Esyonyimbo 9 - Nouveau Testament et Psaumes en Ndandi Version 1962

Eriha ewasingya

Oko mwimbiriri mukulu: ngoyuriahola ko mugala. Sauma ya Dawidi.

¹ Ngandiha ewasingya oko oMUKAMA nomutima wage gosi; Ngandikania emibiri yawe yosi yeriswekera.

² Nasyatsema neritsanga omwisi wawe, Nasyimba eripipa oko rina ryawe, uwe weNdata Kutsibu.

³ Omugulu esyonzigu syage sikasuba enyuma, Sikatwikala sikahera embere syawe.

⁴ Kusangwa wabiriimira omwatsi wage atunganene; Wabiriikala oko kitumbi kyobwami eritswera eritunganene.

⁵ Wabirikunga ebihanda, wabiriherya ababi; Wabirisangula erina ryabo kera na kera.

⁶ Enzigu yabirihwaho syabirihera kera na kera; Emiyi yabo wabirihimbulayo; Eribukabo ryabiribula.

⁷ Nikwa MUKAMA abiriikala eribya omwami kera nakera, Abiriteka ekitumbi kiwe kyobwami busana neritswera;

⁸ Akatswera e kihugo neritunganene, Akatswera abandu nekwenene.

⁹ Mukama ni nyumba iwatire yobubaliro busana nabakende-reribawa, Obubaliro oko migulu yobulige.

¹⁰ Nabasi erina ryawe bakahira erikirirya oko we, Kusangwa uwe MUKAMA, suritasigania abakakusonda.

¹¹ Mwimbire oMUKAMA eripipa, oyo wikere eSayuni! Mukaniraye abandu emibiri yiwe!

¹² Kusangwa oyu kakisaya omusasi akibukabo; Siaribirirawa erilaka ryabakagalawa.

¹³ Uwe MUKAMA unyiganyire! Lebaya ngoko ngagalawa nabakanyikwa ekiniga, Uwe ukanyisumba erindusya oko syongyo syoluholo,

¹⁴ Inatoka erikangania eripipa ryawe ryosi, Omo syongyo syamwali wa Sayuni Nasyatsema omwilama ryawe.

¹⁵ Ebihanda byabiritobera omo bohya byatakula; Omo butahataha obo batega ebisandu byabiritsimbwamo.

¹⁶ OMUKAMA abiriyiminyisya, abiritswera olubanza; Ababi babirihambwa omo mubiri webyala byabo. Eriganirya. [Sela

¹⁷ Ababi basyasubibwa eKurimu, Nebihanda byosi abakibirirawa oMungu.

¹⁸ Kusangwa abobwaga sibendisibiriranwa ebiro byosi, Namaha wabera siendisyahera nakera nakera.

¹⁹ Uwe MUKAMA, uhangane! Suleke bandu erisingana; Ebihanda bitswerawe embere syawe!

²⁰ Uwe MUKAMA, witebo obuba! Ebihanda biminye ko bari bandu busa! [Sela