Luka 16 - Nouveau Testament et Psaumes en Ndandi Version 1962

Omubiki utatunganene

¹ Kandi mwabuga nabiga ati, Habya mundu webindu oyuwite mubiki, naye mwatsongerwa kwiye ambu abere akatalya obusoki buwe.

² Neryo mwamubirikira mwabuga naye ati, Niki ekyo ngakowako kwehi? Leta eriganza ryebyo ubikire, kusangwa siwendiswabya omubiki.

³ Nomubiki oyo mwayibwira ati, Ngandiyira nyiti, kwehi? kusangwa mukama wage amanyinyega eribika. Sindi na kagala keririma, kandi ngakwa esisoni syerihema.

⁴ Nyinasi ekyo ngandikola, abandu batoke erinyikokya omo manyumba wabo namabilusibwa okwi bika.

⁵ Neryo, mwabirikira abeminda yo mukama wuwe mo muguma muguma, mwabuga nowerimbere ati, Omwinda womukama wage ni gungahi kuwe kwehi?

⁶ Naye ati, Ni birengi byamaguta erigana. Naye mwamubwira ati. Wimaye akaratasi kawe wikale luba usake makumi atanu.

⁷ Neryo mwabuga nogundi ati, Nawe uri komwinda ungahi kwehi? Naye ati, Ebirengi byenganu erigana. Mwabuga naye ati, Imaya karatasi kawe, usake amakumi munani.

⁸ Nomukama oyo mwasima omubiki oyo wamabehi busana na menge wuwe; kusangwa abagala be kihugo kino ni bamenge omo lulengo lwabo kwilaba abagala bekyakakala.

⁹ Ngababwira, nyiti, muyira abira busana nenyu omo busoki butatunganene, omu­gulu bwasyahwa ibabakokya omo manyumba werikota.

¹⁰ Oyu tesiganiraya omo kikekike siarisiganiraya nomo kinene; noyu kabiha omo kikekike akabiha nomo kinene.

¹¹ Neryo mwamasiganirya omo busoki butatunganene, ni ndi wasyababikya ebindu byekwenene kwehi?

¹² Neryo mwama siganirya omo byabandi, nindi wasyabaha ebyenyu kwehi?

¹³ Sihari omugombe oyu katoka erikolera abakama babiri; kusangwa asyakwa muguma ekiniga inianza ogundi, kutse asyabegera oko muguma iniapona ogundi. Simwangatoka erikolera Mungu nebindu.

¹⁴ AbaFarisayo, ababya banzi besyofaranka, mobowa ebi byosi, mobamusekererya.

¹⁵ Nikwa mwabwirabo ati, Muri abo abakayitungananaya omo meso wabandu, nikwa oMungu anasi emitima yenyu; kusangwa ekikayihamaya omo bandu ni syonye emuliro woMungu.

¹⁶ Ebihano nabaminyereri mobyabyaho erihika oko mugulu wa Yoane; eritsuka oko omugulu oyo engulu yowene yobwami bwoMungu ikakangiriribawa, noburi mundu akingiramo na maka.

¹⁷ Nikwa elubula ne kihugo bikahwa luba kwilaba eriombya rya katondi kaguma akebihano.

¹⁸ Oburi mundu oyu kakomola mukaliwe akahikya ogundi iniamasingira, noyu kahikaya omukali oyu riakomolawa niba wuwe naye iniamasi ngira.

Owebindu na Lazaro

¹⁹ Neryo habya omundu webindu, iniambite olukimba lomunyama nomusohe owene iniakarya ebibuya ebiro byosi.

²⁰ Nokwirimbo riwe habya hagotsere omundu mwera erina riwe Lazaro, iniatsungene ebironda,

²¹ iniakasonda erirya ebitahangukira ebikatogonga oko butara bwomundu webindu; kandi esyombwa mosyahika neriryatsirira ebironda biwe.

²² Nomundu mwera oyo mwahola mwahekwa na balaika oko kikuba kyaAbrahamu. Nomundu webindu naye mwahola mwatabwa;

²³ nomo kurimu, iniakagalawa, mwasumba ameso wuwe, mwalangira Abrahamu hali na Lazaro oko kikuba kiwe.

²⁴ Neryo mwabirikira ati, Tata Abrahamu, unyiganyire, utume Lazaro ahire omutwemutwe womunwe wuwe omo magetsi aholokaye olulimi lwage; kusangwa ngagalawa omo kirimi eki.

²⁵ Nikwa Abrahamu mwamubwira ati, Mugala, wibuke ngoko mugulu wabya ukiriho mowabana ebindu bibuya, na Lazaro mwabana emyatsi mibi; nikwa lino akasibikibawa hano, nawe uri omwagalwa.

²⁶ Kandi omukati-kati ketu nawe omwanya munene abirihirwaho, na bakasonda erilwa eno neriyeyo muri sibangatoka, kandi sihari abangasoka erilwa eyo nerihika aho turi.

²⁷ Naye mwabuga ati, Ngakugo tata, nyiti umutume oko nyumba ya tata wage,

²⁸ kusangwa ngwite abagala betu batanu, iniatoka erisagisyabo, sibangaswahika hano aherisirikalira.

²⁹ Nikwa Abrahamu mwamubwira ati, Bawite Musa na baminyereri; bowebo.

³⁰ Naye ati, Eyihi, tata Abrahamu; nikwa omundu amahika kubo akalwa oko baholi, bakandibinduka.

³¹ Naye mwamubwira ati, Bamati ndiowa Musa na baminyereri, kandi sibendisyayisinga nomo mundu angalwa oko baholi.