Esyonyimbo 86 - Nouveau Testament et Psaumes en Ndandi Version 1962

Sauma yerigo nerikirirya

Erisaba ryaDawidi.

¹ Uwe MUKAMA, unamaye okutu kwawe, unyisubiraye; Kusangwa ndi mwera nowabwaga.

² Ubike ekirimu kyage; kusangwa ndi mugenge; Uwe Mungu wage, ulamaye omugombe wawe oyu kayiketera we.

³ Uwe Mukama unyiganyire; Kusangwa ngarira ukuwe eritungi ryosi.

⁴ Utsemesaye ekirimu kyomugombe wawe; Kusangwa ukuwe Mukama ngasumba ekirimu kyage.

⁵ Kusangwa uwe Mukama, uri mubuya, unasikire eribuyira, Guswire nolwanzo lubuya oko bosi abakakubirikira.

⁶ Utege okutu okwisaba ryage, Uwe MUKAMA; Uhulikirire omulenge werigo ryage.

⁷ Omo kiro kyobulige bwage nasyakubirikira; Kusangwa ukandisyanyisubirya.

⁸ Sihari gundi ngawe uwe Mukama omukati-kati kemyungu; Kandi sihari emibiri ngeyikuwawe.

⁹ Ebihanda byosi ebyo wabirihangika byasyasa nerikukamaembere syawe, uwe MUKAMA; Kandi basyapipa erina ryawe.

¹⁰ Kusangwa uri mukulu, ukakola emyatsi yeriswekera: Uri Mungu wowene.

¹¹ Uwe MUKAMA, unyikangiriraye enzira yawe; nasyalendera omo kwenene yawe; Uhindanaye omutima wage eriubaha erina ryawe.

¹² Nasyakupipa, uwe Mukama Mungu wage, nomutima wagegosi; Nasyasikya erina ryawe kera na kera.

¹³ Kusangwa olwanzo lubuya lwawe ni lungi ukwingye; Wabirilamya ekirimu kyage omo kurimu mwiyikwa hali.

¹⁴ Uwe Mungu, abakayitendera babirinyibambira, Endeko yabobwanise ikasonda ekirimu kyage, Kandi sibetakuhira embere syabo.

¹⁵ Nikwa uwe Mukama, uri Mungu wolukogo neriganyira, Eritindahitana luba, nolwanzo lubuya lunene nekwenene.

¹⁶ Unyikebere unyiganyire; Uhe mugombe wawe akagala kawe, Ulamaye omugala womwanamuto wawe.

¹⁷ Unyikangaye ekiminyikalo kyobubuya, Neryo abakanyikwa ekiniga balole kukyo bitawe esisoni, Kusangwa uwe, MUKAMA, wabirinyiwatikya, nerinyisibikya.