Luka 13 - Nouveau Testament et Psaumes en Ndandi Version 1962

Eribinduka

¹ Omugulu oyo habya bandi abamutulira owabaGalilaya abo Pilato atulunganaya omusasi wabo namahere wabo.

² Naye mwasubiryabo ati, Kwehi mukalingikanaya muti aba Galilaya aba babya bakola nabi kwilaba abandi baGalilaya bosi, kusangwa bagalibawa batya kwehi?

³ Ngababwira nyiti kobite bitya; nikwa nenyu mwamatindabinduka mwasyahera mutya inywe bosi.

⁴ Kutse erikumi nomunani abo enyumba ya Siloamu yatererako yitabo, mukalingikanaya muti babya bakola nabi kwilaba abandi bosi abikere eYerusalema kwehi?

⁵ Nga­babwira nyiti; Kobite bitya; nikwa nenyu mwamatindabinduka mwasyahera mutya inywe bosi.

Mutini atebuta

⁶ Neryo mwatwa omusyo oyu ati: Omundu muguma mwa heresya omuti wa mutini omwirima riwe ryebinyu; neryo mwasa erisonda ebiguma kugo mwatabana byoko.

⁷ Neryo mwabwira omuhingi owebinyu ati, Langira, lino ni mituta isatu ngasyasonda ebiguma oko muti womutini oyu, sindita banabyo. Ukondego; busana naki akaheraya ekitaka kyo buyira kwehi?

⁸ Naye mwamusubirya ati, Ulekego, mukama, oko mututa oyu nataswatakula omo ndambi yago nerihira mwo muboga.

⁹ Amabuta ebiguma erinyuma, rinuwene; nikwa amatindabya atya, iwakondago.

Omukali oyu kondomire

¹⁰ Kandi abya akakangirirya omo nyumba nguma yerihi­ndana ekiro kyesabato.

¹¹ Neryo lebaya habya omukali abya alwere ekirimu kyendwala emituta erikumi nomunani; iniako ndomire isiaritoka eriunamuka.

¹² Yesu abere amulolako, mwamubirikira ati, Mukali, Wamaboholwa oko ndwala yawe.

¹³ Mwamuhira kwebiala biwe, noko katambi ako mwatungana nibwa, mwapipa Mungu.

¹⁴ Nikwa omurongani wenyumba yerihindana, mwahitana kusangwa Yesu mwalamya omo kiro kyasabato, mwabwira bandu ati, Hari biro endatu ebitolere erikolwamo omubiri; Mwase oko biro ebyo mulamibawe, butsira ekiro kyasabato.

¹⁵ Neryo Mukama mwabuga naye ati, Inywe batebya! Oburi mundu kwinywe siari hangula ende yiwe kutse epunda yiwe oko kiro kyasabato neritwalayo eriyapulya kwehi?

¹⁶ No mukali oyu mwali wa Abrahamu oyu Satani aboha emituta ikumi nomunani syatolere eriboholwa omo muliki oyu ekiro kyasabato kwehi?

¹⁷ Abere akabuga ebi, esyonzigu siwe syosi mobakwa esisom; nabandu bosi mobatse mera emyatsi yosi yolukengerwa eyakola.

Akabuto kaHaradali

¹⁸ Kyaleka iniabuga ati, Obwami bwoMungu busosene naki kwehi? Kandi nasyasosekaniabo naki kwehi?

¹⁹ Busosenenakabuto kaharadari ako mundu imaya abibako omwirima riwe; nako mokalasa mokabya muti, nesyonyonyu syo mokyanya mosyahimba esyonyutu omo mitahi yago.

²⁰ Kandi mwabuga ati, Nasyasosekania obwami bwoMungu naki kwehi?

²¹ Bu sosene nekihamya omukali imaya mwabisakyo omo birengi bisatu byeyisyano nebyosi mobyahama.

Oluyi luke

²² Kandi mwalendera omu miyi nomo hiyi, erikangirirya, omo lugendo lweriya eYerusalema.

²³ Nomuguma mwabuga naye ati, Mukama, abakandisyalamibwa ni bake kwehi? Naye mwabuga nabo ati,

²⁴ Mulenge kutsibu eriingira omo luyi luke; kusangwa ngababwira nyiti ni bangi, abasyasonda eri ingiramo sibendisyatoka.

²⁵ Omugulu mwenye nyumba ama bihangana nerikinga oluyi, nenyu imwatsuka erihangana eyihya nerikongota oko luyi, muti, Mukama, utukingurire. Naye asyabasubirya ati, Sinyibasi eyo mukalwa.

²⁶ Nenyu mwasya tsuka eribuga muti, motwarya motwapulya embere syawe, nawe mowakangirirya omo syonzira syetu.

²⁷ Nikwa asyabuga ati, Ngababwira nyiti, Sinyasi eyo mukalwa; mulwe aho nyiri, inywe bosi abakoli bebibi!

²⁸ Aho mwasyarira nerirya ameno wenyu, omugulu mukalangira Abrahamu na Isaka na Yakobo nabaminyereri bosi omo bwami bwoMungu nenyu imwama bikunwa eyihya.

²⁹ Nabandu basyalwa koluhande lwendata noko luhande lweyikwa, noko lutambi noko lundi lutambi, basikala oko butara okwirya omo bwami bwoMungu.

³⁰ Tale baya, abandi benyuma basyabya bemuliro, nabandi bembere basyabya benyuma.

Yesu akarira busana eYerusalema

³¹ Oko katambi ako abandi abaFarisayo mobahika, moba mubwira bati, Lwa hano, ugende, kusangwa Herode akasonda erikwita.

³² Naye mwabuga nabo ati, Mugende mubwire eboha eyo muti, Lebaya, Ngahiga esyombinga nerikola omubiri werilamya munabwire nomungyakya, nekiro kyebisatu nasya bugirira emyatsi yage.

³³ Nikwa ritolere inagenda omo nzira yage munabwire nomungyakya, na mwalindi; kusangwa omu minyereri siangatoka erihera erilwa Yerusalema.

³⁴ Uwe Yerusalema, Yerusalema, ukita abaminyereri neriita omo mabwe abatumawa ukuwe! Ni ngendo singahi ngasonda eri hindanya abana bawe ngengoko ikahindanaya ehyana hyayo omo bipupa byayo, imutandigira!

³⁵ Lebaya, enyumba yenyu yamasigala yoyene. Ngababwira, nyiti, simwendisyaswanyilo lako erihika aho mwasyabugira muti, Ari nomuyisa oyu kasa omo rina ryoMukama!