Luka 2 - Nouveau Testament et Psaumes en Ndandi Version 1962

Eributwa ryaYesu

¹ Oko biro ebyo mohabya eritegeka rikalwa ku Kaisari Augusto riti, abe kihugo kyosi basakawe.

² Erisaka eri ryabya ryeri mbere oko mugulu Kurenio abya murongani weSuria.

³ Abosi mobayasakwa, oburi mundu oko muyi wuwe.

⁴ Yosefu nibya mwahetukira eYudea, akalwa eGalilaya, omuyi wa Nazareti, iniakaya oko muyi wa Dawidi owakahulawa mo Betelehemu kusangwa abya wenyumba nekitunga kya Dawidi,

⁵ erisakwa haguma na Maria, oyo asimulaya, inina mukule.

⁶ Nomugulu babyayo, endambi yiwe yeributa moyahika.

⁷ Mwabuta omwana wobulume akambere mwamuswika olukimba ololu mekeke, mwamuhira omo kiringa kyesyonde, kusangwa sihabya omwanya busana nabo omo kirimba.

Abalisya

⁸ Omo kihugo ekyo habya abalisya omoli, ibakategaya ekihyo omo kiro.

⁹ Nomulaika woMukama mwabutukira So, nolu kengerwa lwoMukama molwakangabania mokubo ehosi, mobu baha kutsibu.

¹⁰ Nomulaika mwabwirabo ati, Simubahe; kusangwa lebaya, ngabaletera engulu yowene yobutseme bunene obukasyasira bandu bosi;

¹¹ kusangwa munabwire oMulamya amabibutwa busana nenyu oko muyi wa Dawidi, ni Kristo Mukama.

¹² Neki kikandisyabya ekiminyikalo busana nenyu: mukandieya lumekeke ilunaswikire esyongimba esyobumekeke ilunagotsere omo kiringa ekikarira mwesyonde.

¹³ Neryo neryo mohabya haguma nomulaika esyondeko syemilondo yelubula ibakapipa Mungu bati,

¹⁴ Olukengerwa oko Mungu endata kutsibu, nobuholo omo kihugo omukati-kati kabandu abakamutsemesaya!

¹⁵ Abalaika babere babilwa kubo eriya elubula, abalisya mobabwirana bati, Tugende lino eBetelehemu tuyalebaye ekyabereyo, ekyo Mukama abirituminyisya.

¹⁶ Neryo moba genda luba, mobeya Maria na Yosefu, nolumekeke ilunagotsere omo kiringa kikarira mwesyonde.

¹⁷ Babere babilola kubyo mobaminyisya ebyo baryabwirawa busana nomwana;

¹⁸ nabosi abowabyo mobasweka busana nebyo abalisya babwirabo.

¹⁹ Nikwa Maria mwabika emyatsi eyi yosi, iniakaganirayayo omo mutima wuwe.

²⁰ Kandi abalisya mobasubula, ibakapipa nerisikya Mungu busana nebyosi bowa nebyo balolako, ngoko babwirawa.

²¹ Nenyuma webiro munani, omugulu abanibawa, mwa hulwa mo Yesu, erina eryo omulaika amuluka obukule isibwe bwahekwa.

Simeoni

²² Nomugulu endambi yerieribwa ryabo yamabihika nge kihano kyaMusa, mobamutwala eYerusalema erimuha oko Mukama

²³ (ngoko kisakire omo bihano byoMukama, biti, Ogo bulume oyuriatsuka eributwa asyabya mubuyirire wo Mukana)

²⁴ nerihera obuhere ngebyo bikabugawa omo kihano kyoMukama, kiti, ehitungulu hibiri, kutse ehyana kyehilikuku hibiri.

²⁵ Nikwa eYerusalema habya omundu, oyu kahulawa mo Simeoni, omundu oyo abya mutunganene nomu genge, iniakalinda erisibikibwa ryaIsraeli, neKirimu Kibuyirire mokyamubyako.

