Esyonyimbo 34 - Nouveau Testament et Psaumes en Ndandi Version 1962

Sauma ya Dawidi omugulu ateba ayibuyisisaya embere ya Abimeleke eriyihindula nga musiri omugulu Abimeleke amuhiga, mwagenda.

¹ Nasyapipa oMUKAMA emigulu yosi; Erisima riwe ryasyabya omo buno bwage endambi yosi.

² Ekirimu kyage kikayiketera oMUKAMA; Abakagalawa bowe batseme.

³ Mupipe oMUKAMA haguma nage Tuhamaye erina riwe haguma.

⁴ Monasonda MUKAMA, mwanzubirya, Mwanyilamya oko buba bwage bosi.

⁵ Mobamusamarira, mobakangabania; Namasu wabo siendisyahemulwa na kera.

⁶ Omundu mwera oyu mwalaka, oMUKAMA mwamowa, Mwamulamya omo malige wuwe gosi.

⁷ Omulaika woMUKAMA akahimba eritimba oko bakamubaha, Akalamayabo.

⁸ Mugeraye mulebaye koMUKAMA ari mubuya: Omuyisa ari komundu oyu akamusagirako.

⁹ Mubahe oMUKAMA, inywe babuyirire buwe; Kusangwa abakamubaha sibebula kindu.

¹⁰ Ebyana byendale bikabula ibyawira; Nikwa abakasonda oMUKAMA sihari ekibuya nekiguma ekyo basyabula.

¹¹ Mwase, abana balere, munyowe: Ngandibigisya eriubaha ryoMUKAMA.

¹² OMundu ni wahi oyu kasonda engebe, Akanza biro bingi erisyalola oko bibuya kwehi?

¹³ Ukakiraye olulimi lwawe oko bibi, Neminywa yawe sibuge matebo.

¹⁴ Ulwe oko bibi, ukole byowene: Usondaye obuholo, ukwamirirebo.

¹⁵ Ameso woMUKAMA ari oko batunganene, Namatwi wuwe ari okwilaka ryabo.

¹⁶ Ekitsure kyoMUKAMA kiri oko bakakola ebibi, Alusaye eriyibuka ryabo omo kihugo.

¹⁷ Abatunganene mobarira, oMUKAMA mowa, Mwalamyabo omo malige wabo gosi.

¹⁸ OMUKAMA ari hakuhi nabemitima ibunangikire, Akalamaya abebirimu bihimatangire.

¹⁹ Amalige woyu tunganene ni mangi; Nikwa oMUKAMA akamulamaya omo gosi.

²⁰ Akategaya amakuha wuwe gosi: Sihari eriguma rikabunika.

²¹ Ebibi byasita omubi; Nabakakwa abatunganene obusu basyatswerwa lubi.

²² OMUKAMA asyatongolya ekirimu kyabagombe buwe; Noko bakamusagirako sihari oyo wasyatswerwa lubi.