Esyonyimbo 37 - Nouveau Testament et Psaumes en Ndandi Version 1962

Abakikiriraya basikire

Sauma ya Dawidi.

¹ Suyihahukaye omutima busana nabakola nabi, Kandi sutsure abakakola ebitatunganene.

² Kusangwa basyatemwa luba ngebiti, Basyuma ngebiti bibisi.

³ Uyiketere oMUKAMA, ukole ebibuya Wikale omo kihugo urye eritindasiganirya riwe.

⁴ Uyitsemesaye omwisi woMUKAMA; Naye asyakuha erisonda ryomutima wawe.

⁵ Uhire enzira yawe oko MUKAMA; Uyiketere ye, naye asyaberereryabyo.

⁶ Asyahulukya eritunganene ryawe ngekyakakala, Nekwenene yawe ngeritungi inene.

⁷ Uyisyandire oko MUKAMA, umulinde neritindaluha; Suhahukaye omutima wawe busana noyu kabana omuyisaomo nzira yiwe, Busana nomundu ukabereraya eriganirya ribi.

⁸ Uleke erihitana uleke erigarirwa! Suhahukaye omutima, rikaleta erikola ebibi risa.

⁹ Kusangwa abakolanabi basyaheribwa; Nikwa abakalinda MUKAMA basyarya omwandu we kihugo.

¹⁰ Kusangwa hakisiya hake, omukola nabi iniatabyaho: Ega, wasyasondya ahabya isiariho.

¹¹ Nikwa abakayibombeka basyarya omwandu we kihugo, Basyatsemera omo buholo bungi.

¹² Omukola nabi akaya embita yoyu tunganene yonabi, Akamukegetera meno.

¹³ OMukama asyamuseka; Kusangwa akalebaya kwekiro kiwe kikahika.

¹⁴ Abakolanabi bakakula omuyari, babirikangita obutabwabo, Erigusa ahisi omwera nowobwaga, Eriita abatunganene omo nzira.

¹⁵ Omuyari wabo asingira omo mutima wabo, Nobuta bwabo bwasyabunangwa.

¹⁶ Ebike byoyu tunganene bilengire Bingibingi byabakola nabi bangi.

¹⁷ Kusangwa amaboko wabakola nabi asyabunangwa; Nikwa oMUKAMA akasingika abatunganene.

¹⁸ MUKAMA asi ebiro byabahikene; Omwandu wabo asyabyaho kera na kera.

¹⁹ Sibendisitwa esisoni oko mugulu webibi; Noko biro byenzala basyuguta.

²⁰ Nikwa abakolanabi basyahera, Nesyonzigu syoMUKAMA syasyabya ngebisabu byehyana hyembuli: Syasyahera; syasyaherera omo muki.

²¹ Omubi akayibweka, iniatatuha; Nikwa omutunganene akayira olukogo akanitaya.

²² Kusangwa abakatsumulawa noMUKAMA basyarya e kihugomo mwandu; Nabakatsumawa naye basyatubwa.

²³ Erihongoka ryomundu rikasikibawa noMUKAMA; Akatseme omo nzira yiwe.

²⁴ Nomo angawa, siendisyaguswa; Kusangwa oMUKAMA akamusiyikirira omo byala biwe.

²⁵ Nabya mulwana, na lino ndi mukulu; Sindinabana omutunganene akalekwa, Kutse olubuto luwe erisabirirya ebyerirya.

²⁶ Eritungi ryosi akaganyira, neribweka; Nolubuto luwe luri nomuyisa.

²⁷ Ulwe omo bibi, ukole ebibuya; Ubyeho kera na kera.

²⁸ Kusangwa oMUKAMA anzire eritswera eritunganene; Siendisyasigania ababuyirire buwe. Asyateyabo kera na kera: Nikwa olubuto lwababi lwasyatemwa.

²⁹ Abatunganene basyarya omwandu we kihugo, Basikalamo kera na kera.

³⁰ Obuno bwabatunganene bukakanaya ebyamenge, Nolulimi luwe lukabuga ebyebitunganene.

³¹ Ebihano byoMungu wuwe biri omo mutima wuwe; Sihari Eribasula riwe eryangatendera.

³² Omubi akasamarira omutunganene, Akasonda erimwita.

³³ OMUKAMA siendisyamusiga omo byala biwe, Kutse siendisyaleka iniatswerwa lubi omugulu akasoherawa.

³⁴ Ulindirire oMUKAMA, utegaye enzira yiwe, Naye asyakuhamya erilagwa omwandu we kihugo: Omugulu ababi basyatemwa wasyalangira.

³⁵ Nabirilangira omubi iniane nehamuli nene, Neriyisanza ngomuti mubisi oko kitaka kyago.

³⁶ Nikwa mwalabaho, mweya isiariho: Ega monamusondya, nikwa mwatabanika.

³⁷ Ulebaye omundu uhikene, utungerere oyu tunganene; Kusangwa omundu wobuholo awite olubuto.

³⁸ Nikwa abakolanabi, basyaheribwa haguma: Olubuto lwabakola nabi ni temwa.

³⁹ Nikwa erilama ryabatunganene ni ryoMUKAMA: Iye ni herisagira ryabo oko mugulu wobulige.

⁴⁰ MUKAMA akawatikayabo nerilamyabo: Akalamayabo oko babi, neritongolyabo, Kusangwa babirimusagirako.