Esyonyimbo 69 - Nouveau Testament et Psaumes en Ndandi Version 1962

Erilaka ryobulige

Oko mwimbiriri mukulu, nga birangaranga. Sauma ya Dawidi.

¹ Unyilamaye, Uwe Mungu; Kusangwa amagetsi amahika oko kirimu kyage.

² Namatobera omo londo luri-luri, ahate herihangana: Nabirihika omo milindi yamagetsi, aho amagetsi akanyilengako.

³ Namaluha omo kiriro kyage; omumero wage amuma: Ameso wage amuma omugulu ngalindirira oMungu wage.

⁴ Abakanyikwa obusu hate ekikaleka ni bangi kwilaba esyonzwiri syomutwe wage Abanganyiherya, esyonzigu syage syamabihi, ni bamaka: Ekyo ndahunga kyo ngatuha.

⁵ Uwe Mungu, unasi obukiru bwage; Nebibi byage suribisawabyo.

⁶ Suleke abakakulindirira bakitwa esisoni busana nage, UweMukama Mungu wemilondo: Suleke abakakusonda-sonda erihemulwa busana nage, Uwe Mungu wa Israeli.

⁷ Kusangwa busana nawe nabiriheka eritsumwa; Esisoni syabiriswika obusu bwage.

⁸ Nabiribya mulwahali oko bagala betu, Noyu tasibwe oko bana bakoyo.

⁹ Obuha bwenyumba yawe bukanyirya; Nebitsumi byabakakutsuma byabirinyitogerako.

¹⁰ Omugulu natogaya emisonia, neritsirya ekirimu kyage Mobyabya eritsuma kwingye.

¹¹ Omugulu nayira emitole mo ngimba syage, Monabya ngomusyo kubo.

¹² Abikere okwirimbo bakanyitonga; Ndi lwimbo lwabakundirya.

¹³ Nikwa ingye, erisaba ryage riri ukuwe MUKAMA, okomugulu weriligwa: Uwe Mungu, omo lwanzo lubuya lwawe lunene, Unyisubiraye omo kwenene yerilama ryawe.

¹⁴ Unyilamaye omo londo, suleke ngatobera: Unyilamaye okwabo bakanyikwa obusu, noko milindi yamagetsi.

¹⁵ Suleke erigunga ryamagetsi erinyikunungula, Kutse emilindi erinyimera; Suleke obuhya bukakumba obuno bwabo okwingye.

¹⁶ Unyisubiraye, uwe MUKAMA; kusangwa olwanzo lwawelubuya ni bwenge: Unyikebere busana neriganyira ryawe ringi.

¹⁷ Subise obusu bwawe oko mugombe wawe; Kusangwa nyiri omo bulige; unyisubiraye luba.

¹⁸ Usegere hakuhi nekirimu kyage, utongolayekyo: Uriyitongolaye busana nesyonzigu syage.

¹⁹ Unasi eritsumwa ryage, nesisoni syage, neriponwa ryage: Esyonzigu syage syosi siri embere syawe.

²⁰ Eritsumwa ryabiritwa omutima wage; nabiriritoherwanobulige: Monasonda owerinyiganyira, nikwa sihabya nomuguma; Nabasibikya, nikwa mondabana nomuguma.

²¹ Mobamba endulu busana na karyo kage; Kandi busana nenyota yage mobamba epata busana neripulya.

²² Obutara bwabo embere syabo bubye muliati; Nomugulu bari nobuholo bubye kitego.

²³ Ameso wabo abye mwirimya, ibatatoka erilangira; Utitimanaye esyombindi syabo endambi yosi.

²⁴ Gute erihitana ryawe ryokubo Nobukari bwerihitana ryawe buhike kubo.

²⁵ Obwikalo bwabo bubye kima; Sihabye omundu oyu kikala omo mahema wabo.

²⁶ Kusangwa bakendereraya oyo wabiriswirya; Bakakanaya obulige bwabo wabirihutalya.

²⁷ Utomeke ebibi oko bibi byabo; Suleke bakahika okwitunganene ryawe.

²⁸ Balusibawe omo kitabu kyengebe. Sibasakawe haguma nabatunganene.

²⁹ Nikwa ingye ndi mwera noweriagalwa: Uwe Mungu, erilama ryawe rinyisumbe.

³⁰ Nasyapipa erina ryoMungu omo lwimbo, Nasyamuhamya newasingya.

³¹ Kyasyatsemesya MUKAMA kwilaba enume, Kutse enume eyiwite amahembe neminono.

³² Abolobolo babirilangirakyo, babiritsema: Inywe mukasonda-sonda Mungu, omutima wenyu abyeho.

³³ Kusangwa oMUKAMA akowa abobwaga, Kandi siaripona ababohwa buwe.

³⁴ Elubula ne kihugo bimupipe, Nengetsi noburi kindu ekikalendera omwisi wayo.

³⁵ Kusangwa Mungu asyalamya Sayuni, asyahimba emiyiyaYuda; Basikalayo, neriimyakyo mo mwandu.

³⁶ Olubuto lwabagombe buwe lwasyaryakyo mo mwandunibya; Nabanzire erina riwe basikala mukyo.