Esyonyimbo 35 - Nouveau Testament et Psaumes en Ndandi Version 1962

Erisaba busana nerilamibwa oko nzigu

Sauma ya Dawidi.

¹ OMUKAMA, unegene nabakanegena nage: Ulwe nabakalwa nage.

² Uhambe engabo nekigabo, Unyihanganire unyiwatikaye.

³ Ukure eritumo omo lubo, ulibe enzira yabakanyikwama: Ubuge nomutima wage uti, Indi ilama ryawe.

⁴ Abakasonda ekirimu kyage bitawe esisoni nerihemulwa: Abakaya embita erinyikola nabi basubibawe enyuma nerisingwa.

⁵ Babye ngomusunga owakahekawa nerihunga, Nomulaika woMUKAMA ahigebo.

⁶ Enzira yabo ibye mo mwirimya na matendere, Nomulaika woMUKAMA akwamebo.

⁷ Kusangwa butsira ekikaleka mobanyibisira ekitego omobohya; Butsira ekikaleka mobatakulira ekirimu kyage obuhya.

⁸ Eriheribwa rimuhikeko isyasi; Ekitego kiwe abiribisakyo kimuhambe: Awe mukyo ahere.

⁹ Ekirimu kyage kyasyatsemera oMUKAMA: Kyasyatsemera erilamya riwe.

¹⁰ Amakuha wage gosi asyabuga ati, oMUKAMA, Nindiyuringene nawe, Uwe ukalamaya abolobolo okoyu lengirebo amaka, Ega, erilamya omwera noyuri nobwaga kwoyu kamuhunga?

¹¹ Abalangiri batatunganene bakahangana Bakanyibulaya emyatsi ndasi.

¹² Bakanyituha ebibi oko bibuya. Bakalolaya ekirimu kyage oko bulige.

¹³ Nikwa ingye, omugulu balwala, monambala emisarandwe: Monagalya ekirimu kyage neritsira erirya; Nerisaba ryage monunamirya omutwe oko kikuba kyage.

¹⁴ Monabya ngalwe omwira wage kutse mugala wetu: Monunama neririra ngoyu ukarira enyinya wuwe.

¹⁵ Nikwa omwisumbayira ryage mobatsema, mobayihindania; Abatyabatya mobayihindania kwingye isinyasi; Mobanyitulanga butsira eriumbya:

¹⁶ Mobanyikeregetera ameno wabo, Ngabatyubaha oMungu ibakasekereraya okwirya.

¹⁷ OMukama, omugulu ungahi wasyasamalira kwehi? Ulamaye ekirimu kyage okwiherya ryabo, Engebe yage oko syondale.

¹⁸ Nasyakuha ewasingya omo ndeko nene: Nasyakupipira omukati-kati kabandu bangi.

¹⁹ Suleke abari syonzigu syage namabihi erinyitsemerako; Kutse suleke bakanyikoheraya ameso abakanyikwa ekiniga hate omwatsi.

²⁰ Kusangwa sibebuga ebyobuholo; Nikwa bakaya embita yebinywa byeriteba abayibombekire omo kihugo.

²¹ Ega, bakatanda obuno bwabo kutsibu kwingye; Bakabuga bati, Ha, ha, ha, ameso wetu abirilangirakyo.

²² Uwe MUKAMA, wabirilangirakyo; subye bukutu: OMUKAMA, sunyibyeko hali.

²³ Uhangane, ubuke erinyibanire olubanza lutunganene, Busana nomwatsi wage, Mungu wage noMukama wage.

²⁴ Unyitswere, uwe MUKAMA, Mungu wage, ngeritunganeneryawe; Suleke bakanyitsemera.

²⁵ Suleke bakabuga omo mutima wabo bati, Aha, ko tukasondatutya: Suleke bakabuga bati, Twabirimumera.

²⁶ Bitawe esisoni basingawe haguma abakatsemera eriagalwaryage: Bambalibawe esisoni nerihemulwa abakayipipa busana nage.

²⁷ Abakasima omwatsi wage owatunganene bayisyandire neritsema; Ega, babuge endambi yosi bati oMUKAMA apipawe, Oyu katsemera omuyisa womugombe wuwe.

²⁸ Kandi olulimi lwage lwasyakania eritunganene ryawe Neripipa ryawe ekiro kyosi.