²⁶ NeKirimu Kibuyirire ikyabirimuminyisya kwatendisyahola atealola uku Kristo woMukama.

²⁷ Neriso ndolwa neKirimu mwahika omo hekalu; nomugulu ababuti baleta omwana Yesu, eriyira busana naye nge mitsye yebihano,

²⁸ neryo mwamwimya omo maboko wuwe mwapipa Mungu mwabuga ati,

²⁹ Mukama, lino ukahongokaya omugombe wawe omobuholo, nge kinywa kyawe;

³⁰ Kusangwa ameso wage abirilola okwilamya ryawe

³¹ Eryo wabirikokotya embere syabandu bosi,

³² Oluseke busana neribisulirwa oko Bihanda Na busana nolukengerwa lwa bandu bawe Israeli.

³³ Yosefu na nyinya wuwe mobasweka oko myatsi yabugawa busana naye;

³⁴ na Simeoni mwatsumulabo mwabuga na Maria nyinya wuwe ati, Lebaya, omwana oyu abirihirwa okwigwa nerihangana ryabangi beIsraeli, na busana nekimi nyikalo ekikaponawa

³⁵ (nomuyari asyatsimita omutima wawe nibya), amaringikania womo mitima mingi abisulawe.

Ana

³⁶ Kandi mohabya omuminyereri wobukali ye Ana, omwali wa Fanueli, owekihanda kya Aseri; abya mukekulu wa kera, iniabiriikala niba wuwe emituta irinda eritsuka oko bumbesa buwe,

³⁷ mwabya mukwakali wemituta amakumi munani nini. Isiarilwa omo hekalu, erimukukamira neritsira nerisaba omo kiro nomo mwisi.

³⁸ Nerihikaho oko ndambi eyo mwaha ewasingya oko Mungu, nerimwahula oko bosi ababya bakalinda eritongolibwa ryeYerusalema.

³⁹ Neryo babere babibuyirira ebyosi nge bihano byoMukama, mobasuba eGalilaya, oko omuyi wabo, Nazareti.

⁴⁰ Neryo omwana mwakula mwabya namaka, musulibwa na menge; nolukogo lwoMungu molwabya ukwiye.

Yesu omo hekalu

⁴¹ Nikwa abamubuta mobaya eYerusalema oburi mututa okwirya rye Pasaka.

⁴² Neryo abere abibuga emituta ikumi nibiri mobahetuka nge mutsye wekiro kikulu;

⁴³ neryo ekiro kikulu ekyo kyabere kyahwa, babere banemosubula, omulwana Yesu mwasigala enyuma eYerusalema. Abamubuta mobata minya ekyo,

⁴⁴ nikwa ibanemoganirya bati ane omo mulondo mobagenda olugendo lwekiro kiguma, mobamusonda-sonda omukati-kati kekitungi kyabo na balikyabo;

⁴⁵ nomugulu bamubula, mobasuba eYerusalema, bakamusonda.

⁴⁶ Nenyuma webiro bisatu mobamweya omo hekalu, inianikere omukati-kati ka bakangirirya, erihulikirirabo neribulyabo eryeribulya;

⁴⁷ nabosi bamowa mobasweka busana na menge wuwe neri subirya riwe.

⁴⁸ Nomugulu bamulolako mobasweka; na nyinya wuwe mwabuga naye ati, Mugala, busana naki wabiri tuyira utya kwehi? Talebaya, tata wawe nage twabirikusonda sonda nengitsi.

⁴⁹ Naye mwabuga nabo ati, Muryanyisonderaki kwehi? Simwabya mwasi ko nyitolere eribya omo myatsi ya Tata wage kwehi?

⁵⁰ Nabo mobataminya ekya buga nabo.

⁵¹ Neryo mwandagala haguma nabo mwahika eNazareti, mowabo; kandi enyinya wuwe mwabika emyatsi eyi yosi omo mutima wuwe.

⁵² Neryo Yesu mwakanya amenge nerikula, nerisimwa noMungu na bandu.