Esyonyimbo 44 - Nouveau Testament et Psaumes en Ndandi Version 1962

Erilamibwa oko malige

Oko mwimbiriri mukulu. Olwimbo lwabagala baKora. Erikangiriribwa.

¹ Twabiriyowira na matwi, wetu, uwe Mungu, Nabotata wetu babiritubwira Emibiri wakola omo biro byabo, Omo biro byakera:

² Mwahiga ebihanda nebyala byawe; Nikwa ebo mowahandabo: Mowagalya abandu; Nikwa ebo mowatsunganiabo ehosi.

³ Kusangwa mobatimya e kihugo omo muyari wabo, Kutse okuboko kwabo kokutalamayabo; Nikwa ebyala byawe byamali nokuboko kwawe, nekyakakala kyobusu bwawe, Kusangwa mowatsemerabo.

⁴ Uwe Mungu, uri Mwami wage: Utegeke erilama busana na Yakobo.

⁵ Busana nawe twasyakinda esyonzigu syetu syahisi: Busana nerina ryawe twasyarya tilira ahisi abakatubambira.

⁶ Kusangwa sindiendisyayiketera obuta bwage, Kutse omuyari siendisyanyilamya.

⁷ Nikwa ni we watulamaya oko syonzigu syetu, Mowita esisoni abakatukwa obusu.

⁸ OMungu yo tukayiketera ekiro kyosi, Tukandisyaha ewasingya oko rina ryawe kera na kera. [Sela

⁹ Nikwa lino wabiritugusa wabiritwita esisoni, Isurigenda nemilondo yetu.

¹⁰ Walekire itwasuba enyuma embere wesyonzigu syetu; Nabakatukwa ekiniga bakatuhunga.

¹¹ Wabirituyira ngesyombuli syerikerwa, Wabiritupanzapanza omo bihanda.

¹² Wabirigulya abandu bawe bo busa, Nenzwere yabo siritakubanira endundi.

¹³ Wabirituyira mo basininguli oko bahimbani betu, Erisekereribwa nerisekwa oko batutimbireko.

¹⁴ Wabirituyira mo misyo omo bihanda, Eritsingiribwa emitwe omukati-kati ka bandu.

¹⁵ Ekiro kyosi esisoni syage siri embere syage, Nesisoni syobusu bwage syabirinyiswika,

¹⁶ Busana nomulenge woyu kanyisiningulira noyu kanyitsuma, Busana nenzigu nomukisya.

¹⁷ Ebyosi ebi byabirinyihikako; nikwa sitwetakwibirirwa, Kutse sitwetabiha omwilagana ryawe.

¹⁸ Omutima wetu siaritasuba enyuma, Kutse nebisandu byetu sibetaleka enzira yawe,

¹⁹ Nomo wabiritubunangira aheboha, Nerituswika ekitsutsu kyoluholo.

²⁰ Twamabya twibirirwe erina ryoMungu wetu, Kutse twamasumbira ebyala byetu oko Mungu atasibwe;

²¹ OMungu siendisyasondya ebi kwehi? Kusangwa anasi ebibisamire byomutima.

²² Ega, busana nawe tukitawa ekiro kyosi; Tukaganzawa ngesyombuli syerikerwa.

²³ Uwe Mukama, ubuke, busana naki ukayato kwehi? Hangana, sutuguse kera na kera.

²⁴ Busana naki ukabisa obusu bwawe, Iwibirirwa eriagalwa ryetu nerinubibwa ryetu kwehi?

²⁵ Kusangwa ekirimu kyetu kyamunamira omo lututu: Omubiri wetu akamatana nekitaka.

²⁶ Hangana, busana nerituwatikya, Ututongolaye busana nerigenyera ryawe.