Luka 18 - Nouveau Testament et Psaumes en Ndandi Version 1962

Erisaba buisira eriumbya

¹ Neryo mwatwirabo musyo, ati, batolere erisaba ebiro byosi butsira eriluha.

² Mwabuga ati, Habya omutsweri oko muyi muguma isiariubaha Mungu kutse erikenga mundu;

³ noko muyi oyo habya omukwakali abya akamuhikako akamu bwira ati, Unduhiraye enzigu yage.

⁴ Neryo mohahwa ebiro inianemogana; nikwa enyuma mwayibwira ati, Nomo ndyubaha oMungu kutse erikenga mundu,

⁵ nikwa kusangwa omukwa­kali oyu akanyiluhaya, ngandimutuhirya, bitebitya iniakandi syanduhya erihika ebiro byosi.

⁶ Kandi oMukama mwabuga ati, Mowe ebyo omutsweri utatunganene akabuga.

⁷ NoMungu naye siendisyatuhirya abayisogawa buwe abakamulakira eritungi nomo kiro kwehi? Asyalindirirabo kwehi?

⁸ Ngababwira nyiti, Akandisyatuhiryabo luba. Nikwa oMugala womundu amasa, akandisyeya erikirirya oko kihugo kwehi?

MuFarisayo nomusolesya

⁹ Kandi mwatwa omusyo busana nabandi abayihalamba bati ni batunganene bakapona abandi bosi:

¹⁰ ati, Abandu babiri mobahetukira omo hekalu erisaba, omuguma ni muFarisayo nogundi abya musolesya.

¹¹ OmuFarisayo mwimana mwasaba omo mutima wuwe ati, Mungu, ngakuha ewasingya ingye sindingene nga bandi bandu, abanyeyi, nabatatunganene, naba singiri, kutse ngo musolesya oyu.

¹² Ngatsira engendo ibiri oburi yenga, ngaha ekiguma kyerikumi omo byosi ngabana.

¹³ Nikwa omusolesya, mwimana hali, mwataliga erisumbira ameso wuwe elubula, nikwa mwahumanga oko kikuba kiwe, ati, Mungu unyiganyire ingye mukola nabi!

¹⁴ Ngababwira, nyiti, omundu oyu mwakimira omwe iniabiritungananibwa kwilaba ogundi; kusangwa oburi mundu oyu kayihamaya asyakehibwa, nikwa oyu kayikehaya asyahamibwa.

Yesu na bana balere

¹⁵ Neryo babya bakamuletera abana balere bati atule kubo; nikwa abiga omugulu balangira ekyo, mobakungabo.

¹⁶ Nikwa Yesu mwabirikirabo ahari, mwabwirabo ati, Muleke abana balere bambikeko, simukagebo; kusangwa abari batya obwami bwoMungu ni bwabo.

¹⁷ Kwenene, ngabuga nenyu, nyiti oyu tiangirira obwami bwoMungu ngowana mulere siendisingira mubo na hake.

Owebindu

¹⁸ Nomurongani muguma mwamubulya ati, Mukangirirya mubuya, nasyakolaki eribana engebe yerikota mo mwandu kwehi?

¹⁹ Yesu mwabuga naye ati, Busana naki ukanyahula mo mubuya kwehi? Sihari mubuya nina Mungu iyo wene.

²⁰ Unasi ebihano: Susyesingira, Susita, Susiba, Susyelega, Usikaye tata wawe na koyo wawe.

²¹ Naye mwamubwira ati, Ebyosi ebi nabiriberereryabyo eritsuka omo bwana bwage.

²² Yesu abere abiowa, mwamubwira ati, Ukisiya omwatsi muguma. Ugulaye ebyosi uwite ugabirebyo oko bera, wasyabya nobusoki elubula; wase ungwame.

²³ Nikwa abere owa ebi mwakwa bulige, kusangwa abya webingi kutsibu.

²⁴ Yesu nerimutungerera mwabuga ati, Rikalire riti oko bebingi eri ingira omo bwami bwoMungu!

²⁵ Kusangwa ni lyolo busana nengamia erilaba omo riso ryenzanza kwilaba omundu webindu eriingira omo bwami bwoAlungu.

²⁶ Abowa bati, Byamabya iko biri bitya nindi angatoka erilamibwa kwehi?

²⁷ Nikwa mwabuga ati, Ebitetokekana oko bandu bikatokekana oko Mungu.

²⁸ Petero mwabuga ati, Lebaya, twabirisiga ebyetu nerikukwama.

²⁹ Naye mwabwirabo ati, Kwenene, ngabuga nenyu, sihari mundu oyu wasiga enyumba kutse omukali wuwe kutse abagala babo kutse abamubuta kutse abana, busana nobwami bwo Mungu,

³⁰ oyu tendisimya ebilabire aho kutsibu oko mugulu oyu noko mugulu akandisyasa engebe yerikota.

Amagali wa Yesu

³¹ Kandi mwatwala erikumi na babiri, mwabuga nabo ati, Lebaya, tukahetukira eYerusalema, nebyosi byasakawa na baminyereri busana noMugala womundu byasyabererera.

³² Kusangwa asyahoterwa oko Bihanda, asyasekereribwa neri itwa esisoni neritwirwako amatandi;

³³ basyamuswirya emi koba nerimwita, noko kiro kyebisatu asyalubuka.

³⁴ Nikwa mobataminya emyatsi eyi na hake; neribuga eri moryabiswa kubo, mobataminya ekyabugawa.

Endimatime ya Yeriko

³⁵ Omugulu asonda erihika eYeriko, endimatime inianikere oko musike wenzira akasabirirya;

³⁶ neriowa emilondo ikalaba, mwabulya ati, kuti?

³⁷ Mobamubwira bati, Yesu wa Nazareti akalaba.

³⁸ Naye mwabirikira ati, Yesu, Mugala wa Dawidi, unyigenyere!

³⁹ Ababya embere mobamukunga, mobamu bwira bati abye bukutu; nikwa mwabirikira okwilaba aho ati, Mugala wa Dawidi, unyigenyere!

⁴⁰ Yesu mwahangana, mwa tegeka ati bamuletereye; neryo amabihika hakuhi, mwamubulya ati,

⁴¹ Ukasonda uti ngakuyire nyiti kwehi? Naye ati, Mukama, nyibane erilangira ryage.

⁴² Yesu mwamubwira ati, Ubane erilangira ryawe; erikirirya ryawe ryamakulamya.

⁴³ Neryo-neryo mwabana erilangira mwamukwama, neripipa Mungu; nabandu bosi, babere babilangirakyo mobapipa oMungu.