Esyonyimbo 50 - Nouveau Testament et Psaumes en Ndandi Version 1962

Mungu ni mutsweri

Sauma ya Asafu.

¹ Owamaka, oMungu, MUKAMA, abiribuga, Mwabirikira e kihugo eritsuka aho eryuba rikahuluka erihika aho rikalengera.

² Erilwa eSayuni, erihikana ryobubuya, Mungu akangabenie.

³ Mungu wetu akasa, isiaribya bukutu: Embere siwe omuliro akabuga, Erihunga inene rikamutimbako.

⁴ Akabirikira elubula lwendata, Ne kihugo nakyo, iniatoka eritswera abandu buwe:

⁵ Munyihindaniraye ababuyirire bage, Ababirilagana nage mo buhere.

⁶ Nobutuku bwasyatula eritunganene riwe; Kusangwa Mungu iye ni mutsweri. [Sela

⁷ Inywe, abandu bage, mowe nage ngabuga; Uwe Israeli, ngandikukanirya: Ingye ndi Mungu, Mungu wawe.

⁸ Sindindikukunga busana namahere wawe; Na mahere wawe weriokya ari embere syage endambi yosi.

⁹ Sindiendisimya enume omo nyumba yawe, Kutse embaya omo butara bwawe.

¹⁰ Kusangwa oburi enyama syomoli ni syage, Nesyonde oko bitwa elfu.

¹¹ Nyinasi esyonyonyu syosi syebitwa; Nesyonyama sikalire syomoli siri nage.

¹² Kumbe ngwire enzala, sinangakubwira: Kusangwa e kihugo ni kyage, nebyoswire mukyo.

¹³ Nasyarya esiswi syesyonume, Kutse eripulya omusasi wesyombene kwehi?

¹⁴ Uherere Mungu obuhere bwewasingya; Urihe erilahirya ryawe oko wEndata oko Byosi;

¹⁵ Unyilakire oko kiro kyobulige; Nasyakulamya, nawe wasyanyipipa.

¹⁶ Nikwa Mungu akabuga oko babi ati, Ukakolaki uti ukakanaya ebihano byage, Uti ukahira erilagana ryage omo buno bwawe kwehi?

¹⁷ Kusangwa ukakwa erihanwa ekiniga, Ukagusa ebinywa byage byonyuma kuwe.

¹⁸ Omugulu walangira omwibi, mowamuligira haguma naye, Kandi wabirisangana nabasingiri.

¹⁹ Mowaha obuno bwawe oko bibi, Nolulimi lwawe erikokotya ebyeriteba.

²⁰ Mowikala neribuga nabi oko mugala wenyu; Mowalega omugala wakoyo wawe.

²¹ Emyatsi eyi mowakolayo, nage monabya bukutu; Waganiraya uti nyiringene nawe ndeke: Nikwa nasyakukunga, nasyahirabyo embere syameso wawe ngoko bikwamene.

²² Muganiraye ebi inywe mukibirirawa Mungu, Ingasyabatulanga mo bihande, ihabula oyu kabalamaya:

²³ Oyu kahera obuhere bwa wasingya akanyipipa; Noyu katungananaya enzira yiwe Nasyamukangya erilama ryoMungu.