Luka 17 - Nouveau Testament et Psaumes en Ndandi Version 1962

Erihana misindomisindo

¹ Neryo mwabwira abiga buwe ati, Ebikatwikalaya bikandi syasa kundu; nikwa obulige kwoyu kaletabyo!

² Kumbe ryowene busana naye eriboherwako oluso oko bikya biwe neriguswa omo ngetsi, kwilaba erituma omuguma oko balere aba akatwikala.

³ Muyitegaye; omugala wenyu amakola nabi, umukunge, amabinduka, umubuyire;

⁴ kandi amakukola nabi engendo sirinda oko kiro kiguma, akaswabinduka ngendo sirinda, ati, Ngabinduka, ritolere iwamubuyira.

⁵ Abakwenda mobabwira Mukama bati, Ukanyaye erikirirya ryetu!

⁶ No Mukama mwabuga ati, Kumbe muwite erikirirya nga kabuto ka haradari, imwabwira omuti womutini oyu muti, Ukulawe, uyaherawe omo ngetsi, nago iniabowa.

⁷ Nindi kwimwe kwehi oyu wite omugombe oyu karima kutse akarisaya esyomubuli, iniamubwira akalwa omwirima ati, Wase lino wikale okwirya?

⁸ Siendisyamubwira kwehi ati, Ukokotaye ebyalya busana nage, wambale unyikolere, erihika okwibirya neripulya; nenyuma ukandirya neripulya.

⁹ Akaha omugombe oyo ye wasingye kusangwa akola ebyo ategekawa kwehi?

¹⁰ Nenyu nibya, omugulu mwamabikola ebyo mukategekawa ebyosi, mubuge muti, Turi bagombe batatolere; twabirikola ebyo tutolere itwakola.

Abahaga ikumi

¹¹ Babya ibari omo nzira yerigenda eYerusalema neryo mwalaba omukati-kati keSamaria na Galilaya.

¹² Nomugulu ingira omo kayi, abahaga ikumi mobahindana naye, mobaha ngana hali

¹³ mobasumba omulenge wabo bati, Yesu, Mu kama, utuganyire.

¹⁴ Nomugulu alola kubo mwabuga nabo ati, Mugende muyayikanganaye oko bahereri. Neryo babere banemogenda moberibwa.

¹⁵ Neryo muguma wakubo, amabi langira kwamabilamibwa, mwasubula, mwapipa Mungu nomu­lenge munene;

¹⁶ mwawa oko busu buwe oko bisandu bya Yesu, erimuha ewasingya. Naye abya muSamaria.

¹⁷ Yesu mwamubulya ati, Aberibawa sibabya ikumi kwehi? Omwenda bari hahi kwehi?

¹⁸ Sihetabya nomuguma oyu kasubula neripipa Mungu yono mugendi oyu kwehi?

¹⁹ Neryo mwa buga naye ati, Hangana uyigendere; erikirirya ryawe ryama bikulamya.

Erihika ryobwami

²⁰ Nomugulu abulibawa nabaFarisayo obwami bwo Mungu nga bwamasa mwasubiryabo ati, Obwami bwoMungu sibwe ndiasa nebiminyikalo ebikalolawako;

²¹ kutse sibendisyabuga bati, Lebaya, buri hano! Kutse haria! kusangwa lebaya, obwami bwo Mungu buri omukati-kati kenyu.

²² Neryo mwabuga na biga, ati, Ebiro byasyasa mwasyasonda erilola oko kiro kiguma omo biro byoMugala womundu, simwendisyalola kukyo.

²³ Basyababwira ambu, Lebaya, haria! kutse lebaya, hano! simusyeyayo, simusyekwamabo.

²⁴ Kusangwa ngoko akarabyo kakapalaya nerikolerya ekyanya eritsuka oko lundi luhande nerihika oko lundi luhande, oMugala womundu kwa syabya atya oko kiro kiwe.

²⁵ Nikwa okwitsuka atolere eri agalwa omo myatsi mingi neriga nwa nolulengo olu.

²⁶ Ngoko byabya oko biro bya Noa, ko bikandisyabya bitya omo biro byoMugala womundu.

²⁷ Mobarya, mobapulya, mobahikania, mobaherukania, erihika ekiro Noa ingira omo bwato, nerigunga ryamagetsi moryasa moryaherya abosi.

²⁸ Kandi ngoko kyabya oko biro bya Luti—mobarya, mobapulya, mobagula, moba gulya, mobahera, mobahimba,

²⁹ nikwa oko kiro ekyo Luti alwa eSodoma omuliro neripumuka ryomuliro mobyawa erilwa elubula mobyaherya abosi—

³⁰ ko bikandisyabya bitya oko kiro Mugala womundu asyabisulwa.

³¹ Oko kiro ekyo, oyuri endata ko nyumba, nebindu biwe biri omo nyumba, siakime eribilusyabyomo; kandi oyuri mwirima siasube enyuma.

³² Mwibuke omukali wa Luti.

³³ Oyu kasonda erilamya engebe yiwe asyatalyayo, nikwa oyu katalaya engebe yiwe asyalamyayo.

³⁴ Ngababwira, nyiti, omo kiro ekyo hasyabya abandu babiri oko ngingo nguma; omuguma asyatwalwa no­gundi asyasiwa.

³⁵ Hasyabya abakali babiri bakaswa haguma; omuguma asyatwalwa nogundi asyasiwa.

³⁶ Abandu babiri basyabya omwirima; omuguma asyatwalwa nogundi asyasiwa.

³⁷ Mobamubwira bati, Hahi kwehi? oMukama. Naye mwa­buga nabo ati, Aho ekinda kiri, aho amasamba akahindana.