengyakya-ngyakya abandu bosi mobamuhikako omo hekalu erimowa.