Luka 19 - Nouveau Testament et Psaumes en Ndandi Version 1962

Zakayo

¹ Neryo mwingira eYeriko kandi abya iniakatwangana.

² Neryo habya omundu oyo kahulawa mo Zakayo; Abya musolesya, iniawite bindu.

³ Neryo mwasonda erilola ku Yesu nga ni ndi, nikwa mwataluka busana nendeku kusangwa abya mukuhi.

⁴ Neryo mwatibita embere mwasamba omo muti womukuyu ati amuloleko, kusangwa iniakandilabaho.

⁵ Neryo Yesu abere abihikaho, mwalalama mwamulolako mwa­mubwira ati, Zakayo, wanguhe ukime; kusangwa ritolere inikala omwawe munabwire.

⁶ Neryo mwanguha mwakima, mwamu kokya no butseme.

⁷ Nabo babere balangira abosi mobayitonga bati, Amingira eribya omugeni womukola nabi.

⁸ Neryo Zakayo mwahangana mwabwira Mukama ati, Lebaya, Mukama, ekihande kyebindu byage ngahakyo oko bera; kandi namatima omundu oko kindu, ngasubulayakyo ngendo ini.

⁹ Yesu mwa­buga naye ati, Munabwire erilama ryamahika omo nyumba eyi, kusangwa naye ni mugala wa Abrahamu.

¹⁰ Kusangwa Mugala womundu mwasa erisonda-sonda nerilamya abatala.

Omusyo wamagabo

¹¹ Omugulu bowa emyatsi eyi, mwatsuka eritwa omusyo, kusangwa abya hakuhi neYerusalema, kusangwa baganiraya ambu obwami bwoMungu bukandihika neryo-neryo.

¹² Neryo piwabuga ati, Omundu muguma woko bwami mwaya omo kindi kihugo kyehali eriya singirayo neriswasubula.

¹³ Mwa birikira erikumi oko bagombe buwe, mwahabo ebitsipa ikumi, mwabwirabo ati, Mutundaye umwebi erihika aho nasyaswasira.

¹⁴ Nikwa abandu buwe mobamupona mobamutumira abakwenda bati, Sitwanzire mundu oyu akatabala kwitwe.

¹⁵ Abere abisubula iniamabisinga, mwategeka eribirikira abagombe abo asigira ebitsipa, ati aminye endundi eyo babana omwitundya.

¹⁶ Owembere mwamuhikako ati, Mukama, ekitsipa kyawe kyamatunda ebindi bitsipa ikumi.

¹⁷ Naye mwamubwira ati, Wamuwania, omugombe owene! Kusangwa wabiribya butsira erisiganirya oko kike, wasyabya ne hamuli oko miyi ikumi.

¹⁸ Nowakabiri mwasa, ati, Mukama, ekitsipa kyawe kyamatunda ebitsipa bitanu.

¹⁹ Naye mwamubwira ati, Ubye nehamuli oko miyi itanu.

²⁰ Neryo ogundi mwasa, ati, Mukama, ekitsipa kyawe kyeki, ekyo nabika omo kihande kyolukimba;

²¹ kusangwa monakubaha, kusangwa uri mundu ukalire; ukatelula ebyo utahira ahisi, ukagesa ebyo utabiba.

²² Naye mwamubwira ati, Ngandikutswera omo bikalwa omo buno bwawe, uwe mugombe mubi! Wabya wasi ko ndi mundu akalire, ko ngatelula ebyo ndikiraya nerigesa ebyo ndabiba kwehi?

²³ Busana naki mutatundya ekitsipa kyage oko babiki, nokwihika ryage inahekakyo haguma nendundi yakyo kwehi?

²⁴ Neryo mwabuga nababya bimene hakuhi ati, Mumusagule ekitsipa, muhekyo okoyu wite ebitsipa erikumi.

²⁵ (Nabo mobamubwira bati, Mukama, kawite ebitsipa ikumi!)

²⁶ Nga babwira nyiti, Oyu wite asyahabwa ebindi; nikwa oyu tawite asyalusibwako nekyo awite.

²⁷ Nikwa esyonzigu syage, aba tabya banzire ngatabala kubo, muletebo hano mwitirebo embere syage.

Eriingira eYerusalema neripipwa

²⁸ Abere abibuga ebyo, mwaya embere, akahetukira eYeru salema.

²⁹ Abere ahika hakuhi na Betefage na Betania, oko kitwa kikahulawa mo Zeituni, mwatuma babiri boko biga buwe,

³⁰ ati, Mugende oko kayi akeyisirya, mwabya mwabingiraho mukandieya ekyana kyepunda ikinahangire, ekitekyataheka omundu; muhangulekyo muletekyo hano.

³¹ Omundu ama babulya ati, Mukahangulakyo busana naki kwehi? mukandi mubwire muti, Mukama ari nobwaga bwakyo.

³² Neryo abatumawa mobagenda mobeya iko bine ngoko abwirabo.

³³ Nomugulu babya bakahangula ekyana kyepunda, abenyekyo mobabuga nabo bati, Busana naki mukahangula ekyana kye punda kwehi?

³⁴ Mobamubwira bati, oMukama ari nobwaga bwakyo.

³⁵ Mobatwalirakyo Yesu, mobasanza oko kyana kyepunda kwesyongimba syabo mobahira Yesu kukyo.

³⁶ No­mugulu abya akagenda kukyo mobasanza esyongimba syabo omo nzira.

³⁷ Abere ahika hakuhi nobwandagala bweKitwa kye Zeituni, endeko yosi yabiga mobatsuka eritsema neripipa Mungu nomulenge munene busana nemibiri yosi yamaka balolako,

³⁸ bati oMuyisa abye oko Mwami oyu kasa omo rina ryoMukama! Obuholo elubula nolukengerwa omo ndata kutsibu!

³⁹ Nabandi boko baFarisayo omo ndeko mobabuga naye bati, Mukangirirya, ukunge abiga bawe.

⁴⁰ Naye mwa­subiryabo ati, Ngababwira, nyiti, Kumbe aba bamabya bukutu, amabwe nago angabirikira.

Eririra rya Yesu busana naYerusalema

⁴¹ Nomugulu ahika hakuhi mwalangira omuyi mwaririrago,

⁴² ati, Kumbe munabwire nawe ulwe wasi emyatsi ikaleta obuholo! Nikwa lino bibisamire oko meso wawe.

⁴³ Ku sangwa ebiro byasyasa kwinywe, omugulu esyonzigu syawe syasyayita ekiyite eribatimbako, eribakakirya oko mbande syosi,

⁴⁴ neribagusa oko kitaka, inywe nabana benyu omwisi wenyu, sibendisyasigania eribwe riguma endata oko rindi, kusangwa momutaminya endambi yeribalamirwa yenyu.

Erihiga abatundi omo Hekalu

⁴⁵ Kandi mwingira omo hekalu mwatsuka erihigira eyihya abagulirayamo,

⁴⁶ mwabwirabo ati, Kisakire kiti, Enyumba yage yasyabya enyumba yerisabiramo; nikwa inywe mwabiri yirayo mo mwangalu wabanyeyi.

⁴⁷ Kandi mwakangirirya omo hekalu ebiro byosi. Nabahereri bakulu nabasaki na bandu bakulu babandu mobasonda erimwita;

⁴⁸ nikwa mobatabana ekindu bangakola, kusangwa bandu bosi mobahira emitima oko binywa biwe.