Luka 10 - Nouveau Testament et Psaumes en Ndandi Version 1962

Yesu akatuma amakumi arinda

¹ Enyuma waho Mukama mwahira abandi amakumi arinda, mwatumabo embere siwe ababiribabiri, eriya omo miyi yosi naha asonda eriya.

² Kandi mwabuga nabo ati, Erigesa ni nene nikwa abakoli bomubiri ni bake; nikwa musabe Mukama werigesa atume abahingi okwigesa riwe.

³ Mugende; lebaya, ngabatuma ngehyana hyembuli omukati-kati kama kungu.

⁴ Simuheka eritusi, kutse engunza, kutse esyongendero; simubukaye omundu omo nzira.

⁵ Nenyumba eyo mukingi ramo, mutsuke eribuga muti, Obuholo bubye omo nyumba eyi!

⁶ Omugala wobuholo amabyaho, obuholo bwenyu bwasyamu byako; amabya ate, ibwasuba kwinywe.

⁷ Mwikale omo nyumba eyo, imwarya neripulya ebyo bakabaha, kusangwa omuhingi atolere erihembwa riwe; simuhumire omo wandi manyumba.

⁸ Omugulu mukingira omo muyi bakabakokaya, imwarya ebyo bakabaha;

⁹ mulamaye abakoni abari mugo mubwirebo muti, Obwami bwoMungu bwamabihika hakuhi nenyu.

¹⁰ Nikwa mwamingira oko muyi batetabakokya, mwingire omo syonzira syago muti,

¹¹ Olututu olwo muyi wenyu olumakirire omo bisandu byetu, tukasangulalo busana nenyu; nikwa muminye eki, ko bwami bwabirihika hakuhi.

¹² Ngababwira ryasyabya ryolo eryeSodomo ekiro ekyo okwi laba eryomuyi oyo.

¹³ Obuhanya kuwe, Korazini! Obuhanya kuwe, Betesaida! kusangwa kumbe emibiri ya maka eyakolwa omwisi wenyu kumbe yakolawa omo Tiro ne Sidona, kumbe babiribinduka kera, ibanikere omo mitole nomwibu.

¹⁴ Nikwa okwitswera erya Tiro na Sidona ryasyabya ryolo kwilaba eryenyu.

¹⁵ Nawe Kapernaumu, wasyasumbirwa endata elubula kwehi? Wasya ndagalilibwa ekulimu.

¹⁶ Oyu kabowa akanyowa, noyu kabagana iniakanyigana, noyu kanyigana akagana oyu wanyi tuma.

Erisubula ryamakumi arinda

¹⁷ Amakumi arinda mobasubula nobutseme bati, Mukama esyombinga nasyo sikatowa omo rina ryawe!

¹⁸ Naye mwa bwirabo ati. Monalangira Satani ikatoga ngeripalya rikalwa elubula.

¹⁹ Lebaya nabiribaha ehamuli eriryatangirira esyo nzoka nesyonge, nokwilaba akagala kosi kenzigu; isihari kindu kyangabagalya na hake.

²⁰ Nikwa simutseme busana nesyo mbinga eribowa; nikwa mutseme kusangwa amena wenyu abirisakwa elubula.

²¹ Noko ndambi eyo mwatsema omo Kirimu Kibuyirire mwabuga ati, Ngakuha ewasingya Tata, Mukama welubula ne kihugo, kusangwa wabiribisa emyatsi eyo oko bamenge naberiminya wabiribisulabyo oko bana balere; ega, Tata, ku sangwa erisonda ryawe ryolukogo ko ryabya ritya.

²² Nabiri habwa emyatsi yosi na Tata wage; kandi sihari oyo wasi Mugala nga nindi, ni nise, kutse sihari oyu wasi Ise nga nindi, ni na Mugala nomundu oyo Mugala akayisoga erimubisulira.

²³ Neryo mwakebera abiga mwabwirabo bubi-sobiso ati, Omuyisa ari oko meso woyu kalangira ebyo mukalangira!

²⁴ Kusangwa ngababwira kwa baminyereri bangi na bami bayitsutsa erilangira ebyo mukalangira, mobatetalangirabyo, neriowa ebyo mukowa, mobatetowabyo.

OmuSamaria wolukogo

²⁵ Kandi lebaya, omwimiri muguma mwahangana nerimu lengako ati, Mukangirirya nangakolaki erilagwa engebe yerikota mo mwandu kwehi?

²⁶ Neryo mwabuga naye ati, Nikiekisakire omo bihano kwehi? Ukasomaki omo kitabu kwehi?

²⁷ Mwamusubirya, ati, Wanze oMukama Mungu wawe nomutima wawe gosi, nengebe yawe yosi, namaka wawe gosi, noburingikania bwawe bosi; kandi na mulikyenyu ngawe.

²⁸ Naye mwabuga naye ati, Wamabisubya ndeke; uyire utya, wasyabyaho.

²⁹ Nikwa iye, iniakasonda eriyiyira mo mutu nganene, mwabulya Yesu ati, Mulikyetu nindi kwehi?

³⁰ Yesu mwasubirya ati, Omundu abya alwa eYerusalema akandagarira eYeriko, mwawa omo byala byabanyeyi, abamulusaya kwesyo ngimba nerimuhunza, mobayigendera, mobamusiga hakuhi nerihola.

³¹ Neryo mokyabya kitya omuhereri iniakandagala omo nzira eyo; mwamulolako mwayihengeka mwalaba.

³² Ritya omuLawi, abere ahikaho mwamulolako, naye mwayihengeka mwalaba.

³³ Nikwa muSamaria, iniane oko lugendo, naye mwahika aho; abere abimulolako mwamuganyira,

³⁴ mwahika ahari mwasenga ebironda biwe, muta inubyo amaguta nebinyu; mwamuhira oko nyama yiwe mwamuleta omo kirimba kyaba geni, mwamutwanira.

³⁵ Nomungyakya mwabana esyofaranka ikumi mwahasyo omwenye kirimba, ati, Umutwanire; wama swabana esindi, nasyakuriha naswasa.

³⁶ Oko basatu aba ukaganiraya uti nindi yo wabya mulikyabo womundu oyo wagwa omukati-kati ka banyeyi kwehi?

³⁷ Naye mwabuga ati, oyo wamukwa eriganyira. Yesu mwamubwira ati, Ugende nawe ukole utya.

Maria na Marata

³⁸ Babere bakine oku lugendo, mwingira oko kayi; nomukali oyu kahulawa mo Marata mwamukokya omo nyumba yiwe.

³⁹ Abya awite mwali wabo oyu kahulawa mo Maria, oyo wabya ikere oko bisandu byoMukama neriowa erikangirirya riwe.

⁴⁰ Nikwa Marata mwahabukya omutima omo mibiri mingi; kandi mwamuhikako ati, Mukama, suritsomana kusa ngwa mwali wetu abirinyitekera emibiri kwehi? Umubwire anyiwatikaye.

⁴¹ Nikwa Mukama mwamusubirya ati, Marata, Marata, ukayiganyira nerigangaganga busana nemyatsi mingi;

⁴² nikwa omwatsi muguma atolere. Kusangwa Maria abiriyi soga erigabo eryowene, eryate angasagulwa.