Esyonyimbo 40 - Nouveau Testament et Psaumes en Ndandi Version 1962

Eripipa nerisaba Mungu

Oko mwimbiriri mukulu. Sauma ya Dawidi.

¹ Monalindirira MUKAMA neritindaluha; Naye mwanyitegera okutu, mowa erilaka ryage.

² Mwanyisumba omo buhya bwerihera, nomo byondo byobutimba; Mwahira ebisandu byage byokwibwe, mwasikya olugendo lwage.

³ Abirihira olwimbo luhya omo buno bwage, eripipa okoMungu wetu. Abangi basyalangirakyo, neriubaha, Basyayiketera MUKAMA.

⁴ Omuyisa ari nomundu oyu kayiketera MUKAMA, Isiarikenga abakayihamaya, kutse nabakabindukira amabihi.

⁵ Uwe MUKAMA, Mungu wage, emibiri yeriswekera wabirikola ni mingi, Namaringikania wawe busana netu ni mangi; Sibyangatoka eritondekwa embere syawe; Namasonda erikaniabyo neriahulabyo, Birengire eriganzwa.

⁶ Obuhere namatolere suritatsemerabyo, Amatwi wage wabirilibulago. Obuhere bweriokya nobuhere bwebibi suritasondabyo.

⁷ Neryo monabuga nyiti, Lebaya ngasa; Omo kunzo wekitabu kisakire busana nage:

⁸ Uwe Mungu wage, nyitsemire erikola erisonda ryawe; Ega, ebihano byawe biri omo mutima wage.

⁹ Nabirikania engulu yowene yeritunganene omo ndeko nene; Lebaya, sindindisyakakirya eminywa yage, Uwe MUKAMA, unasi.

¹⁰ Sinditabisa eritunganene ryawe omo mutima wage; Nabirikania eritindasiganirya ryawe nerilamya ryawe; Sinditabisa eriganyira ryawe nekwenene yawe oko ndeko nene.

¹¹ Sunyikakiraye olukogo lwawe lowene, Uwe MUKAMA; Eriganyira ryawe nekwenene yawe binyitegaye endambi yosi.

¹² Kusangwa ebibi ebiteganzika binyitimbireko; Ebibi byage byabirimbikako, isinditoka erilebya endata; Bilabire esyonzwiri syoko mutwe wage; nomutima wage abirinyisiga.

¹³ Rikutsemesaye, uwe MUKAMA, erinyilamya; Uwe oMUKAMA, wanguhe erinyiwatikya.

¹⁴ Bitawe esisoni basingawe haguma Abakasonda ekirimu kyage eriheryakyo; Basubibawe enyuma bahemulawe Abakatsemera erihutala ryage.

¹⁵ Basweke busana nesisoni syabo Abakambwira bati, Ha, ha.

¹⁶ Abosi abakakusonda batseme batsange omwisi wawe: Abanzire erilama ryawe babuge endambi yosi bati, OMUKAMA apipawe.

¹⁷ Nikwa ingye ndi mwera nogobwaga; OMukama akanyiganiraya: Uri muwatikya wage nomulamya wage; Uwe Mungu wage, sulindirire.