Luka 20 - Nouveau Testament et Psaumes en Ndandi Version 1962

Eribatisya ryaYoane

¹ Ekiro kiguma abere akakangirirya abandu omo hekalu neritula engulu yowene, abahereri bakulu nabasaki haguma nabakulu mobahika ahari

² mobamubwira bati, Utu bwire nga ni hamuli yahi ikaleka iwakola emyatsi eyi kwehi kutse nindi wakuha ehamuli eyi kwehi?

³ Naye mwasubiryabo ati, Nage ngababulaya eKinywa kiguma; mumbwire,

⁴ Eribati­sya rya Yoane ryalwa elubula kutse ryalwa oko bandu kwehi?

⁵ Mobakanirya haguma bati, Twamabuga tuti, ryalwa elubula, asyabuga ati, Busana naki simwetamwikirirya kwehi?

⁶ Nikwa twamabuga tuti, ryalwa oko bandu, abandu bosi basyatuswirya mabwe; kusangwa babiriikirirya ko Yoane abya muminyereri.

⁷ Mobasubirya bati sibasi eyo ryalwa.

⁸ Yesu mwabwirabo ati, Nage sindiendibabwira nga ni ehamuli yandi eyikaleka inakola emyatsi eyi.

Abahingi babi

⁹ Neryo mwatsuka eritwirabo musyo oyu: ati, Omundu mwahera eririma ryebinyu, mwasigiraryo abahingi, mwaya omo kindi kihugo mwabyayo omugulu muli.

¹⁰ Noko mugulu werigesa mwatuma omugombe oko bahingi, ati, bamuhe oko biguma byebinyu; nikwa abahingi mobamuswirya, mobamu higa naye mwasubula busa.

¹¹ Kandi mwatuma ogundi mugombe; naye mobamuswirya mobamuhemula, mobamuhiga, naye mwasubula busa.

¹² Kandi mwatuma owakasatu; naye mobamuhutalya mobamutibitako.

¹³ Neryo mwenye eririma ryebinyu mwabuga ati, Ngandikolaki kwehi? Ngandituma omugala wage mwanze; mbino basyamukenga.

¹⁴ Nikwa aba­hingi babere bamulolako, mobaya embita bati, Oyu yo muri womwandu; tumwite nomwandu asyabya wetu.

¹⁵ Neryo mobamugusa eyihya weririma ryebinyu mobamwita. Nikwa mwenye eririma asyayira ati kwehi?

¹⁶ Asyasa asyaherya abahingi abo, asyaha eririma ryebinyu ryo bandi. Babere bowe ebi, mobabuga bati, Sibibye bitya!

¹⁷ Nikwa mwasamalirabo mwabuga ati, Nikwa eki kyasakawa iniki kwehi? Eribwe abahimbi bagana Ryabiribya erikawataya engonde.

¹⁸ Oburi mundu oyo wasyatogera okwibwe eryo asyabunangika mo bitswebitswe; nikwa ryamatogera oko mundu ryasyamu bunzungula.

Erisola

¹⁹ Neryo abasaki nabahereri bakulu mobalenga erimutsimba oko ndambi eyo, nikwa mobubaha abandu; kusangwa baminya kwatwa omusyo oyo busana nabo.

²⁰ Kyaleka ibamulebya, nerituma abalingi, ababiha, bati ni bakwenene busana neri mutega omo byakabuga ibatoka erimutwala omo hamuli neritswera ryomurongani.

²¹ Mobamubulya bati, Mukangi rirya, tunasi kukabuga nerikangirirya ekyekwenene, isuriso mbola abandu, nikwa kwenene ukakangiriraya enzira yoMungu.

²² Rinatolere oko bihano erisolera Kaisari kutse eyihi kwehi?

²³ Nikwa mwaminya obugobya bwabo, neryo mwabuga nabo,

²⁴ ati, Munyikangaye olufaranka. Ekisosekanio nerisaka eri ni byandi kwehi? Nabo mobabuga bati, Ni bya Kaisari.

²⁵ Naye mwabwirabo ati, Ego, muhe Kaisari ebya Kaisari, noMungu ebyoMungu.

²⁶ Nabo mobatatoka erimutega omo katikati kabandu omwebyo abuga; nikwa mobabya bukutu bakaswekera erisubirya riwe.

Erilubuka

²⁷ Abandi boko baSadukayo mobamuhikako abakabuga bati sihari erilubuka,

²⁸ mobamubulya bati, Mukangirirya, Musa mwatusakira ati, Mugala wabo mundu amahola akasigania mukaliwe atawite bana, mugala wabo iniasigalya omukali neri butira mugala wabo yabana.

²⁹ Neryo habya abagala babo barinda; owerimbere mwahikya omukali, mwahola isiawite bana;

³⁰ nowakabiri

³¹ nowakasatu mwamuhikya, nabosi barinda mobahola batya butasiga bana.

³² Nenyuma waho omukali naye mwahola.

³³ Neryo okwilubuka, asyabya mu kandi kubo kwehi? Kusangwa abarinda mobamuhikya.

³⁴ Yesu mwabuga nabo ati, Abagala be kihugo kino bakahikaya neriherukania;

³⁵ nikwa abakaganzawa mo batolere erihika oko mugulu oyo nerilubuka oko baholi sibehikaya kutse eri herukania,

³⁶ kusangwa sibetoka eriswahola, kusangwa bari ngene na balaika kandi ni bagala boMungu, kusangwa ni bagala berilubuka.

³⁷ Nikwa Musa naye akanganaya ko baholi baka lubukibawa, omo masako awakahula ekisaka, ahakabirikira oMukama Mungu wa Abrahamu noMungu wa Isaka noMungu wa Yakobo.

³⁸ Nikwa iye si Mungu wabaholi nikwa wabariho; kusangwa abosi bakabyaho kwiye.

³⁹ Nabandi bokobasaki mobamusubirya bati, Mukangirirya, wamabuga ndeke.

⁴⁰ Ku­sangwa mobataswatoka erimubulya ekindi kinywa.

Mugala wa Dawidi

⁴¹ Nikwa mwabuga nabo ati, Bakatoka eribuga bati Kristo ni mugala wa Dawidi bo bati kwehi?

⁴² Kusangwa Dawidi naye akabuga omo kitabu kya Sauma ati, OMukama mwabuga noMukama wage ati, Ikala oko byala byage byamali,

⁴³ erihika aho nasyahirira esyonzigu syawe mo kitumbi kye bisandu byawe.

⁴⁴ Dawidi amamwahula mo Mukama; ini a swabya mugala ati kwehi?

⁴⁵ Neryo mwabuga na biga buwe abandu bosi ibanuwire ati,

⁴⁶ Muyitegaye oko basaki, abanzire erilendera ibanambite esyokanzu nyiri, ibanzire eribukibwa omo hitare nebitumbi ebibuya omo manyumba werihindana nomo myanya yolukengerwa okwirya,

⁴⁷ abakarya amanyumba wabakwakali nomo bugobya bakasaba muli-muli. Basyimya eritswerwa lubi kwilaba.