Esyonyimbo 73 - Nouveau Testament et Psaumes en Ndandi Version 1962

EKITABU KYAKASATU Enduli ya babi

Sauma ya Asafu.

¹ Kwenene Mungu ni mubuya oko Israeli, Oko bawite omutima ahenirye.

² Nikwa ingye, ebisandu byage bilwe hakuhi neritinira; Eribasula ryage rilwe hakuhi neritendera.

³ Kusangwa nabya ngatsura abakayitendereraya, Omugulu nalangira omuyisa wababi.

⁴ Kusangwa sihari eriagalwa omo luholo lwabo; Nikwa akagala kabo kasikire.

⁵ Sibari omo mwaga wabandu; Kutse sibegalawa ngabandu.

⁶ Neryo eriyihamya riri nga luhulula omo bikya byabo; Obwanise bukaswikabo ngo lukimba.

⁷ Ameso wabo akagununguka: Bawite ebilengire ebyo mutima anga-sonda.

⁸ Bakasekereraya, ibabuga ebyerinubya omo bibi: Bakabuga eriyihamya.

⁹ Bakegeka amuno wabo wendata, Nolulimi lwabo lukalendera omo kihugo.

¹⁰ Na ritya bandu buwe bakasubaho: Bakapulaya amagetsi agoswire.

¹¹ Bakabuga bati, Mungu akaminya ati kwehi? NoweNdata Kutsibu anawite amenge kwehi?

¹² Lebaya, ababi babo; Kandi bari nobuholo endambi yosi, bakakanyaya ebindu.

¹³ Kwenene nabirierya omutima wage bosa, Nabirinabya ebyala byage isindi ko kibi;

¹⁴ Kusangwa eritungi ryosi nabiriagalwa, Nerikungwa omo ngyakya syosi.

¹⁵ Kumbe naribuga nyiti, ngandibuga nyitya; Lebaya, kumbe nabiriteba olulengo lwabana bawe.

¹⁶ Omugulu naganiraya ngoko nangaminya eki, Mokyabya mo nduhi omo meso wage;

¹⁷ Erihika aho ningira aho habuyirire hoMungu, Neriganirya enduli yabo.

¹⁸ Kwenene mowahirabo ahatendere ahari amatendere; Mowagusabo ahisi omwihera.

¹⁹ Ni musindo wahi babiribya ekima omo katambi kake! Babiritogotibwa omo buba.

²⁰ Ngenzoli omugulu mundu akabuka, Ritya, uwe MUKAMA omugulu ukabuka, wasyapona ekisosekanio kyabo.

²¹ Kusangwa ekirimu kyage mokyabya omo bulige, Omugulu nasisira omo mutima;

²² Nabya ekikiru neritindaminya; Nabya ngenyama emuliro wawe.

²³ Nikwa ndi haguma nawe endambi yosi; Wabirinyiwata oko byala byage byamali.

²⁴ Wasyanyisondola omwihana ryawe, Nenyuma wasyanyikokya omo lukengerwa.

²⁵ Ngwite ndi elubula atewe kwehi? Isihari ogundi omo kihugo oyo ngasonda ate we.

²⁶ Omubiri wage nomutima wage bikabonda; Nikwa oMungu nibwe yomutima wage nerigabo ryage na kera na kera.

²⁷ Kusangwa, lebaya, abari hah kuwe basyahera: Wabiritogotya abosi abakagenda okwisingira, abakalwaokowe.

²⁸ Nikwa ingye eribya hakuhi noMungu rinyitolere; Nabiriyira MUKAMA Mungu mo busagiro bwage, Inakania emibiri yawe yosi.