Esyonyimbo 33 - Nouveau Testament et Psaumes en Ndandi Version 1962

Eripipa obubuya namaka woMungu

¹ Mutseme omwisi woMUKAMA, inywe batunganene: Eripipa ritolere abatunganene.

² Muhe ewasingya oko MUKAMA omo nanga; Mwimbi eripipa omo nanga yemisisa ikumi.

³ Mumwimbire olwimbo luhyaluhya; Muwate emisisa na menge neriyisyandira nomulenge.

⁴ Kusangwa eKinywa kyoMUKAMA kitunganene; Nemibiri yiwe yosi ikakolawa butasiganirya.

⁵ Anzire ekitunganene nolubanza olute lolwira-lwira; E kihugo kyoswire nolwanzo lubuya lwoMUKAMA.

⁶ EKinywa kyoMUKAMA kyo kyahangika olubula, Nomuka womo buno buwe wahangika emilondo yosi yalo.

⁷ Akahindanaya amagetsi wengetsi go haguma ngakilundo: Akabika emitobero omo syombiso.

⁸ E kihugo kyosi kyubahe oMUKAMA: Abari omo kihugo bahangane nerimukenga.

⁹ Kusangwa mwabuga, mobyabya; Mwategeka, mobyasika.

¹⁰ OMUKAMA akayira erihana ryebihanda mo buyira; Akaleka amaganiryo wabandu eribya bosa.

¹¹ Erihana ryoMUKAMA rikahangana kera na kera, Amaringikania womutima wuwe akabyaho oko syondengosyosi.

¹² Omuyisa ari nekihanda oMungu wakyo ini MUKAMA, Nabandu abo abiriyisoga eribya omwandu wuwe.

¹³ OMUKAMA akaleberaya omo lubula; Akalebaya abagala babandu;

¹⁴ Aho ikere akalebaya abosi Abikere omo kihugo,

¹⁵ Oyo akakokotaya emitima yabo abosi, Akaganiraya emibiri yabo yosi.

¹⁶ Sihari mwami oyu kalamibawa busana nemilondo yiweminene: Omundu wamaka siarilamibawa busana na kagala kanene.

¹⁷ Efarasi ni kindu buyira okwilamya; Kutse sirilamaya mundu busana na maka wayo manene.

¹⁸ Lebaya, eriso ryoMUKAMA riri oko bakamubaha, Riri oko bakayiketera olwanzo luwe lubuya;

¹⁹ Erilamya ekirimu kyabo oko luholo, Eriteyabo ibabyaho omo nzala.

²⁰ Ekirimu kyetu kyamalinda MUKAMA: Ni muwatikya wetu nengabu.

²¹ Kusangwa omutima wetu asyatsema omwisi wuwe, Kusangwa twabiriyiketera erina riwe ribuyirire.

²² OMUKAMA, olwanzo lwawe lubuya lubye kwitwe, Ngoko twabiriyiketera we.