Esyonyimbo 51 - Nouveau Testament et Psaumes en Ndandi Version 1962

Erisaba ryomukola nabi

Busana nomwimbiriri mukulu. Sauma ya Dawidi omugulu Natana muminyereri amuhikako amabisingira Batesiba.

¹ Uwe Mungu, unyiganyire, ngoko lukogo lwawe luri: Usangule amalolo wage ngo bunene bwolukogo lwawe.

² Unyeraye ndeke kwebibi byage; Unyinabaye ebyesyonye syage.

³ Kusangwa nyasi amalolo wage; Nebibi byage biri embere syage endambi yosi.

⁴ Ukuwe, ugowene, nabirikola nabi, Nabirikola ekibi oko meso wawe; Iwatoka eriminyikala kutunganene omugulu ukabuga, Neriminyikala mubuya omugulu ukatswera.

⁵ Lebaya, nabutirawa omo bibi; Nomo bibi koyo wage ahekera obukule.

⁶ Lebaya, ukasonda ekwenene omo bihande byomwisi; Nomo kihande kibisamire wasyanyiminyisya amenge.

⁷ Unyeraye na hisopo, neryo nasyera, Unyinabaye, nasyabya mweru kwilaba nzururu.

⁸ Unyihe eriowa obutseme neritsanga, Amakuha ayo wabiribunanga atseme.

⁹ Ubise obusu bwawe oko bibi byage, Usangule amalolo wage gosi.

¹⁰ Uhangike omutima erire omwisi wage, Uwe Mungu; Uyire ekirimu kitunganene kihya omwisi wage.

¹¹ Sunyiguse oko busu bwawe; Sundusaye kweKirimu Kibuyirire kyawe.

¹² Unyisuburiraye obutseme bwerilamya ryawe; Unyihambirire omo kirimu kyeriliga,

¹³ Neryo nasyakangirirya ababi esyonzira syawe; Na bakola nabi basyabindurirwa kuwe.

¹⁴ Uwe Mungu, unyilamaye oko lubanza lwomusasi, uweMungu werilama ryage; Olulimi lwage lwasyimba kutsibu eritunganene ryawe.

¹⁵ OMukama kumbula eminywa yage; Nobuno bwage bwasyakangya eripipa ryawe.

¹⁶ Kusangwa suritsemera amahere; kumbe nakuhago: Suritsemera amahere weriokya.

¹⁷ Amahere woMungu ni kirimu kibunikire: Omutima abunikire owahehere, uwe Mungu, siwendiponago.

¹⁸ Ukole Siona kibuya omwisonda ryawe ribuya: Uhimbe ebikunda byeYerusalema.

¹⁹ Neryo wasyatsemera amahere weritunganene, omo buherebwerihisirirya nobuhere bosi bwerihisirirya: Neryo basyahera esyonume oko heriherera ryawe.