Esyonyimbo 74 - Nouveau Testament et Psaumes en Ndandi Version 1962

Eririra busana nerihera rye kihugo busana nenzigu

Olwimbo lwaSafu.

¹ Uwe Mungu, busana naki wabiritugusa kera na kera kwehi? Busana naki erihitana ryawe rikatumba oko syombuli syomo lulisiryo lwawe kwehi?

² Wibuke endeko yawe, eyo wagula kera, Eyo wabiritongolya eribya ekihanda kyomwandu wawe; Nekitwa kyaSayuni, aho wabiriikala.

³ Usumbe ebisandu byawe oko haherire endambi yosi. Enzigu yabirikolera ahabuyirire hebibi byosi.

⁴ Esyonzigu syawe syabiriruruma omo katikati kendeko yawe; Babirisingika esyobendere busana nebiminyikalo.

⁵ Babya nga bandu abakasumba esyombasa oko kisakakyemiti.

⁶ Na lino omubiri waho gosi weribatsa Babiritsutsangago omo mbasa nomo syonyondo.

⁷ Babirihisya ahabuyirire hawe omo muliro; Babiritsandya aheriikala ryerina ryawe erihika ahisi.

⁸ Babiribuga omo mutima wabo bati, Tuherayebo nabi: Babirihisya aherihindana hosi hoMungu omo kihugo.

⁹ Sitwelangira ebiminyikalo byetu: Sihakiri omuminyereri nomuguma; Kutse sihari omukati-kati ketu oyu wasi aho byasyahikira.

¹⁰ Uwe Mungu, enzigu yasyatsuma erihika endambi yahikwehi? Enzigu yasyatsuma erina ryawe kera na kera kwehi?

¹¹ Busana naki ukasubaya ebyala byawe enyuma, nibya ebyalabyawe byamali kwehi? Ulusayebyo omo kikuba kyawe utogotayebo kundu.

¹² Nikwa Mungu ni mwami wage eritsuka kera, Iniakayira erilama omukati-kati ke kihugo.

¹³ Mowagaba engetsi omo kagala kawe; Mowatwa emitwe yesyonyama nenenene syomo magetsi.

¹⁴ Mowahimata emitwe ya Leviatani mo bihimatangira; Mowamuha eribya karyo oko bandu abikere omo mbwarara.

¹⁵ Mowatula eyisoko nerigunga: Mowumya esyonyusi nenenene.

¹⁶ Eritungi ni ryawe nekiro nakyo ni kyawe: Mowakokotya ekyakakala neryuba.

¹⁷ Wabirihira emitano yosi eye kihugo: Wabirihangika omugulu womwisi na weritsuku.

¹⁸ Wibuke eki, uwe MUKAMA, ngoko enzigu ikatsuma, Na bandu bikiru bakatsuma erina ryawe.

¹⁹ Suhe enyama ikalire ye kirimu kyakalikuku kawe: Siwibirirawe engebe yabera bawe kera na kera.

²⁰ Ukenge erilaga; Kusangwa aho mwirimya omo kihugo hoswire na heriikala hobwanise.

²¹ Suleke abakanubibawa erisubula nesisoni: Abera nabobwaga bapipe erina ryawe.

²² Hangana, uwe Mungu, uyisohere ebinywa byawe: Wibuke ngoko omundu mukiru akakutsuma eritungiryosi.

²³ Siwibirirawe omulenge wesyonzigu syawe, Olukanda lwabakakubambira lukahetuka endambi yosi.